‘Nâu jĭ bơngai jĭ ‘ngok Nhật Bản mă 2 jô̆ đơ̆ng blŭng sơnăm 2023 truh dang ei. Bơngai jĭ ‘noh hơioh drŏ ‘ngo rơ neh sơnăm 2019, oei tơ̆ xăh Tân Tiến, apŭng Krông Pac, dêh char Dak Lak. ‘Năr 16/6, hơioh đei ƀôh yuh. Truh ‘năr 19/6, hơioh hăk, bơngai ŭnh hnam ba hơioh năm ƀĭch tơ̆ hnam pơgang hơmet tơ̆ Hnam pơgang apŭng  Krông Pac.

‘Năr 20/6, hơioh jĭ roi dêh đei chơ năm tơ̆ Hnam pơgang Đa khoa tơring Tây Nguyên vă hơmet hăm hơlen gơ̆ tam mă băt yua đơ̆ng kiơ/ hơlen lăng jĭ pơ nhŭng pham. ‘Năr 23/6, pơtôch hơlen lăng MAC ELISA yua đơ̆ng Anih jang Vệ sinh Dịch tễ Tây Nguyên băt hơdăh bơngai jĭ đei ƀơm IgM jĭ ‘ngok Nhật Bản. Dang ei hơioh jĭ oei tŏk bŏk vei lăng, hơmet tơ̆ hnam pơgang Đa khoa tơring Tây Nguyên. Đei băt, bơngai hơioh jĭ tam mă đei ƀet vắc xin bơ̆ng jĭ ‘ngok Nhật Bản.