Tŏk bŏk vei lăng năng tông kon drŏ kăn hloh 1 sơnăm tơ̆ Hơnih ming hơmet hơ ioh jĭ kơ Hnam pơgang tơm Tơring Tây Nguyên, mŏ Huỳnh Thị An oei tơ̆ tơring Cư M’lan, apŭng Ea Súp, dêh char Đak Lăk tơbăt, đunh kơ au 1 giĕng, mŏ ƀôh kon hiĕn, chĕp pơlŏ păng tơ̆ tơpang ti, tơpang jơ̆ng đei ƀôh hmrŏng hmônh kơna ba năm khăm.Ƀak si akhan mon jĭ jơ̆ng ti ƀơ̆r. Đơ̆ng rŏng 3 năr ming hơmet tơ̆ hnam ưh kơ klăih, ŭnh hnam mă ba năm tơ̆ Hnam pơgang tơm tơring Tây Nguyên:“Mưh năm tơ̆ hnam pơgang ‘nŏh dôm đuh hmrŏng hmônh au sa roi lơ, lang să truh 2 tơpang jơ̆ng păng tơpoh tơ̆ tơpang ti mơ̆n. Ba jei ưh kơ băt găh tơdrong jĭ jơ̆ng ti ƀơ̆r kơna tơ̆ hnam ăn kơ hăp chă pơm ngôi dôm tơmam drăm pơm ngôi, bu mă băt băi pơyan au đei tơdrong jĭ yă ‘nau.”

Jei vei lăng năng tông kon 7 sơnăm tơpoh jĭ jơ̆ng ti ƀơ̆r tơ̆ Hnam pơgang tơm Tơring Tây Nguyên, mŏ Nguyễn Thị Diện oei tơ̆ phường An Bình, thĭ xah Buôn Hồ tơbăt, đơ̆ng rŏng 5 năr ming hơmet, kon mŏ hlôi pă chĕp pơgrŭn, jơhngơ̆m hlôi pran jăng grăng hơkau ƀiơ̆:“Đơ̆ng sơ̆ ưh kơ đei chă jĭ, tơ̆ tơring nhôn hui bơngai jĭ kơna ưh kơbăt găh tơdrong jĭ au. Ba brŏk kơnh gô chă hơmet rơgoh ƀiơ̆, kơchăng ƀiơ̆ lơ̆m tơdrong chă ngôi au to.”

Kiơ̆ đơ̆ng ƀak si Huỳnh Thị Bích Như, Hơnih ming hơmet hơ ioh jĭ kơ Hnam pơgang tơm Tơring Tây Nguyên, đơ̆ng blŭng sơnăm truh dang ei, hơnih au hlôi sơng ming hơmet ăn 85 ‘nu hơ ioh jĭ jơ̆ng ti ƀơ̆r. Mă kăl lơ̆m 1 khei kơ au măt bơngai tơpoh jĭ roi lơ. Dang ei hơnih tŏk bŏk ming hơmet ăn 15 ‘nu hơ ioh tơpoh jĭ jơ̆ng ti ƀơ̆r, lơ̆m au đei 2 ‘nu jĭ ăl. Ƀak si Huỳnh Thị Bích Như tơbăt:“Bơ̆n tang găn hơlau hăm trong ăn kon hơ ‘lơ̆p sŏng sa ‘lơ̆ng hơ iă, chă nhă đak mă lơ đơ̆ng noh ăn chă sa tơmam drăm đei rim kơchơ̆t vitamin vă đe hăp đei jơhngơ̆m pran jăng kĕ krơ̆ng păng kăl ƀet bơ̆ng hăm pơgang vaccine tang găn jĭ hơnơ̆k hơdrap păng pơtho ăn kon hơ ‘lơ̆p chă ôm ti mă rơgoh, ăp mă ôp rơgoh jơ̆ng ti ƀơ̆r ‘noh mă tang găn kĕ ƀiơ̆ tơdrong chă tơpoh lang să.”

Kiơ̆ đơ̆ng Hơnih bơ̆ jang Dăr lăng tang găn jĭ jăn dêh char Đak Lăk, jô̆ đơ̆ng blŭng sơnăm au truh dang ei, lơ̆m dêh char đei 100 ‘nu bơngai jĭ jơ̆ng ti ƀở tơ̆ 15 apŭng, thi xah, pơlei tơm. Lơ̆m au hlôi đei 1 ‘nu lôch. Lơ̆m 1 khei năm tơ̆ au, lơ̆m blŭng pơyan ‘mi, măt bơngai jĭ jơ̆ng ti ƀơ̆r tŏk bŏk tơpoh roi kơtang, jô̆ hơtŏ lơ̆m 1 giĕng đei đơ̆ng 12 truh 15 ‘nu. Hơnih vei lăng kon pơlei dêh char Đak Lăk hlôi pơjing tơdrong tơchơ̆t kơsô̆ 4953, găh atŏk kơtang bơ̆ jang tang găn jĭ hơbuh, jĭ jơ̆ng ti ƀơ̆r; Hơnih jang pơgang dêh char hlôi pơrô̆ athei rim hơnih jang pơgang atŏk kơtang dăr lăng vă vat tơring, hơmet pơ ‘lơ̆ng hơnih đei jĭ; atŏk kơtang pơtho tơbăt găh tang găn jĭ ăn kon pơlei. Adoi, iung jang hơdoi hăm Hơnih vei lăng hnam trương pơtho pơhrăm pơgơ̆r pơtho tơbăt ăn rim hnam trương trong tang găn jĭ jăn tơpoh. Ƀok Hoàng Hải Phúc, Kơ iĕng Kơdră chĕp pơgơ̆r Hơnih jang Dăr lăng jĭ jăn dêh char Đak Lăk tơbăt:“Nhôn pơchoh trong ăn Hơnih vei lăng jang pơgang vă pơrô̆ athei rim hơnih jang păng pơchoh trong ăn Hơnih jang pơtho pơhrăm chă pơrô̆ pơrôp, pơtho tơbăt 3 tơdrong tơm nhen sŏng sa pai sĭn, nhă đak rơ̆, hơpuih hơmet hnam rơgoh ‘lơ̆ng, ôp jơ̆ng ti păng pơm kiơ̆ 6 trong jang mă Hơnih tơm vei lăng jang pơgang chă pơtho pơkă mă lei kon pơlei oei ưh kơchăng, lăng pơhơi. Nhôn jei iung jang hơdoi hăm Hơnih vei lăng hnam trương pơtho pơhrăm chă pơtho ăn rim hnam trương, mưh ƀôh đe oh đei jĭ jơ̆ng ti ƀơ̆r’nŏh ăn oei hơdrô̆ hloi, chă pơrô̆ ŭnh hnam hơpuih ôp hnam mă rơgoh,hơdrol vă sŏng sa păng đơ̆ng rŏng chă pơyơ̆ng ‘nŏh chă ôp jơ̆ng ti ƀơ̆r mă rơgoh.”