Kơsô̆ bơngai ƀơm jĭ tŏk tenh, lơ̆m kơplăh lơ kon pơlei pơhơi pơhŏ ăh mă kơchĕng jĭ COVID-19 nhen tơdrong jĭ hơkuk hơdrap noh kơdih hơmet jĭ tơ̆ hnam păng ưh đei juăt chă chô̆ che gom ƀŏ, pơlôch xơmach âu to.  

Oei vei mĕ 94 xơnăm ƀơm COVID-19 tơ̆ Khua hơmet tơdrong jĭ tơpoh, Hnam pơgang tơm tơring Tây Nguyên, ƀok Đặng Ngọc Lân, oei tơ̆ thôn 8, xăh Hòa Thắng, pơlei tơm Buôn Ma Thuột ăn tơbăt, đunh kơ âu 1 giĕng, mĕ ƀok pơlŏ tô̆, gleh lap, xŏng xa ưh 'lơ̆ng, unh hnam ngêh yă jĭ hơdrap hmă đĕch noh răt pơgang 'nhăk vih tơ̆ hnam ăn yă huch pơgang. Mă lei pơlŏ tô̆ pơdui đunh, unh hnam 'nhăk yă năm truh hnam pơgang vă hơmet jĭ. Ăh băt mĕ ƀơm COVID-19, ƀok Lân pơngơ̆t kơ đon kơlih yă tam mă đei ƀet vaccine 'măng yơ hloi: “Đe duch đe met akhan, lê̆ yă tơ̆ hnam, ƀet bơ̆ng jĭ ăn đe mơlôh 'mơ̆i, oei găh yă noh gô đơ̆ng rŏng, athei yă tơklăh oei hơdrô̆ ưh ăn bơngai nai năm tơjê̆ noh da ƀiơ̆ truh dang ei hloi. Yơ̆ng âu ki pơlŏ inh adoi kơchĕng truh jĭ tơxoh đĕch, ưh đei kơchĕng ƀơm COVID ôh, năm tơ̆ âu test noh ƀơm COVID. Ưh kơ băt thoi yơ bơih, đe xâu tơ̆ hnam năm hŏk, oei inh adoi ƀet vaccine bơnuh, oei yă noh pă đei năm tơ̆ yơ”

Tŏk bŏk oei hơmet jĭ COVID-19 tơ̆ hnam pơgang tơm tơring Tây Nguyên, 'nhŏng Hoàng Văn Hân, oei tơ̆ thôn Ana, xăh Dray Sáp, apŭng Krông Ana ăn tơbăt, unh hnam xư noh tĕch pơdro răh rai, rim năr tơƀơ̆p lơ bơngai noh xư ưh kơ băt ƀơm COVID-19 đơ̆ng lai yơ. Ăh ƀôh jĭ dăng hơlŏng, pơlŏ tô̆ noh năm tơ̆ hnam pơgang: “Lăng atŭm đei ƀet vaccine 3 'măng bơih noh da ƀiơ̆, ƀơm jĭ adoi ưh gan hlăm ôh, hăp pơlŏ iơ iă đĕch, mă 2 noh ưh đei lap jat ôh, hơdrô̆ jĭ dăng hơlŏng đĕch, ưh gơh xŏng xa noh jơhngơ̆m jăn pran adar hloh”

Kiơ̆ ƀak sih Phạm Hồng Lâm, kơdră Khua hơmet tơdrong jĭ tơpoh, kơ Hnam pơgang tơm tơring Tây Nguyên, lơ̆m 1 khei kơ âu, kơsô̆ bơngai jĭ ƀĭch hnam pơgang kơyuơ ƀơm COVID-19 tŏk kơtang. Dôm bơngai jĭ ƀĭch hnam pơgang mă lơ noh hlôi kơdih hơmet jĭ tơ̆ hnam păng hơnơ̆ng đei tơdrong jĭ nai lơ̆m hơkâu. Dang ei Khua tŏk bŏk oei hơmet ăn 25 bơngai ƀơm jĭ COVID-19: “Lơ̆m 25 'nu đei pơhlom 5% athei dui jơhngơ̆m hăm ôxy, truh khei năr âu noh tam mă đei bơngai yơ hơbuh jĭ ăl, mă lei adoi oei hli hlơt mơ̆n. Vă tơbang adrol păng tang găn lôch hơchăng noh bơngai jĭ đei dôm tơdrong jĭ găh trong dui jơhngơ̆m, mă kăl noh hăm dôm bơngai đei tơdrong jĭ lơ̆m hơkâu jăn noh athei truh khăm hơlen păng hơmet kiơ̆ kơ tơdrong hơbuh jĭ. Păng đei minh tơdrong mă kon pơlei xơđơ̆ng lơ̆m đon noh dôm bơngai jĭ da ƀiơ̆ adoi gơh chă hơmet tơ̆ hnam, păng dôm bơngai âu mă lơ noh đei hloi tơdrong jĭ nai lơ̆m hơkâu”

Đơ̆ng blŭng xơnăm 2023 truh năr 16/5, jâ̆p dêh char Đăk Lăk băt đei 570 'nu bơngai ƀơm jĭ COVID-19. Hơdrô̆ lơ̆m 7 năr kơ âu, Đăk Lăk hlôi băt đei 252 'nu bơngai păng 1 'nu hlôi lôch hơchăng. Kiơ̆ kơ ƀok Hoàng Hải Phúc, Phŏ Kơdră pơgơ̆r Anih jang hơlen pơgang hơmet pơrang jĭ dêh char Đăk Lăk, kơsô̆ bơngai ƀơm jĭ COVID-19 tŏk lơ hloh đơ̆ng rŏng kơ pơdơh lêh năr 30/4 - 1/5 âu ki. Dang ei mă lơ noh kon pơlei pă đei chô̆ che gom ƀŏ păng pơlôch xơmach tơ̆ anih kơdrâ̆m bơngai noh tơdrong tơpoh lang xă kơtang hloh: “Nhôn hlôi tơgŭm ăn Anih jang Pơgang pơrang jĭ adoi nhen ăn Anih jang kơpal kơ dêh char đei tơdrong pơgơ̆r kăp gĭt noh hơtŏk tơroi tơbăt vă kon pơlei băt hơdăh pơm kiơ̆ pơkăp 2K, tơroi tơbăt vă kon pơlei pơm kiơ̆ tơchơ̆t ƀet pơgang bơ̆ng jĭ mă nhôn tŏk bŏk oei tơlĕch jang. Dang ei tôm apŭng đei bơngai ƀơm COVID adoi oei đei anih 'măn oei hơdrô̆, adoi oei yua dôm tơchơ̆t tang găn păng bơ̆ng jĭ. Ăh jĭ hlăm noh athei pơtruh hloi tơ̆ Hnam pơgang tơm tơring jing anih mă hơtuch đĭ đăng, oei dôm anih jang nai adoi kơchăng hơmet ăn dôm bơngai jĭ COVID da ƀiơ̆”

Adoi kiơ̆ tơroi đơ̆ng Anih jang hơlen pơgang hơmet pơrang jĭ (CDC) dêh char Đăk Lăk, lơ̆m tơring teh kơ dêh char 'nao đei 1 'nu bơngai lôch kơyuơ ƀơm COVID-19.  Bơngai jĭ âu  56 xơnăm, oei tơ̆ kueng kơphô̆ 4, thĭ trâ̆n Buôn Trấp, apŭng Krông Ana, dêh char Đăk Lăk. Bơngai jĭ âu hơbuh jĭ đơ̆ng năr 12/5, lơ̆m hơkâu đei hloi tơdrong jĭ plei lĕn, jĭ klơm păng jĭ yô đak xĭk.  

Adrol kơ noh, lơ̆m khei 4 âu ki, đơ̆ng rŏng kơ băt đei 8 'nu hŏk tro ƀơm SARS-CoV-2, anih jang pơgang pơrang jĭ Đăk Lăk hlôi tơlĕch test COVID-19 ăn đe hŏk tro hnam trưng THCS Trưng Vương, phương Thành Công, pơlei tơm Buôn Ma Thuột. Đơ̆ng noh băt đei 7 'nu ƀơm virus SARS -CoV2. Hăm tơdỏng hơbuh hli đơ̆ng pơrang jĭ COVID-19 ƀơ̆t kơsô̆ bơngai hơbuh hlăm, anih jang pơgang pơrang jĭ pơlei tơm Buôn Ma Thuột, dêh char Đăk Lăk hlôi tơgŭm ăn jơnŭm pơgơ̆r tơring găh pơm kiơ̆ tơchơ̆t tang găn păng tơjră jĭ  COVID-19. Atŭm hăm noh hơtŏk tơroi tơbăt truh kon pơlei vă kơchăng vei lăng jơhngơ̆m jăn ăn kơdih po păng tơpôl pơlei pơla.