'Nâu jing bơngai lôch kơyuơ pơlŏ tŏ lĕch ƀre ƀronh mă blŭng lơ̆m dêh char jô̆ đơ̆ng blŭng xơnăm truh dang ei. Bơngai hơ-ioh lôch âu 'noh drăkăn, rơneh xơnăm 2016, tơ̆ thĭ xăh Buôn Hồ, dêh char Đak Lăk đei khăm xơkơ̆t Jĭ plei nuih/Pơlŏ tŏ lĕch ƀre ƀronh Dengue hlăm.

Đơ̆ng rŏng kơ băt bơngai hơ-ioh âu lôch kơyuơ pơlŏ tŏ lĕch ƀre ƀronh, Anih jang Hơlen pơrang jĭ jăn dêh char Đak Lăk hlôi tơroi gah bơngai jĭ âu ăn Anih jang pơgang thĭ xăh Buôn Hồ, pơtho lơ trong hơlen, pơ-'nguaih cham char, hơlen véc tơ tơpoh jĭ păng pruih pơgang pơlôch xơmĕch. Atŭm hăm noh tơroi pơtho kon pơlei băt dôm trong tang găn păng hơmet pơlŏ tŏ lĕch ƀre ƀronh Dengue.