Anih jang Pơgang Hơmet jĭ jăn apŭng M’Drak, dêh char Đăk Lăk đei 12 Khua păng 13 anih jang pơgang tơ̆ xah, thĭ trâ̆n, mă lei adrô̆ đei 43 ƀak sih păng 11 ƀak sih chuyên khua 1. Kiơ̆ kơ yă Lê Thị Thủy, Kơdră Anih jang Pơgang Hơmet jĭ jăn apŭng M’Drak, đơ̆ng rŏng sơnăm 2019 hăm tơdrong pơm kiơ̆ dôm Tơchơ̆t  37 păng Tơchơ̆t 07 đơ̆ng Anih tơm jang Pơgang Hơmet jĭ jăn gah tơdrong tơmơ̆t jang hadoi dôm Anih jang Pơgang Hơmet jĭ jăn hơdrô̆ jing anih jang pơgang hơmet jĭ jăn tơ̆ tơring vă vei sơđơ̆ng tơdrong jang nhen: khăm hơmet jĭ, jang pơgang hơmet jĭ yư̆ phong, pơkăp măt bơngai lơ̆m unh hnam, pơm kiơ̆ dôm tơdrong tơchơ̆t jang kơ teh đak gah jang pơgang  hơmet jĭ jăn... Minh kăn ƀô̆ athei jang lơ tơdrong jang hăm lơ tơdrong tơlĕch jang.

Tơdrong mă âu pơm ăn khul jang pơgang kơ anih jang athei kơ-'nôh hloh 2 truh 3 'măng pơtơm keh đang tơdrong jang đei pơjao. Tơdrong jang lơ, bơngai jang pơgang hơmet jĭ jăn ưh kơ mah tơ̆ tơring. Yă Lê Thị Thủy ăn tơbăt: “Mă ba 'meh iŏk bơngai păng adoi đei lơ tơchơ̆t kơ Anih jang adoi nhen hơvơn pơm kiơ̆ Tơchơ̆t đơ̆ng Anih jang vei lăng kon pơlei dêh char, mă lei duh ưh đei ƀak sih vih jang kiơ̆ đơ̆ng lơ 'măng iŏk bơngai jang. Kơyuơ noh hăm anih jang, 'nguaih kơ tơdrong kơdih chă 'nhăk pơhrăm kăn ƀô̆ tơ̆ tơring, adoi nhen hơpơi 'meh đei tơchơ̆t vei sơđơ̆ng tơdrong tơgŭm vă hơvơn thâi pơgang rơgei vih pơm jang tơ̆ anih jang pơgang hơmet jĭ jăn tơ̆ tơring”

Mă đei tôm giơng, kơmăi kơmŏk hơmet jĭ jăn tôm tong păng 'nao, mă lei kơlih ưh chă đei ƀak sih noh dôm sơnăm kơ âu Anih jang Pơgang Hơmet jĭ jăn apŭng Krông Buk (dêh char Đăk Lăk) ưh kĕ pơjing đei dôm chuyên khua hơmet jĭ leh adoi nhen iŏk yua dôm kih thuơ̆t 'nao. Kiơ̆ kơ ƀok Trần Anh Hùng, Phŏ Kơdră Anih jang Pơgang Hơmet jĭ jăn apŭng Krông Buk, 'noh jing tơdrong tơm pơrăm truh tơdrong jang khăm hơmet jĭ, adoi nhen tơdrong 'lơ̆ng tơnăp gah tơdrong jang pơgang hơmet jĭ jăn tơ̆ anih jang: “Ƀak sih 'noh ưh kơ mah, dang ei đe ƀak sih tŏk bŏk oei pơm jang tơ̆ Krông Búk nhen lĕ 'nao hŏk đang 'măng khuă, tam mă đei chư̆ng chi pơm jang, tam mă hlôh vao kloh klĕch gah tơdrong jang. Mă kăl 'noh ưh kơ mah ƀak sih juăt hơmet pah jĭ, ƀak sih hơnhơl rơneh păng gah gei mê hôi sư̆k păng dôm ƀak sih gah hơmet jĭ jăn nai noh tơdrong hơvơn hơmet jĭ jăn gah nguăi san noh hơmet pơgia la păng 'nhăk tơ̆ hnam pơgang nai. Oei gah pah hơmet jĭ adoi ưh gơh tơlĕch jang kơlih ưh đei ƀak sih gei mê, ƀak sih pah hơmet jĭ. Gah khăm jĭ 'noh Anih jang Pơgang Hơmet jĭ jăn noh ưh đei ƀak sih chuyên khua 'noh adoi ưh đei khăm hơmet jĭ păng asong hla bar khăm hơmet jĭ jăn ăn kon pơlei”

Kiơ̆ Anih jang Pơgang Hơmet jĭ jăn Đăk Lăk 'noh, jâ̆p dêh char tŏk bŏk oei kơƀah hloh 1.700 ƀiên chê̆ jang pơgang, păng đei 7,15 ƀak sih lơ̆m 1 rơbăn măt kon pơlei pơtêng hăm tơchơ̆t 8 ƀak sih lơ̆m 1 rơbăn măt kon pơlei. Tơdrong lơ bơngai jĭ hloh tơdrong tŏk bŏk oei ƀôh tơ̆ lơ anih jang pơgang hơmet jĭ jăn kơ dêh char, hăm kơsô̆ giơng đơ̆ng 110% truh 130%. Tơdrong tơm pơm đei tơdrong ưh kơ mah ƀak sih tơ̆ anih jang pơgang tơ̆ tơring 'noh kơyuơ anih bơ̆ jang gleh lap, tơnap tap. Lơ̆m kơplah noh, jên khei jang kiơ̆ tơchơ̆t tơdrong jang păng dôm tơdrong kla jên jang nai adoi kiơ̆ pơkăp jên khei păng oei kơđeh, tam mă tơgăl hăm tơdrong đe yĕt pơm jang.

Vă hơmet tơdrong mă âu, anih jang Pơgang Hơmet jĭ jăn Đăk Lăk hlôi tơgŭm ăn Anih pơgơ̆r vei lăng kon pơlei dêh char trong pơjao jang hăm Anih jang Pơgang Yư̆ phong ăn dôm tơring kơtă vei lăng păng asong jang. Atŭm hăm noh, Anih jang Pơgang Hơmet jĭ jăn adoi Tơchơ̆t iŏk yua ƀak sih đơ̆ng 'nguaih mơ̆t kham hơmet jĭ tơ̆ hnam pơgang kŏng păng kla jên jang mă tơgăl. Tơdrong iŏk thâi pơgang, đe ƀak sih tơ̆ tơring adoi đei tơrĕk jang lơ̆m khei năr truh. Ƀok Nay Phi La, Kơdră Anih jang Pơgang Hơmet jĭ jăn dêh char Đăk Lăk ăn tơbăt: “Dang ei 'noh Anih jang Pơgang Hơmet jĭ jăn hlôi tơlĕch lơ trong jang nhen hăm dôm bơngai đei rơneh păng tih vơ̆ tơring mă yơ gô đei asong vih bơ̆ jang tơ̆ tơring noh. Sơnăm 2023 gô pơtoi rơih mă blŭng đơ̆ng hnam trưng Đăi hŏk Tây Nguyên, Đăi hŏk Buôn Ma Thuột adoi nhen đe sinh viên 'meh vih bơ̆ jang tơ̆ dêh char.”

Ưh kơ tôm bơngai jang, mă kăl noh khul ƀak sih tŏk bŏk ing tơdrong tơnap tap tih tên hăm anih jang pơgang hơmet jĭ jăn Đăk Lăk. Mă khei năr âu ki, dêh char hlôi tơlĕch lơ trong chă hơvơn đe ƀak sih adoi nhen pơtruh kăn ƀô̆ jang pơgang hơmet Jĭ jăn năm pơhrăm hơtŏk tơdrong jang, mă lei adoi tam mă tôm mah ăn tơdrong kăl. Vă pơtoi vei jơ̆ng păng hơvơn đe ƀak sih vih pơm jang tơ̆ anih jang pơgang hơmet jĭ jăn kŏng lâ̆p, atŭm hăm tơchơ̆t chă hơvơn, kăl đei lơ trong jang kăp gĭt nai vă đe yĕt sơđơ̆ng jơhngơ̆m pơm jang, tơguăt hăm tơdrong pơm jang.