‘Măng mă 3 ba kon năm tơ̆ Hnam pơgang tơring ƀet vaccine 5 lơ̆m 1, mă lei mŏ H’cuôn Ksor, tơring Krông Jing, apŭng Mdrak măh chôt vih dơ̆ng kơ yuơ tim mă đei vaccine. Mŏ H’cuôn tơbăt, mŏ kơtơ̆ng lơ̆m brŏ, đŏk hla bơar ƀăo băt, tơjê̆ au đei lơ pơrang jĭ tŏk bŏk tơpŏh kơtang, mă lei mưh ba kon năm ƀet tă ưh kơ đei pơgang kơna mŏ tôch pơngơ̆t:“Kon ĭnh hlôi 4 khei bơih mă lei tim mă ƀet vaccine 5 lơ̆m 1. Dang ei ĭnh năm ba kon ĭnh năm ƀet bơ̆ng vă tang găn jĭ jăn mă lei ưh kơ đei pơgang vaccine. Ĭnh ‘meh đei hrôih pơgang vaccine vă ƀet ăn kơ kon ĭnh.”

Mŏ H’Yên Niê, Kơdră chĕp pơgơ̆r Hnam pơgang tơring Krông Jing, apŭng Mdrak tơbăt, hrei au lơ̆m tơring đei hloh 220 ‘nu hơ ioh hloh 2 khei kăl vă ƀet vaccine 5 lơ̆m 1 mă lei tim mă đei ƀet. Kiơ̆ đơ̆ng mŏ H’Yên, tơdrong ưh kơ măh vaccine đunh khei ‘năr ưh khan lăp pơm ưh hơ iă ăn hơ ioh, mă lei oei pơm ưh kơ ‘lơ̆ng hơ iă lơ̆m chă hơvơn kon pơlei ba kon hơ ‘lơ̆p năm ƀet bơ̆ng đơ̆ng rŏng au kơnh dơ̆ng:“Hrei au ưh kơ măh vaccine ‘nŏh tôch kơ lơ, mă kăl ‘nŏh vaccine 5 lơ̆m 1 hlôi hloh 6 khei ưh kơ đei vaccine bơih, ‘ngoăih kơ ‘noh vaccine sởi jrŭm mă 1 đơ̆ng noh vaccine DPT jei ưh kơ đei vă ƀet ăn đe hơ ioh. Đơ̆ng noh pơm tơnap ăn tơdrong chă pơrô̆ hơvơn bơngai mĕ ba kon hơ ‘lơ̆p năm ƀet bơ̆ng. Pơtih gia đe sư năm ‘măng mă blŭng ưh kơ đei, ‘măng mă 2 ưh kơ đei, ‘măng mă 3 ưh kơ đei ‘nŏh đơ̆ng rŏng bơ̆n chă hơvơn pơrô̆ đe ư jĭ tôch tơnap.”

Kiơ̆ đơ̆ng yă Lê Thị Thủy, Kơdră chĕp pơgơ̆r Hnam pơgang apŭng Mdrak, apŭng Mdrak ‘noh jing dôm apŭng đei lơ tơring ƀet bơ̆ng tŏ sĕt. Lơ̆m dôm sơnăm au ki, hơnih jang pơgang apŭng ling lang tơƀơ̆p tơnap tap lơ̆m chă pơrô̆ hơvơn đe mĕ ƀă ba kon hơ ‘lơ̆p năm ƀet bơ̆ng ƀlep păng tôm. Dang ei tă ưh kơ măh vaccine ‘noh tơdrong hơmơt tơdrong ưh kơ kĕ kơ bơ̆ng lơ̆m kon pơlei tôch kơtang:“Sơ̆ mă đơ̆ng đei Hơnih tơm vei lăng bơ̆ jang pơgang ƀơk ăn ‘noh Mdrak păng mĭnh ƀar apŭng dơnuh jei tơƀơ̆p tơnap tap găh bơ̆ jang ƀet bơ̆ng ưh kơ măh dơ̆ng kơna sa roi tơbơ̆p tap hloh dơ̆ng. Tơdrong vaccine ƀet bơ̆ng ăn hơ ioh kăl đei hơnơ̆ng ƀlep hăm khei ‘năr păng kiơ̆ trong bơ̆ jang, tơdăh hiơ hiơ̆ păng ưh tơtom gô pơm kơnê̆ truh tơdrong kĕ bơ̆ng kơ hơ ioh.”

Ưh kơ măh vaccine ƀet bơ̆ng ăn hơ ioh ‘nŏh tơdrong đei ƀôh lơ tơ̆ dêh char Đak Lăk. Kiơ̆ đơ̆ng ƀok Võ Minh Hùng, Kơdră chĕp pơgơ̆r Hnam pơgang pơlei tơm Buôn Ma Thuột, đơ̆ng blŭng sơnăm au truh dang ei, pơlei tơm hlôi pă đei vaccine DPT, găh vaccine 5 lơ̆m 1 ‘nao ƀơk ăn mĭnh ‘măng khei 1 hăm 368 kơliêu, lơ̆m mă tơdrong ‘meh vă rim sơnăm kơ pơlei tơm kăl đei 15 truh 18.000 kơliêu vaccine 5 lơ̆m 1.“Truh dang ei hơ ioh tim mă truh 1 sơnăm ƀet tôm 8 jrŭm vaccine lơ̆m pơlei tơm nhôn ‘nao lăp jơnei 30%, lơ loh oei tŏ sĕt sot pơtêng hăm trong tơlĕch jang lơ̆m sơnăm ‘noh 98%. Kơna lơ̆m khei năr kơnh jei apĭnh chă tơgŭm ăn tơtom vaccine 5 lơ̆m 1 pơma hơdrô̆ păng vaccine lơ̆m tơdrong jang ƀet bơ̆ng lơ̆m teh đak pơma atŭm vă atŏk kơtang bơ̆ jang ‘lơ̆ng ƀet bơ̆ng ăn hơ ioh, tơgop vei lăng năng tông jơhngơ̆m pran jăng grăng akau ăn hơ ioh.”

Kiơ̆ đơ̆ng Hơnih bơ̆ jang dăr lăng jĭ jăn dêh char Đak Lăk tơbăt, lơ̆m 12 kơloăi lơ̆m grŭp vaccine găh tơdrong jang ƀet bơ̆ng ăn hơ ioh lơ̆m sơnăm 2023 Đak Lăk ‘nao sơđơ̆ng đei 2 kơloăi vaccine hơven hơvo păng jĭ gơ̆, 2 kơloăi vaccine ‘noh “5 lơ̆m 1” păng DPT hlôi đĭ, kơsô̆ uơ loei lăp tôm chă ƀet ăn hơ ioh truh đĭ khei 8.

Kiơ̆ đơ̆ng ƀok Lê Phúc, Kơ iĕng kơdră chĕp pơgơ̆r Hơnih bơ̆ jang dăr lăng jĭ jăn dêh char Đak Lăk, tơdrong tơm găh ưh kơ măh vaccine ‘nŏh kơ yuơ đơ̆ng sơnăm 2023 mư̆h tơplih trong bơ̆ jang pơgang vei lăng măt bơngai jing tơdrong jang tơlĕch jang hơnơ̆ng ăn rim tơring. Mă lei, tơpă yan au, tơdrong pơjao kon jên jang vă tơring răt vaccine oei đei dôm tơdrong tơhlăk tơhlĭn lơ̆m kơjă, tơchă hơnih tĕch ăn. Hơnih bơ̆ jang dăr lăng jĭ jăn Đak Lăk hlôi chih akŏm dôm kơ loăi pơgang vaccine ‘mĕh vă đei păng trong răt tơmơ̆t vaccine kơ sơnăm 2023 păng 2024 vă pơchoh trong ăn Hơnih vei lăng jang pơgang dêh char pơtruh ăn Hơnih vei lăng kon pơlei dêh char ƀơk ăn kon jên vă răt. Ƀok Lê Phúc, Kơ iĕng Kơdră chĕp pơgơ̆r Hơnih bơ̆ jang Dăr lăng jĭ jăn dêh char Đak Lăk tơbăt:“Vă pơjing đei kĕ bơ̆ng jĭ ăn kon pơlei pơla ‘nŏh kăl atŏk kơtang ƀet bơ̆ng păng kăl pơm lơ liơ đơ̆ng rŏng ‘nŏh ƀet ƀlep păng ƀet tôm lei mă kĕ bơ̆ng kơtang. Mă lei, tơdrong lon lơ̆m khei ‘năr kơđehj, tơdăh đei vaccine lei gô iung jang ƀet pơgoh jei măh ăn hơ ioh mơ̆n. Nhôn tơtăm hloh ‘noh dôm hơ ioh tim mă đei ƀet hiă mĭnh jrŭm ayơ, dang ei ưh kơ măh vaccine lei ưh kơ jor gô pơm kơnê̆ truh tơdrong pran jăng grăng akau ăn hơ ioh hloi.”

Kiơ̆ đơ̆ng rim bơngai joăt jang găh pơgang, ưh kơ măh vaccine gô pơm kơnê̆ kơtang truh tơdrong bơ̆ jang ƀet bơ̆ng pơ̆ih să. Tơdrong ưh kơ kĕ bơ̆ng jĭ gô kơtang mưh đei lơ hơ ioh ưh kơ đei ƀet bơ̆ng tôm tong, ưh kơ ƀlep khei ‘năr tơchơ̆t, tơdrong mă au pơm hơtŏk kơtang tơdrong pơrang jĭ pơrăm hơlơ̆k dơ̆ng.