Yak hloh vă jê̆ 40km năm tơ̆ siêu thị tơ̆ pơlei tơm Buôn Ma Thuột vă răt tơmam Têt, mŏ Võ Thị Diệu Hương oei tơ̆ apŭng Krông Pách tơbăt, tơdrong sư chu năm hơtăih vă răt tơmam Têt yua kơ tam mă sơđơ̆ng hăm tơmam tĕch kư̆ kă ‘ngoăih anih tĕch mơdro:

“Tơmam lơ̆m siêu thị sư lơ kơ loăi ƀiơ̆, ƀlă kơ ‘noh sư ƀônh yua kơ sư 1 hơnih gơh akŏm răt đei hiôk hloh. Ƀlă kơ ‘noh dơ̆ng siêu thị kŭm ƀôh sơđơ̆ng ƀiơ̆ găh tơmam ‘lơ̆ng yua kơ tơ̆ ‘ngoăih ƀơ̆t lăp kŭm hli kơ tơmam kư̆ kă hăm tơmam ya kơna rơih răt tơ̆ siêu thị hloh.”

Kŭm hrôih năm răt 1,2 tơmam Têt, mŏ Nguyễn Thị Mai Hương oei tơ̆ phường Ea Tam, pơlei tơm Buôn Ma Thuột akhan, khei ‘năr âu đei lơ jơ năr rơih iŏk, hơlen lăng tơmam mă hơlen hloh, veh ver kơ răt ƀơm dôm tơmam ưh kơ ‘lơ̆ng:

 “Hăm anih tĕch mơdro tơmam Têt ĭnh ƀôh tôch kơ lơ, kơjă ‘noh kŭm lơ kơ loăi kơjă đơ̆ng păh lăp truh măk. Tơdrong rơih tơmam đơ̆ng ŭnh hnam nhôn sơnăm ‘nâu ‘noh kơ loăi tơpu tơmam lăng athei ‘lơ̆ng păng athei hơdai hăm tơmam ‘lơ̆ng dơ̆ng. Ĭnh kŭm ‘meh dôm anih jang kơpal hơlen lăng tơdrong rơgoh ‘lơ̆ng tơmam sa lơ hloh vă nhôn sơđơ̆ng jơ hngơ̆m.”

 Pơ yua ăn năr Tết Nguyên Đán Giáp Thìn sơnăm ‘nâu, dôm anih mơdro sa, anih tĕch mơdro lơ̆m dêh char Dak Lak hlôi kơchăng tơmam, kĭ hla ar pơkăp hăm dôm anih tĕch mơdro đei đe lui ngeh vă vei sơđơ̆ng ‘lơ̆ng. Mŏ Nguyễn Thị Em, tơ ‘ngla hơnih tĕch tơmam tơ̆ trong Nguyễn Tất Thành, phường Tân Lợi, pơlei tơm Buôn Ma Thuột tơbăt:

“Pơma atŭm ‘noh jĭ hơnih tĕch tơmam hnam nhôn kŭm đei kơjăp lơ̆m anih tĕch mơdro bơih kơna răt tơmơ̆t tơmam ‘noh tôch kơ hơlen, tơmam hơ yơ ‘lơ̆ng, đei kơ tem kơ phiê̆u rơđăh mă răt tơmơ̆t, khei ‘năr âu pơjei hăm siêu thị đang kơ ‘noh hơnih tĕch tơmam pơih lơ dêh hnang kơna nhôn athei kăl kơ ‘lơ̆ng ‘noh mă sơng đei lơ tơmoi răt đơ̆ng nhôn.”

Vă vei rơgoh ‘lơ̆ng tơmam sa lơ̆m năr hơdrol, lơ̆m păng đơ̆ng rŏng Tết Nguyên Đán, dêh char Dak Lak hlôi athei dôm anih jang vei lăng hơtŏk loi dơ̆ng tơdrong jang vei rơgoh ‘lơ̆ng tơmam sa, păng athei dôm anih jang, tơring pơgơ̆r hơlen lăng, hơmet pơ ‘lơ̆ng tơdrong pơm tơlĕch, tĕch mơdro tơmam ya, ưh kơ ‘lơ̆ng. Dôm tơdrong jang tơroi tơbăt kŭm đei dêh char tŭn pran vă tơgŭm bơngai pơm tơlĕch, tĕch mơdro tơmam sa hlôh vao đei hơnăp jang lơ̆m tơdrong vei rơgoh ‘lơ̆ng tơmam sa, hơdai hăm tơgŭm bơngai răt yua hlôh vă răt đei tơmam rơgoh ‘lơ̆ng ăn jơhngơ̆m jăn. Ƀok Hoàng Văn Nghĩa, Phŏ dăr hơlen Anih vei lăng găh choh jang sa păng hơtŏk tơiung tơring tơrang dêh char Dak Lak tơbăt:

“Nhôn lăng kăl hơlen lăng dôm tơmam tơm ăn Tết nguyên đán vă jê̆ truh nhen dôm tơmam ƀier, hơlăk, ƀĕng keo, ‘nhĕm păng dôm tơmam đơ̆ng ‘nhĕm, ‘nhot, ƀum, plei ‘long. ‘Moi kiơ̆ tơdrong hơlen lăng ‘noh tơtom chă ƀôh dôm tơdrong pơm glăi găh tơdrong hơgăt vei rơgoh ‘lơ̆ng tơmam sa păng nhôn sek phak kơtang dôm bơngai pơm glăi. ‘Moi kiơ̆ tơdrong hơlen lăng ‘noh tơroi tơbăt ăn kơ dôm anih pơm tơlĕch tĕch mơdro dôm tơmam sa đơ̆ng tơmam tơmơ̆t blŭng truh tơmam tĕch athei vei sơđơ̆ng kiơ̆ trong jang kăl 1 trong kiơ̆ tơdrong hơgăt găh vei rơgoh ‘lơ̆ng tơmam sa.”

Tơdrong mơ̆t jang hơdrin đơ̆ng anih jang kơpal ‘noh jĭ tơdrong ‘lơ̆ng vă vei rơgoh ‘lơ̆ng tơmam sa năr Tết vă jê̆ truh. Mă đơ̆ng thoi noh, kon pơlei kŭm kăl kơ pơm kiơ̆ dôm nơ̆r pơtho tơtă đơ̆ng dôm anih jang kơpal, đei tơdrong rơih iŏk hiôk, lăp răt păng yua tơmam sa đei băt hơdăh anih pơm tơlĕch, lăng mă hơlen khei ‘năr gơh yua, tơroi lơ̆m tơmam.