Kiơ̆ tơroi ah hop akŏm, kơsô̆ bơngai lôch kơyuơ jĭ vơnh lơ̆m jâ̆p teh đak đơ̆ng blŭng sơnăm truh dang ei noh 64 'nu, đei ƀôh tơ̆ dôm tơring nhen Gia Lai, Nghệ An, Điện Biên, Bình Phước. Lơ̆m noh, Gia Lai đei 11 'nu, jing tơring đei lơ bơngai lôch kơyuơ jĭ vơng lơ hloh lơ̆m jâ̆p teh đak, adoi hơnơ̆ng oei mă hơgơ̆l gah tơdrong jĭ âu lơ̆m dôm sơnăm kơ âu.

Ah hop akŏm, rim bơngai tang măt pơma đam gah tơdrong jĭ vơnh hăm kon bơngai tơ̆ Việt Nam păng lơ̆m tơring Tây Nguyên, tơnap tap păng dôm trong tơlĕch jang; pơđăp dôm trong vei lăng păng hơtŏk ƀet vaccine hăm kŏ; dôm trong tang găn păng tơjră jĭ vơnh hăm kon bơngai; sơnong jang kơ jơnŭm pơgơ̆r tơring păng anih jang đei tơrĕk tơ̆ tơring... Kiơ̆ tơroi đơ̆ng dôm bơngai juăt jang ah hop akŏm, dang ei jĭ vơnh adoi tam mă đei pơgang hơmet dơnơm. Trong tang găn tơnăp hloh noh jing ƀet pơgang ăn kon tơrong păng ƀet vaccine bơ̆ng jĭ vơnh hăm bơngai mưh ƀơm kŏ, meo vơnh kăp; 'lơ̆ng hloh noh athei ƀet adrol kơ 24 jơ đơ̆ng rŏng kơ ƀơm kăp.