Măt bơngai lôch ‘nao hloh ‘nŏh tơ̆ apŭng Đak Đoa. Mă hơdăh ‘noh oh Thái (rơneh sơnăm 2019, pơlei Ƀok Rei, tơring Đak Sơmei, apŭng Đak Đoa). Kiơ̆ đơ̆ng ŭnh hnam tơroi, tŏk bŏk khei 9/2023, Thái răm kŏ ŭnh hnam kơdih kăp. Lăp đơ̆ng rŏng ‘nŏh kŏ au kơdau jăk hloi păng truh dang ei ưh kơbăt kŏ au oei hơrih dăh mă đĭ lôch.

Truh năr 24/10, Thái chĕp pơgrŭn, jĭ hơ-ơ̆m hơ-ăm lơ̆m hơkau. Pơgê năr 26/10, bơngai jĭ au đei chơ ba ming hơmet tơ̆ Hnam pơgang apŭng Đak Đoa đơ̆ng noh chơ ba năm tơ̆ Hnam pơgang Nhi dêh char Gia Lai vă ming hơmet jĭ ăl. Truh 10 jơ 30 pơnĭt năr ‘noh sư kơtĕch jơhngơ̆m. Hrei au hnam pơgang apŭng Đak Đoa hlôi vat tơring, hơmet pơ ‘lơ̆ng pơrang jĭ kŏ vơnh kiơ̆ tơdrong tơchơ̆t; adoi pơtho khan ăn kon pơlei găh tơdrong năm tơ̆ hnam pơgang vă đei ƀok thây pơgang pơtho khan păng ƀet pơgang vaccine lăp đơ̆ng rŏng kŏ meo chă kach, kăp..