Sơnăm hŏk ‘nâu, Hnam trưng jăl mônh Nguyễn Viết Xuân (thĭ trơ̆n Nhơn Hòa, apŭng Chư Pưh, dêh char Gia Lai) đei 804 ‘nu hŏk tro. Kiơ̆ đơ̆ng hơlen năng, kơsô̆ hŏk tro tơ̆ hnam trưng răt ƀao hiêm pơgang ‘nao đei dang 80%. Thây Trịnh Mạnh Thắng, hiê̆u trơng Hnam trưng tơroi, yoa tơ̆ tơring đei lơ mĕ ƀă hŏk tro năm jang tơ̆ hơtăih; dôm unh hnam pơmat tat, hŏk tro bơngai kon kông mĕ ƀă tam mă tơrĕk truh răt ƀao hiêm pơgang ăn kon hơ ‘lơ̆p: “Sơnăm ‘nâu jên răt ƀao hiêm pơgang tŏk lơ ƀiơ̆ sơnăm adrol ki, tơdrong arih xa lơ̆m hnam tơnŏ kơ lơ hŏk tro tơ̆ tơring oei tôch pơmat tat. Hnam trưng băt dôm tơdrong pơmat tat ‘nŏh kơna tơlĕch lơ trong jang, kơtă lơ̆m jơ hôp mĕ ƀă tơ̆ hnam trưng pơgơ̆r tơƀâp đe mĕ ƀă roi tơƀôh ăn đe sư mưh răt ƀao hiêm pơgang tôch đei yoa ăn hŏk tro păng tơpôl.”

Lơ̆m kơsô̆ 23 hnam trưng tơ̆ apŭng Chư Pưh lăp đei 5 hnam trưng đei hlŏh 90% hŏk tro răt ƀao hiêm pơgang. Tơdrong tơm pơm ăn kơsô̆ bơngai răt ƀao hiêm pơgang tŏ sĕt ‘nŏh yoa kơsô̆ hŏk tro, sinh viên đei tĕh đak tơgŭm jên ƀơk ƀao hiêm pơgang jur lơ, mưh xăh, pơlei pơla đĭ lĕch đơ̆ng hơnăn pơmat tat bơih. 

Ƀok Nguyễn Hữu Hưng – Phŏ Kơdră Anih Ƀao hiêm tơpôl apŭng Chư Pưh, dêh char Gia Lai, tơroi dơ̆ng: “Bơngai răt ƀao hiêm pơgang lơ̆m dôm sơnăm âu ki jur hơnơ̆ng, yoa ƀơm đơ̆ng tơdrong tơchơ̆t 612 (Tơdrong tơchơ̆t đơ̆ng Anih vei lăng hơdrĕch kon kông) găh tơjur tơring tơnuh, đei tơring ‘nao tŏk klăih đơ̆ng pơmat tat, yoa thoi nŏh đe ŏh hŏk tro tơ̆ tơring âu kŭm jur kiơ̆, lơ̆m nŏh mă loi jĭ đe ŏh hŏk tro bơngai kon kông. Yoa thoi nŏh, kơsô̆ hŏk tro vang răt ƀao hiêm pơgang tơ̆ apŭng Chư Pưh lăp đei pă 81%.”

Nhen thoi nŏh mơ̆n, tơdrong răt ƀao hiêm pơgang ăn hŏk tro tơ̆ apŭng Chư Sê dai tơƀâp lơ pơmat tat. Mă đơ̆ng hŏk tro bơngai kon kông đei tơgŭm 60% jên răt mă lei oei đei dang 2700 ‘nu ŏh tam mă răt. Yă Ngô Thị Hiền, Phŏ Kơdră Anih ƀao hiêm tơpôl apŭng Chư Sê, dêh char Gia Lai tơroi, kơsô̆ hŏk tro, sinh viên tơ̆ apŭng răt ƀao hiêm pơgang ‘nao đei lăp 86%: “Khul thây kô vei lăng dôm hnam trưng, rim anih jang chinh trĭ tơ̆ xăh păng dôm anih ƀao hiêm tơpôl vang jang hơdai, jur truh tơ̆ pơlei pơla păng rim hnam hŏk vă roi tơbăt, krao hơvơn mă lei đe mĕ ƀă hŏk tro tơl akhan, unh hnam pơmat tat kơna ưh đei răt ƀao hiêm pơgang ăn đe kon mon. Sơnăm hŏk 2023-2024, nhôn roi tơƀôh ăn Anih vei lăng kon pơlei apŭng pơtho ăn dôm anih pơgơ̆r jang tơ̆ xăh, dôm hnam trưng păng anih vei lăng pơtho pơhrăm tơlĕch jang ‘lơ̆ng tơdrong răt ƀao hiêm pơgang ăn hŏk tro, adrin vă đĭ đăng hŏk tro đei răt ƀao hiêm pơgang ngăl.”

Kiơ̆ kơsô̆ chih jô̆ đơ̆ng Ƀao hiêm tơpôl dêh char Gia Lai, hrei ‘nâu kơsô̆ hŏk tro, sinh viên vang răt ƀao hiêm pơgang ‘nao đei dang 90%. Dêh char oei đei dang 22 rơbâu ‘nu hŏk tro, sinh viên tam mă răt ƀao hiêm pơgang. Tơdrong ‘nâu ƀơm ưh ‘lơ̆ng truh tơdrong đei yoa đơ̆ng đe ŏh tơdăh ưh pŭn đei tơdrong sar bar, pơ̆k rơka, jĭ jăn mưh athei hiong lơ jên vă khăm hơmet.