‘Nau măt bơngai lôch mă 4 kơ yuơ kŏ vơnh kăp tơ apŭng au păng măt bơngai lôch mă 14 lơ̆m dêh char đơ̆ng blŭng sơnăm truh dang ei. Bơngai lôch au ‘noh oh Trần Dương Minh C (rơneh sơnăm 2017, oei tơ̆ pơlei Al Gôn, tơring Ia Din, apŭng Đức Cơ).

Kiơ̆ đơ̆ng ŭnh hnam tơroi, đunh kơ au 3 khei, bơngai lôch au răm hê̆ kŏ ŭnh hnam rong (kơloăi kŏ pơrŏ) kach rơka tŏ sĕt kơna ưh kơ năm ƀet pơgang vaccine păng pơgang tang găn kŏ vơnh. Lăp đơ̆ng rŏng băt đei bơngai lôch kơ yuơ jĭ kŏ vơnh pơm ăn, Hnam pơgang apŭng ĐứcCơ hlôi pơrô̆ pơrôp ŭnh hnam păng kon pơlei oei tơjê̆ kơchăng hăm kŏ vơnh, vă pơm hơtŏk jơhngơ̆m đon kon pơlei hlôh vao găh ƀet pơgang vaccine lăp đơ̆ng rŏng kŏ chă kăp, kach dăh mă năm tơ̆ hnam pơgang tơjê̆ hloh vă đei ƀok thây pơgang chă pơtho khan. Hăm 14 ‘nu bơngai lôch kơ yuơ jĭ kŏ vơnh pơm ăn, Gia Lai tŏk bŏk jing dêh char đei măt bơngai lôch kơ yuơ jĭ kŏ vơnh pơm ăn lơ hloh lơ̆m teh đak lơ̆m sơnăm 2023.