Âu ki, Hop akŏm ‘măng mă 4, jăl jang 2023-2028 đơ̆ng Khŭl Thây pơgang mơlôh dêh char Dak Lak hlôi băt hơdăh tơdrong tơm ‘noh jĭ: Hơtŏk dôm tơdrong jang năm tơgŭm yua kơ jơhngơ̆m pran tơpôl; tŭn pran tơdrong jang đơ̆ng khŭl Thây pơgang mơlôh tơ̆ dôm tơring kon pơlei oei. Hăm nơ̆r pơma bơ̆jang”Thây pơgang mơlôh Dak Lak pơm kiơ̆ nơ̆r ƀok Hồ, năm jang tơgŭm yua kơ jơhngơ̆m pran tơpôl”, lơ̆m jăl jang ‘nao, Khŭl Thây pơgang mơlôh dêh char Dak Lak hơnơ̆ng hơtŏk hơnăp jang păng kĕ jang đơ̆ng bơngai jang ‘moi kiơ̆ dôm tơdrong jang hŏk pơhrăm, hơtŏk ‘lơ̆ng jơhngơ̆m đon jang pơgang. Hơtŏk tơdrong pơcheh hơgei lơ̆m tơchĕng hơlen khoa hŏk păng tŭn pran tơdrong jang năm tơgŭm yua kơ jơhngơ̆m pran tơpôl.

Ƀak si Phan Thành Trinh, Kơdră vei lăng Khŭl Thây pơgang mơlôh dêh char Dak Lak jăl 4 tơbăt: “Khŭl Thây pơgang mơlôh Dak Lak hơnơ̆ng bơ̆jang kiơ̆ dôm tơdrong bơ̆jang đơ̆ng kơdih hăm 3 tơdrong tơm, găh lơ akŏm lơ̆m dôm tơdrong jang thây pơgang mơlôh năm tơgŭm yua kơ tơdrong arih sa tơpôl; hơtŏk đei hơnăp jang iung jang đơ̆ng kơdih tơ̆ dôm tơring. Păng hơnăp jang đơ̆ng dôm khŭl thây pơgang mơlôh tơ̆ dôm apŭng tơ̆ hơnăp âu kơnh gô pran hloh, đe ‘nhŏng mŏ oh gô hơtŏk đei hơnăp jang đơ̆ng kơdih tơ̆ tơring kơdih vei lăng”.

Khŭl Thây pơgang mơlôh dêh char Dak Lak dang ei đei 16 khŭl hăm vă jê̆ 1.000 bơngai jang ‘noh jĭ đe y ƀak si mơlôh tŏk bŏk bơ̆jang tơ̆ dôm Hnam pơgang, anih jang pơgang đơ̆ng dêh char truh apŭng păng dôm hnam pơgang pơm kơdih lơ̆m dêh char. Lơ̆m 5 sơnăm âu ki, dôm kơdră Khŭl Thây pơgang mơlôh lơ̆m dêh char hlôi đei lơ tơdrong jang năm tơgŭm yua kơ jơhngơ̆m pran tơpôl nhen: pơgơ̆r 120 ‘măng khăm jĭ, pơtho tơƀôh jơhngơ̆m pran, asong đĕch pơgang ăn kơ 86.000 ‘nu kon pơlei hăm kơsô̆ jên hloh 4,2 ti hlak jên; pơhrăm dôm trong hơmet ăn kơ rơbâu ‘nu thây kô pơtho dôm hnam trưng mầm non, jăl 1 lơ̆m dêh char. Pơgơ̆r năr ôp ti hăm sơƀŏng; pơhrăm găh tơdrong jang tơroi tơbăt jơhngơ̆m pran rơneh ăn hơdruh tơdăm păh iung, tang găn jĭ ăn kơ rơbâu ‘nu hŏk tro, sinh viên. Tơlĕch jang Tơdrong jang Tơgŭm bơngai jĭ tơ̆ 14 hnam pơgang lơ̆m dêh char. Hơdai hăm ‘noh Khŭl oei pơgơ̆r 1 tơdrong jang năm tơgŭm apŭng plĕnh teh tơ̆ Campuchia vă khăm jĭ, pơtho tơƀôh jơhngơ̆m pran păng asong pơgang đĕch ăn kơ kon pơlei, pơjao asong gre tang vang ăn hŏk tro đei tơdrong arih sa mơmat tat.

Hơtuch sơnăm 2023 âu ki, tơ̆ anih tơm Hà Nội, Khŭl Thây pơgang mơlôh Việt Nam hlôi pơgơ̆r tơdrong jang “Tơplih kơsô̆ yua kơ jơhngơ̆m pran tơsoh” khăm hơlen jĭ Ung thư tơsoh păng dôm tơdrong jĭ găh tơsoh. Tơdrong jang khăm hơlen hăm kơmăy kơmŏk ‘nao yua đơ̆ng đe ƀak si đơ̆ng dôm hnam pơgang bơ̆jang. Hăm dôm tơdrong jang khăm hơlen tôm, phĭn X-quang, siêu âm, pơtŏ plei nuih, hơlen lăng trong pham, hơlen lăng hơyô đak sĭk, rơmă pham.... đei kon pơlei lăng ‘lơ̆ng.

Mĭnh ‘nu bơngai jĭ pơma:“Ĭnh pơtŏ đei huyết áp păng iŏk pham vă pơlong lăng, oei dang ei gô vă phĭn tơsoh, oei athei siêu âm dơ̆ng, tôch kơ tơgŭm tơdrong jang ‘nâu. Apĭnh bơnê kơ teh đak bơngơ̆t truh kon pơlei”.

‘Nâu jĭ tơdrong jang khăm đĕch vă chă ƀôh tơtom dôm bơngai đei hơmơt kơ jĭ ung thư tơsoh păng dôm tơdrong jĭ krê hơmơt găh tơsoh, tơgŭm mơ̆t vei lăng păng hơmet jĭ, găn ƀiơ̆ tŏ sĕt hloh hơmơt kơ lôch, hơmơt ƀơm ưh kơ ‘lơ̆ng truh dôm tơdrong lơ̆m hơkâu păng jơhngơ̆m pran, tơgop vei sơđơ̆ng tơdrong arih sa tơpôl, hơtŏk ‘lơ̆ng tơdrong arih sa kơ kon pơlei Việt Nam.

Ƀak si Hà Anh Đức, Chánh văn phòng, Anih tơm vei lăng găh jang pơgang, Kơdră Khŭl Thây pơgang mơlôh Việt Nam tơbăt:“Tơdrong khăm hơlen tôm, chă ƀôh hrôih, hơmet tơtom ‘noh gô tơgŭm ăn bơngai jĭ đe sư pơdui đei sơnăm arih sot, tơdrong arih sa păng hơtŏk ‘lơ̆ng păng kŭm tơgŭm tơjur kon jên mă tơpôl athei chĭu phŭ. Khŭl Thây pơgang mơlôh nhôn ‘meh tơlĕch ăn ‘noh jĭ athei đei 1 trong jang ‘lơ̆ng, tơgŭm ăn jĭ hơyơ mă jên hoach tŏ sĕt hloh, đei yua ‘lơ̆ng hloh, bơngai jĭ đei sa yua păng kang ƀô̆ jang pơgang kŭm jang ƀlep trong jang, chă ƀôh đei ƀlep bơngai jĭ vă ba năm hơmet tơtom.”

Tơdrong jang “Tơplih kơsô̆ yua kơ jơhngơ̆m pran tơsoh” khăm hơlen lăng tôm jĭ ung thư tơsoh tơ̆ 5 dêh char, pơlei tơm lơ̆m sơnăm 2023 păng 2024. Tơdrong jang tơlĕch ăn tơdrong tơm khăm hơlen lăng tôm đĕch hơmơt kơ jĭ ung thư tơsoh păng dôm tơdrong jĭ găh tơsoh nai ăn kơ hloh 50.000 ‘nu kon pơlei. Hơdrol ‘noh tơdrong jang hlôi đei tơlĕch jang tơ̆ pơlei tơm Hồ Chí Minh, hrei ‘nâu tơdrong jang hơnơ̆ng đei tơlĕch jang tơ̆ dôm pơlei tơm Hà Nội, Cần Thơ, Đà Nẵng păng dêh char Thừa Thiên Huế, hăm tơdrong vang jang đơ̆ng vă jê̆ 1000 y ƀak si.