Tŏk bŏk hơmet jĭ klak kră lơ̆m tơdrong jĭ hơ yô sĭk tơ̆ khoa Nội kơ Hnam pơgang apŭng Krông Búk, mŏ H’Pốc M’Jao, plei Adrơng Prong, xăh Cư Pơng, tơbăt, ‘nâu jĭ ‘măng mă 2 lơ̆m sơnăm ‘nâu sư athei ƀĭch tơ̆hnam pơgang. Pơđĭ 2 ‘măng sư ƀôh tôch kơ sơđơ̆ng ƀơ̆t đei đe y ƀak si tơ̆ âu vei lăng tơnăp:

“Ƀak si tôch kơ bơngơ̆t truh vei lăng bơngai jĭ. Hơmet tơ̆ âu ưh kơ athei bơngơ̆t tơtăm lơ. Dang ei ĭnh đĭ dă ƀiơ̆ lơ bơih.”

Tơ jê̆ giơng jĭ kơ mŏ H’pốc, ‘nhŏng Y Thế Niê, plei Ea Brơ, xăh Cư Pơng, apŭng Krông Búk, tŏk bŏk hơmet jĭ tơsoh. Sư đei jĭ đĭ vă jê̆ 1 khei, blŭng a ƀĭch tơ̆ hnam pơgang tơ̆ thị xã Buôn Hồ, đang kơ ‘noh apĭnh vih tơ̆ Hnam pơgang apŭng Krông Búk. Đơ̆ng rŏng 4 năr hơmet, tơdrong jĭ sư đĭ dă ƀiơ̆ hloi bơih.

“Tơ̆ âu ‘noh ‘yâu rơgoh, ƀak si hơmet tơnăp dêh, pơgang tôm ƀiơ̆ kơ ‘măng ƀĭch tơ̆ Hnam pơgang Buôn Hồ. Dang ei pran bơih, băt dơning brŏk tơ̆ hnam bơih rŏ.”

Kiơ̆ kơ ƀak si Y Păm Ayun, kơdră vei lăng khoa Nội, hnam pơgang apŭng Krông Búk, 2 khei kơ âu, ƀơ̆t Hnam pơgang hlôi jang đang tơdrong rơih iŏk bơngai răt tĕch pơgang, kơsô̆ bơngai jĭ truh tơ̆ khoa tŏk lơ, đei năr tôch kơ hrăt hrot:

“Đơ̆ng khei 4 truh khei 7 ‘noh ưh kơmăh pơgang, lơ bơngai jĭ năm khăm ưh kơđei pơgang đe sư năm hơnih nai. Mă lei đơ̆ng khei 9 khei 10 pơgang mah mai ‘noh đe sư năm tơ̆ âu. Pơtêng hăm tơdrong hơgăt blŭng sơnăm hăm kŏng suơ̆t Anih vei lăng jang pơgang pơjao ‘noh âu ki đei 1,2 năr ưh kơ ê tŏk lơ. Hmă hmă đe ăn kơ nhôn 25 giơng đĕch, mă lei đei dôm năr nhôn sơng iŏk 27 truh 28 tŏ giơng.”

Tơ̆ tơring păh tu dêh char Dak Lak, jô̆ păh lăp rim sơnăm, Hnam pơgang apŭng Krông Búk sơng iŏk păng hơmet dang 5.700 ‘nu bơngai jĭ. ‘Măng jĭ COVID-19 đei ƀôh, Hnam pơgang đei pơm iŏk vă hơmet ăn kơ hloh 3.500 ‘nu jĭ COVID -19 tơ̆ dôm apŭng Krông Búk, Buôn Hồ, Krông Năng păng Ea Hleo. Đơ̆ng rŏng kơ jĭ, kŭm nhen lơ anih jang pơgang tơring, Hnam pơgang bơ̆jang mơmat tat yua đơ̆ng ưh kơmăh pơgang păng tơmam jang pơgang. Mă lei, hăm dôm tơdrong hơdrin ưh kơ pơdơh, khei 9 âu ki, Krông Buk hlôi bơ̆jang kiơ̆ jơnei dôm tơdrong rơih iŏk bơngai răt tĕch pơgang, jĭ 1 lơ̆m kơsô̆ tŏ sĕt anih jang tơ̆ Dak Lak hơmet pơ ‘lơ̆ng mơmat tat đei ưh kơ măh pơgang păng tơmam jang pơgang pơyua ăn khăm hơmet jĭ. Ƀok Trần Thuận, Kơdră vei lăng Hnam pơgang apŭng Krông Búk tơbăt:

“Hnam pơgang kŭm tơlĕch ăn 1 trong vă jang, mă 1 ‘noh hơmet ming khŭl jang đơ̆ng kơ dih, mă 2 dơ̆ng ‘noh jĭ pơm liơ athei tôm pơgang, tơmam vă pơyua ăn kon pơlei, mă 3 dơ̆ng ‘noh jĭ hơdai hăm nhôn đei dôm grŭp năm tơpôl bơ̆jang hăm dôm xăh, pơlei ‘noh kiơ̆ lơ̆m noh nhôn tơgep roi tơƀôh ‘noh jĭ anih jang nhôn đĭ đei tôm dôm tơdrong hiôk vă vei lăng jơhngơ̆m pran lơ̆m tơring ‘noh kon pơlei đe sư gô truh hăm nhôn lơ hloh.”

Hăm tơdrong hơdrin, hơmet pơ ‘lơ̆ng mơmat tat đơ̆ng khŭl kang ƀô̆, y ƀak si, dôm sơnăm tơ jê̆ âu, tơdrong khăm, hơmet jĭ kơ Hnam pơgang apŭng Krông Búk roi ‘năr roi đei hơtŏk rơđăh ‘lơ̆ng, kơ sô̆ bơngai jĭ athei chơ tơ̆ hnam pơgang kơpal jur, bơngai jĭ truh roi ‘năr roi lơ. Hnam pơgang tơ găl ‘noh jĭ hơnih gơnang kơjăp vei lăng jơhngơ̆m pran ăn kon pơlei dôm hơdrĕch hơdrŭng lơ̆m tơring.