Jơnŭm Thâi pơgang mơlôh dêh char Đăk Lăk dang ei đei 16 khul vang jang hăm jê̆ 1.000 ‘nu bơngai jang noh đe y ƀak sih mơlôh tŏk bŏk oei pơm jang tơ̆ dôm hnam pơgang, anih jang pơgang hơmet jĭ jăn đơ̆ng dêh char truh tơ̆ apŭng păng dôm hnam pơgang tơ-‘ngla pơm tơm lơ̆m dêh char. Lơ̆m 5 sơnăm kơ âu, dôm jăl jơnŭm Thâi pơgang mơlôh lơ̆m dêh char đei lơ tơdrong jang ‘mêm bơnat vă vei lăng jơhngơ̆m jăn pran ăn kon pơlei nhen: pơgơ̆r 120 ‘măng khăm hơlen jơhngơ̆m jăn, asong pơgang ưh kơ iŏk jên ăn 86.000 măt kon pơlei hăm kơsô̆ jên hloh 4,2 tih hlj; pơhrăm dôm trong tơgŭm dŏng ăn kơ rơbâu bơngai pơtho tơ̆ dôm hnam trưng pơtho đe hơ-ioh, jăl kơđeh lơ̆m jâ̆p dêh char.
Lơ̆m jăl jang ‘nao, Jơnŭm Thâi pơgang mơlôh dêh char Đăk Lăk pơtoi chĕp vei sơnong jang hơbĕch kơ po kiơ̆ dôm tơdrong hŏk pơhrăm, hơtŏk pơ-‘lơ̆ng đon bơnôh, hơbĕch lơ̆m tơdrong hơlen khua hŏk păng hơtŏk pran tơdrong jang ‘mêm bơnat vă vei lăng jơhngơ̆m jăn pran ăn kon pơlei.
Viết bình luận