Jĭ 1 lơ̆m dôm ‘nu bơngai jĭ ‘nao đei tơgep plei lĕn tơ̆ Hnam pơgang Trung ương 103 Khul linh Lào, ƀok Vanxay Lixayalath, 58 sơnăm tơ̆ dêh char Savannakhet ưh kĕ ôn tơdrong hơiă đơ̆ng rŏng kơ răih tơgep plei lĕn yoa đe y, ƀak si Việt Nam păng Lào vang răih hơmet ăn. Ƀok Vanxay tơroi, 5 sơnăm adrol sơ̆, ƀok băt kơdih kâu jĭ plei lĕn păng lăp đơ̆ng rŏng 2 sơnăm đĕch ƀok athei hlŏng pham hăm kơmăy.

Sơnăm sơ̆, ƀok năm truh tơ̆ Hnam pơgang Trung ương 103 Khul linh Lào chih măt khăm păng tơgep plei lĕn: “Adrol kơ răih, inh ƀôh lơ̆m hơkâu tôch kơlap, sŏng xa kiơ luăn kŭm tôch mơmat păng jơ̆ng ti jĭ đĭ, hơâm hơăm mă lei đơ̆ng rŏng kơ đe ƀak si tơ̆ âu răih hơmet inh ƀôh tôch kơ hiôk.”

Kŭm nhen ƀok Vanxay mơ̆n, ‘nhŏng Sangthong Keomonasi, 32 sơnăm tơ̆ anih tơm Vientiane tôch kơ hơiă mưh tơroi dơ̆ng tơdrong tơchă tơdrong arih đơ̆ng kơdih kâu hăm lơ tơdrong pŭn ai. ‘Nhŏng Sangthong pơma: Đunh kơ âu dang 5 sơnăm, ‘nhŏng ƀôh tôch lap, yoa lăng pơhơi, ngeh kơdih kâu jĭ hmă đĕch kơna ưh kơ đei năm khăm, mă năm răt pơgang pran huch kơdih. Ƀât ƀôh jĭ ưh kơ đei da ƀiơ̆ ‘nŏh, ‘nhŏng năm khăm tơ̆ hnam pơgang, ‘nŏh băt kơdih kâu jĭ plei lĕn ăl jăl hơtuch. Kơplăh âu, ‘nhŏng tôch sơ ‘ngon yoa rim tơdrong ‘meh vă đơ̆ng ‘nhŏng păng unh hnam athei ming lê̆ tơ̆ rŏng ‘mơ̆i vă hơmet jĭ hơdrol. Păng tơdrong pŭn ai hlôi truh hăm ‘nhŏng mưh băt Hnam pơgang Trung ương Khul linh 103 Lào oei jang hơdoi hăm Hnam pơgang Quân y 103 kơ Việt Nam gơh răih tơgep jĭ plei lĕn: “Adrol kơ răih inh athei hlŏng pham 3 ‘măng 1 giĕng. Dang ei inh ƀôh nhen thoi đei dơ̆ng tơdrong arih ‘nao.”

Dang ei đĭ đăng bơngai jĭ đơ̆ng rŏng kơ răih tơgep đei jơhngâm pran ‘lơ̆ng ngăl, set hơlen bơ̆n pham, đak hơyô đei ƀôh tơplih ‘lơ̆ng, 1 kơsô̆ bơngai jĭ gơ̆h choh jang thoi đêl dơ̆ng. Đại tá Savengxay Dalasath, Kơdră chĕp kơ̆l Hnam pơgang Trung ương 103 Khul linh kon pơlei Lào ăn tơbăt, tơdrong răih tơgep đei plei lĕn đơ̆ng bơngai plang pơyơ̆r plei lĕn tơ̆ Lào ưh lăp chih tơbăt tơdrong jang tŏk pran, gơ̆h hơgei đơ̆ng hnam pơgang đĕch, mă oei jing hơyak tŏk gĭt kăl hăm anih jang pơgang kơ teh đak Lào dơ̆ng:

“Tơdrong răih, tơgep đei plei lĕn ăn dôm bơngai jĭ ‘măng mă âu, tơdăh ưh đei tơdrong tơgŭm đơ̆ng đe y, ƀak si Quân y Việt Nam ‘nŏh nhôn jang ưh kơ gơh ôh. Inh hơmĕng tơ̆ hơnăp ning mônh, 2 hnam pơgang, 2 khul linh roi đunh roi đei lơ hơyak tŏk pran ‘lơ̆ng hlŏh dơ̆ng găh tơdrong khăm hơmet jĭ.”

Tơdrong jang hơdoi vang răih tơgep plei lĕn đei 2 Hnam pơgang Khul linh 103 kơ 2 teh đak tơlĕch đơ̆ng sơnăm 2018. Truh dang ei, 2 păh jang hơdoi vang răih tơgep ăn 9 ‘nu bơngai jĭ tơ̆ hnam pơgang Trung ương Khul linh 103 Lào. Găh Việt Nam hơmmet khul bơngai jang, tơmam kơmăy kơmŏk, pơgang tơgŭm, oei hnam pơgang Lào ‘nŏh hơmet anih răih, anih hơmet jĭ đơ̆ng rŏng kơ răih, pơjing khul pơgơ̆r jang, dôm khul pơvih pơvăn, pơtâp pơhrăm kiơ̆ tơdrong hơgăt đei Việt Nam pơtho tơƀôh.

PGS. TS Vũ Nhất Định, Phŏ Kơdră chĕp kơ̆l Hnam pơgang Quân y 103 tơroi, hăm tơdrong pơtho tơƀôh đơ̆ng dôm bơngai juăt jang păih Việt Nam, đe ƀak si tơ̆ Hnam pơgang Trung ương 103 Lào dar dĕh hŏk iŏk đei 1,2 ki thuơ̆t jang mưh răih tơgep plei lĕn kŭm nhen dôm trong khăm hơlen năng bơngai jĭ đơ̆ng rŏng kơ tơgep păng tơdra hơdrol rim tơdrong hơmơt đei: “Tơdrong tơgŭm ăn boăl ki thuơ̆t răih tơgep plei lĕn tơ̆ Lào ‘nŏh jĭ 1 tơdrong pơm pơ ‘lơ̆ng hlŏh dơ̆ng tơdrong tơguăt 1 ƀơ̆r đon đơ̆ng 2 teh đak, đơ̆ng 2 khul linh păng dôm hơdrĕch hơdrung Lào. Inh tơchĕng, ‘nâu jĭ tơdrong jang pơtrơp kiơ̆ chăl mĕ ƀă, yă ƀok sơ̆ păng tơtă ăn kơ rim jơhnơr đơ̆ng rŏng athei hơnơ̆ng chĕp vei kơjăp tơdrong pơvei Việt – Lào ‘lơ̆ng hơiă đơ̆ng sơ̆.”

Kiơ̆ trong vă jang, lơ̆m sơnăm ‘nâu, Hnam pơgang Quân y 103 Việt Nam vă hơnơ̆ng ăn bơngai juăt jang năm jang hơdoi, tơgŭm ăn Hnam pơgang Trung ương 103 Khul linh Lào răih tơgep plei lĕn ăn đơ̆ng 10 - 20 ‘nu bơngai. Hơdai hăm ‘nŏh, Hnam pơgang Trung ương 103 Khul linh Lào vă adrin truh sơnăm 2025 hŏk đei tôm ki thuơ̆t răih tơgep plei lĕn, kiơ̆ đơ̆ng noh vang tơgop pơm hơtŏk tơdrong jang vei lăng jơhngâm pran ăn đĭ đăng kon pơlei dang ei hăm dôm teh đak lơ̆m tơring păng lơ̆m apŭng plenh teh.