Tŏk bŏk tơ-oei gô pơm hla bar khăm jĭ tơ̆ Hnam pơgang Măt dêh char Đăk Lăk, oh Tôn Nữ Yến Nhi, hŏk lăm 11, tơ̆ trưng PTTH Ea H’Leo, apŭng Ea H’Leo ăn tơbăt, lơ̆m lăm đei lơ boăl jĭ măt păng apinh pơdơh hŏk, kơdih inh noh 3 năr kơ âu, răt pơgang kơtoh măt mă lei ưh kơ da ƀiơ̆ noh athei năm truh hnam pơgang: “Ah iung đơ̆ng tep noh ƀôh măt tơklep dih băl, ưh kơ hiôk ôh. ‘Năr âu inh truh khăm noh ƀak sih athei inh kơtoh đak pơgang minh ƀar năr gô da ƀiơ̆ păng athei yua kơdih dôm tơmam drăm kăl, ưh đei yua atŭm lơ̆m hnam”

Hăm hloh 800 hŏk tro tŏk bŏk oei hŏk, đơ̆ng rŏng kơ ‘năr lêh mơ̆t sơnăm hŏk ‘nao, hnam trưng jăl kơ đeh Lý Tự Trọng, pơlei tơm Buôn Ma Thuột hlôi đei 156 hŏk tro pơdơh hŏk kơyuơ jĭ măt brê. Đơ̆ng năr 11/9 truh dang ei hnam trưng đei 139 oh jĭ măt brê păng tong anê̆ lơ̆m kơsô̆ noh oei năm hŏk sơđơ̆ng. Duch pơtho Lương Thị Bích Nguyên, Kơdră hnam trưng ăn tơbăt, lơ hŏk tro jĭ măt mă lei adoi oei năm hŏk noh hăp pơm tơpoh tenh hloh. Hnam trưng pơgơ̆r anih jang pơgang hơmet pơgang vă kơtoh tenh kuăng mưh băt đei hŏk tro jĭ măt; chă hơpuih hơmet rơgoh lăm hŏk đơ̆ng rŏng rim ‘măng hŏk; atŭm hăm noh tơroi kơ mĕ ƀă hŏk tro ah jĭ măt noh athei hơmet mă klaih hloi tang găn đei tơdrong tơpoh dih băl: “Đei mĕ ƀă hŏk tro kơlih tơnap năm jang tơ̆ ataih noh lê̆ kon tơ̆ hnam ưh đei hiôk noh đe sư lê̆ kon năm hŏk tơ̆ trưng, thoi noh tơdrong tơpoh lơ̆m hnam trưng roi tenh kuăng hloh, mă nhôn hlôi đei trong nhen athei đe oh truơ̆ pơnĭl vă tang găn, athei pơ-‘nguaih lăm hŏk, vei sơgaih kơdih hơkâu jăn păng pơtho đe oh ôp măt thoi yơ vă kơ ‘lơ̆ng”

Hnam trưng Mâm non Hoa Lan, phương Tân Tiến, pơlei tơm Buôn Ma Thuột đei 2 hnam trưng, hăm pơhlom 200 ‘nu hơ-ioh oei hŏk tơ̆ 10 lăm. Adrol kơ noh dang 1 khei, hnam trưng đei minh ƀar ‘nu hơ-ioh đĕch jĭ măt, mă lei dang ei kơsô̆ hơ-ioh jĭ măt tŏk truh 20 ‘nu.

Duch pơtho Lê Thị Liên, kơdră hnam trưng Mâm non Hoa Lan ăn tơbăt, dang ei hnam trưng oei hơtŏk pran tơdrong tơroi tơbăt păng pơtho ăn bơngai pơtho, hŏk tro pơm kiơ̆ tơnăp tơdrong tang găn păng hơmet jĭ kiơ̆ anih jang pơgang hơmet jĭ jăn: “Tơdrong jang vei sơgaih lơ̆m hnam trưng athei sơkơ̆t mă blŭng. Mă mônh noh tơmam ăn đe hơ-ioh ngôi pơchơt noh athei yua hơdrô̆; mă 2 noh dôm tơmam yua lơ̆m lăm duch pơtho athei ôp mă rơgoh  tong hăm đak pơgang; mă 3 noh pơtho ăn đe mon ôp ti mă trŏ. Ah ƀôh đei mon jĭ măt noh athei jang hăm anih jang pơgang păng mĕ ƀă hŏk tro vă cha ưhơmet jĭ ăn hơ-ioh”

Kiơ̆ ƀak sih Lê Dương Thùy Linh, Phŏ Kơdră Hnam pơgang Măt Đăk Lăk, jĭ măt brê tơ̆ Đăk Lăk đei ƀôh rah rai đơ̆ng khei 8. Mă lei lơ̆m 2 giĕng kơ âu, đei ƀôh lơ bơngai ƀơm jĭ hloh. Dang ei lơ̆m 1 năr, Hnam pơgang khăm ăn đơ̆ng 200 -300 ‘nu bơngai jĭ măt, mă lơ noh hŏk tro. Ƀak sih Linh ăn tơbăt, jĭ măt brê hơnơ̆ng tơpoh kiơ̆ trong tơprah đak hai, đak măt, ĭch măt kơ bơngai jĭ dah mă kiơ̆ tơmam yua, kơn kơ bơngai jĭ, mă hăt noh lơ̆m dơnâu đak glơi: “Pơrang sơnăm âu noh hlăm, ‘nguaih kơ jĭ brê lơ̆m lăm noh  virus pơrăm truh tơ̆ ngai măt noh hăp pơm ăn măt ưh gan bang hơdah, minh ƀar bơngai jĭ kơdih răt pơgang kơtoh noh pơm ăn kơ măt jing rơka. Atŭm hăm noh ah ƀơm virus ‘noh pơm ăn bơngai jĭ măt pơlŏ, pơm jĭ truh tơ̆ trong dui jơhngơ̆m, jĭ klak hloi. Dang ei tam mă đei vaccine bơ̆ng jĭ păng adoi ưh đei pơgang kơtoh vă bơ̆ng jĭ, kơyuơ noh mih ma duch nă nĕ kơdih chă răt pơgang, mưh ƀơm jĭ athei năm truh hnam pơgang hơmet Jĭ măt vă chă khăm păng đei trong hơmet trŏ ƀlep”

Adoi kiơ̆ đe ƀak sih, jĭ măt brê jing tơdrong jĭ ưh đei pơdui đunh, lơ̆m minh truh 2 giĕng noh klaih; mưh jĭ ăl noh lơ̆m 1 khei. Mă lei, mưh hơmet hrôih păng trŏ trong tơchơ̆t noh jĭ gô tenh klaih păng ưh đei ƀơm tơdrong răm kiơ đơ̆ng rŏng kơnh.