Mŏ Phan Thị Bích Thảo, oei tơ̆ thị trấn Ia Kha, apŭng Ia Grai, dêh char Gia Lai đei kon ‘lơ̆p 3 sơnăm đei ƀôh yuh dêh, pă kĕ iung kơ na ŭnh hnam ăn mon ƀĭch tơ̆ hnam pơgang Hơmet hơioh jĭ Gia Lai vă hơmet. Mă lei, đơ̆ng rŏng ‘noh mon roi jĭ dêh tôch kơ hrĕnh kơ na athei chơ hơmet tơ̆ Hnam pơgang Đa khoa tơring Tây Nguyên, dêh char Dak Lak. Đơ̆ng rŏng 8 năr hơmet, truh dang ei mon hlôi ƀôh ‘lơ̆ng, jơhngơ̆m jăn tŏk bŏk vă prăih bơih. Ƀlŏk dơ̆ng ƀơ̆t blŭng a ba kon năm hơmet, mŏ Thảo tam mă đĭ hli tơ rơ: “Mon năm tơ̆ âu hăm jĭ jơ̆ng ti ƀơ̆r độ 3, mon đei dui jơhngơ̆m pă kĕ bơih, hơkâu brơ̆p đĭ bơih, hơ răng đĭ bơih. Năm tơ̆ âu đei ƀak si tơgŭm hơmet tơtom. Pơma atŭm ‘noh kon ĭnh dang ei hoei pă krê hơmơt bơ̆ih. Ĭnh ƀôh krê hơmơt dêh, kon ĭnh sư tơplih tôch kơ hrĕnh păng ưh kơ đei ƀôh lĕch hmrŏng hmrônh tơ̆ jơ̆ng ti kiơ hloi, mon lăp đei yuh đĕch păng rơka ƀơ̆r.”

Kŭm đei kon jĭ jơ̆ng ti ƀơ̆r dêh tŏk bŏk hơmet tơ̆ Khoa hơmet hơioh jĭ dêh - Nge ‘nao rơ neh Hnam pơgang Đa khoa tơring Tây Nguyên, mŏ Hồ Thị Phượng oei tơ̆ phường Thống Nhất, thị xã Buôn Hồ, dêh char Dak Lak oei tam mă đĭ hli bơngơ̆t ƀơ̆t kon tơplih jĭ dêh. Mŏ Phượng tơbăt, hơdrol sơ̆ mon ‘lŏ sư hlôi đei jĭ jơ̆ng ti ƀơ̆r mă lei jĭ lăp ai, lăp lĕch tŏ sĕt hmrŏng hmrônh tơ̆ jơ̆ng, ti, tơ̆ hnam pik pơgang ‘noh klăih kơdih kơna ƀơ̆t mon mă 2 jĭ, ŭnh hnam kŭm pơm pơ hơi: “Mon kơdră kŭm năm tơ̆ ƀak si kơdih huch pơgang đei 2 năr ‘noh klăih, ƀơ̆t hơdrol sơ̆ ‘noh dă ƀiơ̆ ƀiơ̆, dang ei ‘noh dêh hloh kơ hơdrol sơ̆. Ƀôh tôch kơ krê hơ mơt, hli kơ ƀơm ưh kơ ‘lơ̆ng truh tơ̆ ‘ngok, tơdăh ưh kơ chơ tơ̆ hnam pơgang tơtom rŏ lăng ‘noh pă kĕ bơih.”

Tŏk bŏk vei lăng kon drŏ kăn 16 khei tơ̆ Khoa hơmet hơioh jĭ akŏm Hnam pơgang Đa khoa tơring Tây Nguyên, mŏ Huỳnh Thị An oei tơ̆ xăh Cư M’lan, apŭng Ea Súp, dêh char Dak Lak tơbăt, đunh kơ âu dang 1 giĕng, mŏ ƀôh kon sư hiĕn lơ, lap rơ mơ̆n, yuh dêh păng tơ̆ tơpang ti, jơ̆ng đei lĕch hmrŏng hmrônh kơ na ba năm khăm. Ƀak si akhan mon đei jĭ jơ̆ng ti ƀơ̆r. Đơ̆ng rŏng 3 năr hơmet tơ̆ hnam ưh kơ klăih, ŭnh hnam hlôi ba mon năm tơ̆ Hnam pơgang đa khoa tơring Tây Nguyên: “Ƀơ̆t mơ̆t tơ̆ âu hmrŏng hmrônh sư lĕch lơ tơ̆ 2 tơpang jơ̆ng đang kơ ‘noh lanh tŏ sĕt tơ̆ tơpang ti dơ̆ng. Ĭnh kŭm ưh kơ đei hlôh vao găh jĭ jơ̆ng ti ƀơ̆r kơna tơ̆ hnam tơmam pơ ngôi ‘noh ăn kon pơ ngôi loh đĕch kŭm ưh kơ tơ chĕng pơyan ‘nâu sư đei ƀôh tơdrong jĭ ‘nâu.”

Kiơ̆ kơ ƀak si Huỳnh Thị Bích Như, Khoa hơmet hơioh jĭ akŏm, Hnam pơgang Đa khoa tơring Tây Nguyên, đơ̆ng blŭng sơnăm truh dang ei, khoa hlôi sơng iŏk, hơmet ăn kơ hloh 85 ‘nu hơioh jĭ jơ̆ng ti ƀơ̆r. Kăl kơ lăng truh lơ̆m dang 1 khei kơ âu kơ sô̆ bơngai ƀĭch tơ̆ hnam pơgang tŏk lơ. Dang ei khoa tŏk bŏk hơmet ăn 15 ‘nu jĭ jơ̆ng ti ƀơ̆r, lơ̆m noh, đei 2 ‘nu jĭ dêh. Ƀak si Huỳnh Thị Bích Như pơtho tơƀôh: “Bơ̆n tang găn hăm trong hơtŏk ‘lơ̆ng jơhngơ̆m pran ăn kơ kon, sa tôm kơ chơ̆r bek ‘lơ̆ng, nhă tôm đak đang kơ ‘noh gơh tơmơ̆t dơ̆ng dôm vitamin vă hơ tŏk jơhngơ̆m pran ăn kơ kon păng bơ̆n kăl kơ ƀet dôm jrŭm vắc xin tang găn jĭ hơnơ̆k păng pơtho ăn kơ kon pơm rơ goh ti yua kơ jĭ jơ̆ng ti ƀơ̆r bơ̆n pơm rơgoh sư kŭm dă ƀiơ̆ kơ tơpoh lanh.”

Lăp jô̆ hơdrô̆ tơ̆ Khoa hơmet hơioh jĭ dêh - Nge ‘nao rơneh, Hnam pơgang Đa khoa tơring Tây Nguyên, đơ̆ng blŭng sơnăm truh dang ei, Khoa hlôi sơng iŏk păng hơmet ăn kơ 4 ‘nu hơioh jĭ jơ̆ng ti ƀơ̆r dêh păng tôch kơ dêh, tŏk 100% pơ têng hăm khei ‘nâu sơnăm hơdrol. Ƀak si chuyên khoa II Hoàng Ngọc Anh Tuấn, Kơdră Khoa hơmet hơioh jĭ dêh păng Nge ‘nao rơneh tơbăt, dôm sơnăm hơdrol jĭ jơ̆ng ti ƀơ̆r ưh kơ gan đei bơngai jĭ dêh, mă lei sơnăm ‘nâu kơ sô̆ bơngai jĭ dêh tŏk, bơngai jĭ tơplih jĭ dêh tôch kơ hrĕnh, đei ƀôh ưh kơ ê kơna đe y ƀak si tơ̆ Khoa athei răp hơlen hơnơ̆ng jơhngơ̆m jăn rim hơioh vă hơmet pơ ‘lơ̆ng tơtom: “Hăm jĭ jơ̆ng ti ƀơ̆r ‘noh athei tơ roi truh jơ ‘nâu kŭm ưh kơ gơh pơm pơ hơi. Ĭnh tơ tă ‘noh ‘ngoăih kơ tơdrong tang găn hơdrol nhen dôm tơdrong găh sŏng sa, dôm tơdrong găh vei sơđơ̆ng rơgoh, vei sơđơ̆ng cham char ‘noh đe mĕ ƀă kăl kơ băt akhan mưh hơioh đei rơ ka tơ̆ ƀơ̆r, ưh lŭ sŏng sa dăh mă hơioh yuh dăh mă lơ̆m hơ kâu hơ ioh lĕch hmrŏng mhrônh ‘noh năm tơ̆ hnam pơgang tơ jê̆ hloh vă đei bơngai jang pơgang pơtho tơƀôh vă đei trong hơmet, vei lăng.”

Kiơ̆ tơ roi tơbăt đơ̆ng Anih vei lăng tơdrong jĭ jăn dêh char Dak Lak, đơ̆ng blŭng sơnăm truh dang ei, lơ̆m dêh char đei 158 ‘nu jĭ jơ̆ng ti ƀơ̆r, lơ̆m noh đei 1 ‘nu lôch. Kăl kơ lăng truh kơ sô̆ hơioh đei jĭ jơ̆ng ti ƀơ̆r jing dêh đei ƀôh tŏk pơ têng hăm dôm sơnăm hơdrol.