Chơ Chun jĭ xăh sơlam tôch kơ mơ mat tat kơ apŭng groi kông Nam Giang, dêh char Quảng Nam. Xăh âu đei 3 pơlei hăm vă jê̆ 250 ŭnh hnam kon pơlei, găh lơ ‘noh kon pơlei bơngai Cơ Tu. Băt kơ tơ̆ng đei Lĭnh jang pơgang kơ ƀô̆ đô̆i vei lăng tơring sơlam Quảng Nam pơgơ̆r khăm jĭ păng asong đĕch pơgang tơ̆ xăh Chơ Chun, đơ̆ng pơgê hrôih, ƀok A Viết Mư păng kon pơlei plei Blăng, xăh Chơ Chun, apŭng Nam Giang hlôi yak trong hơtăih hơ tŏ vă đei măt tơ̆ hơnih khăm jĭ, Ƀok tơroi: “Hmă hmă ‘meh năm khăm jĭ ‘noh athei jur tơ̆ dôm hnam pơgang pơlei tơm Đà Nẵng dăh mă apŭng Đại Lộc, dêh char Quảng Nam, mă lei nhôn ‘noh ưh kơ đei jên, ưh kơ đei gre, ưh kơ gơh jur khăm. Năr ‘nâu đei ‘nhŏng ƀô̆ đô̆i năm khăm ăn kơ kon pơlei tơring sơlam, ĭnh kŭm sơđơ̆ng jơhngơ̆m bơih.”

‘Ngoăih kơ khăm hơlen tôm păng asong pơgang đĕch ăn kon pơlei, đe y ƀak si Lĭnh jang pơgang kơ ƀô̆ đô̆i vei lăng tơring sơlam Quảng Nam oei hơnhăk ba dôm tơmam pơgang ‘nao vă gơh khăm păng chă ƀôh dôm tơdrong jĭ mă kon pơlei tơring rgoi kông đa ƀơm jĭ nhen trong klak, dui jơhngơ̆m, plei nuih, kơ̆l ‘ngok, jĭ kơ ting.... Đơ̆ng noh roi tơƀôh ăn kon pơlei trong hơmet lăp, tơroi tơbăt, pơtho kon pơlei vei rơgoh cham char, tang găn dôm tơdrong jĭ tơpoh. Ƀok Riah Pêl, Kơdră Anih vei lăng kon pơlei xăh Chơ Chun, apŭng Nam Giang tơbăt, khei ‘năr âu ki kon pơlei tơring ƀrư̆ ƀrư̆ hŭt lê̆ dôm tơdrong joăt so ưh kơ ‘lơ̆ng, ưh pă lui lơ̆m bok pơjâu mưh đei jĭ jăn, rơneh kon....“Tơdrong ‘nâu pơm tôch kơ hiôk ăn kơ dôm bơngai jĭ lơ̆m xăh. Mĭnh ƀar ‘nu bơngai jĭ dêh ‘noh băt đei tơdrong jĭ păng năm tơ̆ hnam pơgang kơ pal.”

Rim sơnăm, đe thây pơgang hơnhăk grat jơk hlôi truh tơ̆ rim pơlei hơtăih hơtŏ hloh tơ̆ tơring sơlam Việt – Lào vă pơgơ̆r lơ ‘măng khăm hơmet jĭ ăn kon pơlei. Đe sư ưh khan lăp dŏng hơmet jĭ tơtom lơ bơngai jĭ dêh, mă oei tơgŭm ăn kon pơlei tơring groi kông Quảng Nam păng kon pơlei dêh char Sê Kông, teh đak buăl Lào đei tơdrong hiôk gơh hơmet jĭ hăm dôm kơ loăi pơvih pơvăn pơgang ‘nao. Lĭnh jang pơgang kơ Ƀô̆ đô̆i vei lăng tơring sơlam oei pơgơ̆r tơroi tơbăt tơdrong hlôh vao găh tang găn jĭ nhen pơ lŏ sôt ret, jĭ jơ̆ng ti ƀơ̆r, pơ lŏ lĕch đe... Đe y ƀak si ling lang đĭ jơhngơ̆m, kon pơlei truh ‘noh vei lăng, khăm hơmet jĭ, ưh kơ lê̆ ăn kon pơlei gô đunh, vă kon pơlei năm jang. Thượng tá, Ƀak si Lê Đức Mạnh, Kơdră vei lăng Lĭnh jang pơgang kơ Ƀô̆ đô̆i vei lăng tơring sơlam dêh char Quảng Nam tơbăt, lơ bơngai đei chă ƀôh jĭ păng hơmet tơtom, kon pơlei ƀrư̆ ƀrư̆ hŭt lê̆ tơdrong joăt so ưh kơ ‘lơ̆ng: “‘Moi kiơ̆ dôm tơdrong jang hơnơ̆ng nhen thoi ‘nâu, hlôi tơgŭm khŭl ƀô̆ đô̆i vei lăng tơring sơlam dêh char Quảng Nam pơjing tơdrong 1 jơhngơ̆m đon tơklep hăm kon pơlei tơring sơlam. Đơ̆ng âu, kon pơlei roi lui ngeh lơ̆m Ƀô̆ đô̆i vei lăng tơring sơlam, tơgop vei lăng kơ jăp tơdrong pơm tơm tơring sơlam teh đak.”

Đại tá Hoàng Văn Mẫn, Chính ủy Anih tơm pơgơ̆r ƀô̆ đô̆i vei lăng tơring sơlam dêh char Quảng Nam tơbăt, sơnăm sơ̆, ƀlep ƀơ̆t tơbăt 60 sơnăm Việt Nam - Lào pơjing tơdrong pơvei jang tơbôl păng 45 sơnăm năr Kiơ̆ tơchơ̆t tơbôl păng jang hơdai Việt Nam – Lào, Khŭl hơdruh tơdăm Hnam pơgang 199 (Anih tơm vei lăng Kŏng an) jang hơdai hăm Anih mơdro sa tơpôl Phúc Vạn Phúc păng Kơđông lĭnh vei lăng ‘măng jang sơlam Nam Giang, dêh char Quảng Nam hlôi pơgơ̆r tơdrong jang “Kơchơ tĕch tơmam ưh kơ hoach jên Việt - Lào”, hơdai hăm khăm jơhngơ̆m pran, asong đĕch pơgang ăn kon pơlei bơngai Lào tơ̆ ‘măng jang sơlam Nam Giang, dêh char Quảng Nam. Đe y ƀak si Hnam pơgang 199, Anih tơm vei lăng Kŏng an oei tơ̆ pơlei tơm Đà Nẵng jang hơdai hăm jơhngơ̆m pran, roi tơƀôh păng asong đĕch pơgang ăn kơ đĭ đăng dôm kon pơlei vang jang tơdrong jang. Đại tá Hoàng Văn Mẫn, Chính ủy Anih tơm pơgơ̆r Ƀô̆ đô̆i vei lăng tơring sơlam dêh char Quảng Nam pơma hơdăh: “Lơ̆m tơdrong pơvei tơbôl Việt Nam- Lào pơma atŭm păng Quảng Nam- Sê Kong pơma hơdrô̆ gơh tơ roi ‘noh jĭ tôch kơ ‘lơ̆ng. Nhôn ling lang hơtŏk đei tơdrong joăt ‘noh vang hơdai băl pơjing tơdrong pơvei 1 jơhngơ̆m đon 2 păh tơring sơlam roi ‘năr roi tơbôl, jang hơdai păng ‘lơ̆ng gĭt kăl.”

Tơ̆ “Kơ chơ tĕch tơmam ưh kơ hoach jên Việt – Lào”, dôm anih mơdro sa vang yak hơdai, Ƀô̆ đô̆i vei lăng tơring sơlam dêh char Quảng Nam, Kơ đông lĭnh vei lăng ‘măng jang sơlam Nam Giang pơjao asong 700 tơpu tơmam. 1 tơpu đei kơjă 300 rơbâu hlak jên, ‘noh đei bơ̆n phe, tơmam sa, hơbăn ao... asong ăn kon pơlei dôm hơdrĕch Lào tơ̆ apŭng Đắk Chưng, dêh char Sê Kong (Lào) arih tơ jê̆ tơring sơlam Việt- Lào đei tơdrong arih sa mơmat tat.