Roi tơbăt âu đei tơroi ăn tơ̆ hop akŏm pơtôch 10 sơnăm bơ̆ jang kiơ̆ Tơdrong tơchơ̆t 05 đơ̆ng Anih tơm Chĭnh trĭ păng pơtôch tơdrong jang hơlen lăng, dăr lăng, ki luơ̆t đảng jăl jang 2020-2025 yua đơ̆ng Anih jang Đảng dêh char Lâm Đồng pơgơ̆r. Hăm jơhngơ̆m đon ưh kơ đei tơring kơ̆m, ưh kơ lê̆ lon bu, jăl jang 2020-2025, Anih jang Đảng, Khŭl chĕp kơ̆l pơgơ̆r Đảng dêh char, kơdră đảng, anih hơlen lăng rim tơring kơ dêh char Lâm Đồng hlôi akŏm chĕp kơ̆l, pơgơ̆r bơ̆jang kiơ̆ kơtang tơdrong jang hơlen lăng, dăr lăng păng ki luơ̆t kơ Đảng.

Tơdrong sek phak kơtang dôm đảng viên pơm glăi hlôi hơnhăk ăn đei yua ‘lơ̆ng lơ̆m tơdrong jang pơtho pơhrăm, tang găn pơm glăi đơ̆ng khŭl jang đảng păng kang ƀô̆, đảng viên. Mă lei, ƀok Y Thanh Hà Niê Kđăm, Bí thư Đảng dêh char Lâm Đồng akhan, 1,2 ‘măng hơlen lăng, dăr lăng oei atŭm atŭm, ưh kơ tơƀôh ăn đei dôm tơdrong tam mă ‘lơ̆ng, pơm glăi vă hơmet ming, hơnhăk truh iŏk yua tam mă ‘lơ̆ng; athei rim kơdră đảng, khŭl jang đảng tơpăt lăng kiơ̆, tơtĕnh tơlĕch ăn dôm trong jang hơmet ming pơ ‘lơ̆ng tơ̆ hơnăp kơnh.