Vă iŏk đei rim trong tơlĕch jang, rim hơnih tơm, hơnih bơ̆ jang athei tơlĕch hloi mĭnh ƀar tơdrong jang nhen: tơlĕch kon jên jang 100% trong vă jang kon jên teh đak tơmơ̆t jang hlôi đei pơjao; hơnơ̆ng tơlĕch jang kiơ̆ Tơdrong tơchơ̆t 68 đơ̆ng Hơnih tơm Chinh trĭ găh atŏk tơ iung mŭk drăm ŭnh hnam; chĕp pơgơ̆r trong bơ̆ jang jên hu ‘lơ̆ng hơ iă, tơtom, jơnei; hơmet pơ ‘lơ̆ng rim tơdrong vă jang iung jang tim mă keh đang; hơdrin truh đĭ sơnăm 2025 ming man keh đang 100.000 pơbŭng hnam oei tơpôl, 3.000 km trong gre rĕnh păng tơlĕch ăn trong vă hơmet ming rim Khôi luơ̆t, lơ̆m ou đei Khôi luơ̆t groi teh ... Pơma pơtôch hop akŏm, Thủ tướng pơma tơbăt hơdăh 16 tơdrong jang kăl hloh. Thủ tướng athei pơ đĭ khul chinh trĭ kăl iung jang hăm hơnăp jang kơtang, kơrŭn đĭ ai, iung jang kơtang, iŏk đei jơnei, jang yă kiơ keh đang yă ‘noh. Hơnih mong jên teh đak pơrô̆ pơgơ̆r pơm sơđơ̆ng kơjă, hơdrin hơnơ̆ng pơm tơjur kon jên cheh, tơgŭm djru choh jang sa pơm tơlĕch tĕch mơdro păng tơdrong jang sa ăn kon pơlei. Rim tơring jang kiơ̆ ‘lơ̆ng trong tơlĕch jang hơ iă, tơchăr hơgei, akŏm xut xa hnam pơgia, hnam hnăt hnot lơ̆m teh đak hơdrol năr 31/8.