Kiơ̆ trong pơprŏ jang, pơgê năr 19/8, dêh char Gia Lai iung jang Tơdrong vă jang tơmơ̆t jên jang ming man trong gre păr kơsô̆ 2 păng rim hơnih jang lơ̆m Cham gre păr Phù Cát. Hơnih jang ou đei kon jên tơmơ̆t jang hloh 3.200 ti hlak jên, iung jang đơ̆ng sơnăm 2025 truh sơnăm 2028 vă pơm hơtŏk jang ‘lơ̆ng, trŏ lăp hơ iă ăn gre păr hle, pơjing hơyak pran atŏk tơ iung mŭk drăm-tơpôl tơring. Atŭm lơ̆m năr, dêh char Gia Lai gô et hơtŏk Jăl trong ver găh Pơbăh thĭ trân Phú Phong (dang ei ‘noh tơring Tây Sơn) hơtăih vă jê̆ 18km, kon jên tơmơ̆t jang vă jê̆ 800 ti hlak jên, iung jang đơ̆ng khei 8/2022; et hơtŏk Jăl trong Tơƀưh trong tơm 638 truh tơ̆ trong tơter đak dơsĭ (ĐT.639), hơtăih hloh 19 km, akŏp kon jên jang 800 ti hlak jên. Ƀar tơdrong jang trong nơnăm ou tơgŭm pơm sơđơ̆ng ăn Trong glung 19, pơm jăl trong nơnăm chơ tơmam drăm, pơtrŭt kơtang tơgoăt tơring, atŏk tơ iung tơmang pơhiơ̆; adoi tơgop vei lăng hnam oei, mŭk drăm kơ kon pơlei lơ̆m pơyan ‘mi kial hơbŭt hơbông.