Hop akŏm vă pơma nuh, set hơlen, tơchơ̆t lơ tơdrong gĭt kăl nhen: hơmet ming trong tơmât jên jang đơ̆ng teh đak, chih tơlĕch dơ̆ng jên vă tơlĕch jang ăn dôm tơdrong jang tơm kơ teh đak, chih tơlĕch tơdrong tơgŭm ăn kăn ƀô̆, bơngai jang kơ teh đak tơ̆ Anih jang ‘nao păng pơjing trong jang tŏk lơ̆m 6 khei hơtuch sơnăm 2025. Yă Cao Thị Hòa An – Phó Bí thư chĕp kơ̆l Đảng dêh char, Kơdră Jơnŭm pơgơ̆r kon pơlei dêh char Đắk Lắk pơma hơdăh, đơ̆ng rŏng kơ tơlĕch trong jang kiơ̆ Khul kơdră pơgơ̆r tơring 2 tăl đơ̆ng ‘năr 1/7, khul kơdră pơgơ̆r hlôi bơ̆ jang sơđơ̆ng ‘lơ̆ng.

Kơdră Jơnŭm pơgơ̆r kon pơlei dêh char athei dôm bơngai tang măt hơtŏk đon jang mă tơnăp, pơma nuh mă hơlen, vang tơgop nơ̆r mă ‘lơ̆ng vă chih tơlĕch tơdrong tơchơ̆t lăp hăm yăn âu, vang tơgop ‘lơ̆ng ăn tơdrong jang tŏk pran kơjăp păng hơmet pơ ‘lơ̆ng đon lui đơ̆ng kon pơlei.