Ƀô̆ đô̆i Kơđông vei sơlam teh dêh char Gia Lai (hơdrol ki đei hơnăn krao noh Khul linh vei sơđơ̆ng tơpôl) đei tơ-iung pơjing đơ̆ng sơnăm 1965, hăm tơdrong tơgŭm đơ̆ng dôm dêh char gah Tu. Lơ̆m khei năr iung tơblah, khul linh hlôi vang akŏm kơ hrĕng 'măng tơblah, pơlôch păng rôp vei kơ hrĕng 'nu ayăt, tơgop tơblah pơrơngei tơring Pơbah, rơngei teh đak. Đơ̆ng rŏng sơnăm 1975 Ƀô̆ đô̆i Kơđông vei sơlam teh dêh char Gia Lai pơtoi jang sơnong vei lăng sơlam teh đak, mă kăl lơ̆m khei năr tơblah Khmer Đỏ.

Dang ei anih linh ou vei lăng hloh 80 km trong sơlam teh tơkuh hăm dêh char Rattanakiri (Campuchia), hơnơ̆ng keh đang tơnăp sơnong jang vei lăng sơlam teh păng tơgŭm rah ăn kon pơlei hơtŏk mŭk drăm tơpôl hăm dôm tơdrong jang nhen “Pôk jơ̆ng oh năm truh hnam trưng”, “Bơbŭng hnam ăn bơngai hin dơnuh tơ̆ tơring sơlam teh”, “Rơmo yŏng ăn bơngai hin dơnuh”. Hăm tơdrong jang đei jơnei hơdah, Anih tơm pơgơ̆r Ƀô̆ đô̆i Kơđông vei sơlam teh dêh char Gia Lai chơt hơ-iă đei kơdră teh đak pôk ăn Mê đai Vei lăng teh đak tăl Ƀar; Kơdră Anih jang vei lăng kon pơlei dêh char Gia Lai adoi pôk ƀăng hmach bơnê ăn 6 anih jang păng 9 'nu bơngai jang hơgei.