Lơ̆m jăl jang 2021–2024, dêh char Đắk Lắk hlôi ‘măn 35,7% akŏm tơlĕch jên jang tơring ăn kơ pơtho pơhrăm păng pơtho tơdrong jang hăm hloh 28.300 ti hlak jên. Mă lei, kơsô̆ bơngai jang kiơ̆ hŏk pơhrăm đei ƀăng asong pơkăp păng bơngai jang ‘lơ̆ng oei tŏ sĕt. Ƀok Nguyễn Bá Thành, Kơdră Jơnŭm vei lăng pơm hloi Kơdră dơnơm vei lăng Kŏng ti Kơtao sĭk 333 Đắk Lắk tơroi, dang ei kŏng ti tŏk bŏk tŭn pran bơ̆jang hăm kơmăy kơdâu kơdih lơ̆m pơm tơlĕch, mă lei ưh kơ măh lơ bơngai jang ki thuơ̆t hơgei kơna jing anih jang măh chă pơtho băl lơ̆m tơdoă kiơ̆ trong jang răh pơtho răh. Mă đơ̆ng 75% bơngai jang lơ̆m kŏng ti hlôi đei ƀăng asong, mă lei bơngai jang ki thuơ̆t hơgei, mă lo ‘noh jĭ dôm hơnih athei hlôh vao ‘nao păng đon tơchĕng tơplih ‘nao hơgei... ‘noh ưh kơ măh lơ. Ƀok Nguyễn Bá Thành tơroi.

“Kơmăy kơmŏk ‘nao vă đĭ đăng ‘noh jĭ tam mă đei tơdrong jang pơtho pơhrăm găh tơdrong jang kơtao sĭk mă nhôn kơchăng pơtho pơhrăm kơtă hơnih, bơngai gơh hơgei pơtho ăn bơngai tam mă hơgei. Bơngai so pơtho ăn bơngai ‘nao vă kơdâu kơmăy. Tơdăh hnam kơmăy gơih ăn năm hŏk tơ̆ 1,2 anih jang nai ưh kơ ƀlep tơdrong jang ‘noh kŭm ưh kơ đei yua kiơ, ưh kơ hơmet đei tơdrong lơ̆m tơdrong jang đơ̆ng nhôn”.

Kiơ̆ kơ Tiến sĩ Nguyễn Thanh Trúc, Kơdră vei lăng Hnam trưng Đại học Tây Nguyên, tơdrong ưh kơ măh bơngai jang gơh hơgei ăn Tây Nguyên hrei ‘nâu, đei dôm tơdrong tơhlăk tam mă đei nơ̆r tơblang iŏk đơ̆ng blŭng mơ̆t hŏk. Mă hơdăh, lơ̆m kơsô̆ 35 tơdrong jang hŏk tơ̆ đăi hŏk kơ hnam trưng, đei lơ tơdrong jang tôch kơ lăp hăm tơdrong kơ tơring, đei hơmĕng găh tơdrong jang păng iŏk yua đơ̆ng rŏng hŏk đang, ‘noh ưh pơm mơ nơh ăn hŏk tro chih măt:

 “Grŭp tơdrong jang choh jang sa bri ‘long rơih hŏk tro mơ̆t hŏk tôch kơ tŏ sĕt, nhen sơnăm 2024 lăp đei hloh 50%. Mă lei lơ̆m roi tơbăt chih iŏk tơdrong jang đơ̆ng sinh viên đơ̆ng rŏng kơ lĕch ‘măng khoă hŏk lăng atŭm sinh viên grŭp tơdrong jang choh jang sa ‘noh đei kơsô̆ iŏk yua jô̆ păh lăp lơ hloh kơ dôm grŭp tơdrong jang nai mă lei đe oh ‘noh ưh kơ rơih tơdrong jang ‘nâu vă kiơ̆ hŏk. Yua thoi noh kŭm tŏk bŏk đei tơdrong ưh kơ hơtŏ găh ‘meh vă đơ̆ng tơpôl”.

Tơ̆ tơring Tây Nguyên, Đắk Lắk jĭ dêh char lơ kon pơlei hloh, hăm hloh 2 triệu ‘nu, mă lei tơdrong ‘lơ̆ng găh bơngai jang tŏk bŏk jing tơdrong ưh kơ kĕ tơrăn. Kiơ̆ kơ ƀok Nguyễn Thiên Văn, Phŏ Kơdră Anih vei lăng kon pơlei dêh char Đắk Lắk, kơsô̆ bơngai jang kiơ̆ đơ̆ng hŏk đei ƀăng, hla ar pơkăp tơ̆ dêh char ‘nao đei dang 1/5. Kăl kơ lăng truh, dêh char tam mă đei bơngai jang hơgei tơ̆ dôm tơdrong jang kăl kơmăy kơmŏk ‘nao, pơm tơlĕch hăm kơmăy kơdâu kơdih. Tơdrong ‘nâu ƀơm ưh kơ ‘lơ̆ng kơtă truh iŏk yua bơngai jang păng tơdrong kĕ pơjei đơ̆ng mŭk drăm tơring.

 “Dêh char Đắk Lắk hrei ‘nâu tam mă đei lơ anih mơdro sa bơ̆jang tih, tă kơ iĕ ngăl, kơna kŭm ƀơm truh tơdrong pơtho pơhrăm. Trŏ bơih tơ̆ âu đei dôm tơdrong jang joăt jang tơklep hăm tơdrong bơ̆jang kơtă mă lei tơdrong anih mơdro sa ‘noh athei pơih să păng hơtŏk tơiung jang tih ‘noh mă gơh kĕ sơng iŏk bơngai jang”.

Kiơ̆ kơ khŭl dăr hơlen đơ̆ng Anih vei lăng găh Joh ayŏ - Tơpôl kơ Quốc hội, Đắk Lắk đei tơmam lơ mă lei dêh char kăl 1 tơdrong jang đunh đai, hrơ̆ch 1 ‘măng păng tơpă hloh găh hơtŏk tơiung bơngai jang, mă loi ‘noh jĭ trong jang tơgŭm sơng đei bơngai hơgei, mă loi ‘noh jĭ bơngai kon kông. Hơdai hăm kăl kơ hơtŏk loi dơ̆ng jang hơdai đơ̆ng hnam trưng, anih mơdro sa păng khŭl kơdră vă pơjing hơnih bơngai jang, pơtho pơhrăm tơklep hăm iŏk yua, tơgŭm bơngai hŏk gơh pơjing tơdrong jang sa kơtă hloi tơ̆ pơlei pơla.

Ƀok Đinh Công Sỹ, Phŏ Kơdră Anih vei lăng Joh ayŏ tơpôl kơ Quốc hội akhan, tơdrong ‘nâu roi jing kăl tơ tĕnh hloh, ƀơ̆t tơdrong tơmơ̆t hơdai dêh char, xăh, hŭt apŭng hlôi yak lơ̆m jăl jang hơtuch. Mĭnh dêh char Đắk Lắk ‘nao să hloh hăm kơ hrĕng xăh găh dêh char, sa roi kăl kơ bơngai jang trŏ lăp:

“Vă jê̆ truh âu kơnh tơring pơih să, thoi noh bơ̆n athei đei dôm tơdrong hơmet ming găh tơdrong vă jang dôm tơdrong jang pơtho pơhrăm, trong jang lơ̆m tơring păng dêh char kŭm kăl kơ đei kơchăng vă đei trong jang tơ̆ hơnăp kơnh. Mă 2 ‘noh bơngơ̆t truh tơdrong jang pơtho tơƀôh tơdrong jang vă sơng đei mơ̆t lơ̆m dôm tơdrong jang mơdro sa tŏk bŏk đei ‘meh vă lơ nhen choh jang sa, bri ‘long”.

Hơtŏk tơiung bơngai jang, mă loi ‘noh jĭ bơngai gơh hơgei, ưh khan lăp jing ‘meh vă ƀơ̆t măt đĕch mă oei jing tơdrong ‘lơ̆ng ăn tơdrong hơtŏk tơiung kơjăp kơ Đắk Lắk tơ̆ hơnăp kơnh. Lăp mưh bơngai jang đei hơtŏk tơiung ƀlep trong, tơring mă gơh iŏk yua tôch ai tơmam ‘lơ̆ng, đei yua păng yak tŏk pran kơtang lơ̆m kơplăh tơplih ‘nao păng mơ̆t jang hơdai.