Kiơ̆ đơ̆ng hơlen năng, tơ̆ plt Buôn Ma Thuột dang ei đei 35 anih jang, hnam teh đak găh tơmam tơpôl, đei hloi Hnam tơmoi, Anih oei xa, hnam ăn bơngai jang oei, Anih jang so… gơ̆h iŏk yoa hloi, pơm măh mai anih oei xa ăn dang 363 ‘nu kăn ƀô̆. Lơ̆m kơsô̆ âu đei Hnam tơmoi kơ Anih chĕp kơ̆l Đảng dêh char, Anih ăn bơngai hŏk oei kơ Hnam trưng Đăi hŏk Tây Nguyên, Hnam trưng Cao đẳng Sư phạm păng Cao đẳng Đắk Lắk.

Mă lei, hăm tơdrong ‘mĕh vă đĭ đăng đơ̆ng dang 1.000 ‘nu kăn ƀô̆, dêh char oei ưh kơmăh anih oei ăn dang 637 ‘nu bơngai. Anih vei lăng kon pơlei dêh char athei iŏk yoa dơ̆ng Hnam trưng Trường Cao đẳng Đắk Lắk (kơsô̆ 30 Y Ngông) păng Anih pơgơ̆r Khul linh dêh char (kơsô̆ 08 Mai Hắc Đế), hơtŏk đĭ đăng anih gơ̆h ăn dơ̆ng 379 ‘nu bơngai mât oei, oei ưh kơmăh truh 258 anih. Akŏm đĭ đăng jên vă hơmet ming, răt tơmam ăn 37 Anih jang kơpal hlŏh 85 ti, iŏk đơ̆ng jên mong kơ dêh char, jên Trung ương tơgŭm (tơdăh đei) păng jên vang tơra tơgop đơ̆ng tơpôl.