Hơp tak xăh choh jang xa kiơ̆ kŏng ngê̆ rơgei jang hadoi Farm kơyuơ Tô Linh Bình, 29 xơnăm pơm Kơdră Jơnŭm vei lăng adoi jing Kơdră anih jang tơ̆ thôn 5, xăh Hà Mòn, apŭng Đăk Hà, dêh char Kon Tum. Chŏng mă Hơp tak xăh đei anih jang tơ̆ lơ tơring teh lơ̆m dêh char nhen Đăk Hà, Ngọc Hồi, Đăk Tô, Kon Braih, Sa Thầy, pơlei tơm Kon Tum păng phŏ noh truh tơ̆ dêh char  Gia Lai hloi. Vă pơm kơđeh tơdrong ataih găh hơgăt teh, pơjing tơdrong tơroh, tơguăt kơjăp đơ̆ng rim bơngai jang, Tô Linh Bình ăn tơbăt, pơđĭ 30 'nu jang adoi băt hơdăh găh kŏng ngê̆ thŏng tin: “Kŏng ngê̆ thŏng tin 'nhăk ba tơdrong pơyua ƀôh hơdăh păng ưh gơh kơƀah lơ̆m tơdrong choh jang xa. Đe boăl tơ̆ ataih tơroh tơroi tơbăt hăm Zalo, Facebook, đang kơ noh pơgơ̆r khul jang lơ̆m điê̆n t hoăi, lơ̆m trang kơdih po. Pơjing trang fanpage noh vă hơnơ̆ng akŏm lơ um rŭp, kơtơ̆ng ang, video var pơgơr vă kon pơlei atŭm tơroi tơbăt găh tơdrong gơh jang”.

Kiơ̆ kơ Tô Linh Bình, 'nhŏng khŏm mă tơchă truh hăm choh jang xa rơgoh kơlih đơ̆ng tơdrong erih tơpă kơdih po, ăh iŏk unh om athei erih lơ̆m pơgar 'long xa plei huông huang hơyuh pơgang hơdrông vei lăng 'long pơtăm. Ăh mă băt hơdăh đei hơyak jang 'nao, 'nhŏng pơdjoi ăn lơ bơngai jang mir, pơjing đei minh trong choh jang xa rơgoh vă vei lăng kơdih po păng vei lăng kon pơlei. Dang ei, 30 'nu vang jang lơ̆m Hơp tak xăh choh jang xa kŏng ngê̆ rơgei jang hadoi Farm tŏk bŏk oei pơm jang hloh 50ha ka phê, hloh 70ha sâu riêng atŭm hăm dôm jĭt ha 'long xa plei, pơm kiơ̆ kơjăp pơkăp choh pơtăm hưuh kơ sinh hŏk. Kơtơ̆ng găh pơgar 'long kơ rim bơngai jang lơ̆m Hơp tak xăh hơnơ̆ng đei chih akŏm tơroi lơ̆m khul. Hăm dôm tơdrong đei ƀôh nhen pơrang pơrăm, 'long pơtăm ƀôh ưh kơ 'lơ̆ng, rim bơngai jang adoi đei tơroi tơbăt, tơgŭm tơtom đơ̆ng dôm bơngai kloh klĕch rơgei lơ̆m Hơp tak xăh. 'Nhŏng Lê Quốc Hòa, oei tơ̆ thôn 2, xăh Đăk Ui, apŭng Đăk Hà ăn tơbăt, tơdrong hiôk kăp gĭt kơ dôm bơngai jang lơ̆m Hơp tak xăh noh đei iŏk tơdrong tơgŭm đơ̆ng ataih păng lai yơ duh bưh:  “Inh pơtăm 2ha sâu riêng atŭm hăm mit. Jang kiơ̆ pơkăp sinh hŏk noh ƀôh xơđơ̆ng păng 'lơ̆ng hăm cham char. Kiơ̆ đơ̆ng mạng tơpôl atŭm hăm khul jang adrô̆ kơ Hơp tak xăh noh 'nhŏng oh chă tơroh dih băl tơroi tơbăt ƀônh hiôk hloh. Lơ 'măng noh ba đei tơdrong kiơ krao điê̆n thoăi kiơ̆ pơkăp facetime vă pơma dơnuh. Kăl lai yơ noh krao jơ noh lơ̆m khul, lai yơ 'nhŏng oh adoi đĭ jơhngơ̆m đon tơgŭm tơtom”.   

Dang ei hăm dôm tơmam drăm ka phê, sâu riêng atŭm hăm minh ƀar hơdrĕch 'long xa plei kơ Jơnŭm jang hadoi Farm ưh kơ măh vă axong tĕch lơ̆m tơring.

Atŭm băl găn ga khei năr tơnap tap, rim bơngai jang lơ̆m Hơp tak xăh dang ei tŏk bŏk tơguăt tơguăl pơtoi pơm kiơ̆ dôm tơdrong pơkăp pơm jang tơnăp păng đunh đai hloh ăn tơdrong choh jang xa hưuh kơ. Tơ̆ anăp Hơp tak xăh pơih xă hơgăt pơtăm 'long kiơ̆ trong ruih kơtoh đak tư̆ đŏng, atŭm hăm noh chih pơkăp tơring pơtăm vă đei tơmam drăm gơh tĕch tơ̆ lơ tơring hloh. Atŭm hăm noh iŏk jang kiơ̆ kŏng ngê̆ 'nao vă vei lăng hơlen 'long pơtăm vă bơngai răt yua ƀônh ƀŏ hloh hơlen băt tơm a hla chă, hơtŏk tơdrong akŏm pơ-'lơ̆ng ăn rim tơmam drăm đei pơm tơlĕch. Tơroi găh bơngai chĕp kơ̆l khul, chơng ba Hơp tak xăh choh jang kŏng ngê̆ rơgei Jơnŭm jang hadoi Farm Tô Linh Bình, 'nhŏng A Xây, Phŏ Ƀĭ thư juăt jang Đoan dêh char Kon Tum ăn tơbăt: “Lơ̆m tơdrong choh jang xa rơgoh 'lơ̆ng  Tô Linh Bình đei lơ trong jang gơh rơgei tơnăp păng kăp gĭt đei tơdrong tơroi atŭm hăm khul đoan hơdruh tơdăm, axong tơdrong jang ăn đoan viên hơdruh tơdăm tơnap tap. Lơ̆m dôm xơnăm âu ki 'nhŏng Bình duh hlôi đei iŏk lơ tơmam hơpăh kăp gĭt”.

Xơnăm 2022, hăm Hơp tak xăh choh jang xa kŏng ngê̆ rơgei Jơnŭm jang hadoi Farm 'nao rơgei đei yua kơjăp, 'nhŏng Tô Linh Bình chơt hơ-iă tih đei rơih hơpăh, hăm Tơmam hơpăh Lương Định Của 'măn ăn bơngai choh jang xa mơlôh – bơngai jang mŭk drăm gơh rơgei kơ jâ̆p teh đak. Duh lơ̆m xơnăm 2022 Tô Linh Bình đei Anih vei lăng kon pơlei dêh char Kon Tum pôk hơnăn Bơngai mơlôh gơh rơgei kơ dêh char Kon Tum găh tơdrong pơm jang tĕch pơdro.