
Tơdrong pơjing Khul kơdră pơgơ̆r 2 tăl, ‘ngoăih kơ bơ̆ jang dôm tơdrong nhen hrei ‘nâu, tơ̆ xăh gô iŏk jang dơ̆ng lơ tơdrong jang đơ̆ng apŭng; đei pơjao hơnăp jang lơ ƀiơ̆. Đei dơ̆ng lơ tơdrong jang, pơm thoi yơ vă khul kơdră pơgơ̆r tơ̆ xăh gơ̆h bơ̆ jang sơđơ̆ng ‘lơ̆ng, pơvih ăn kon pơlei ‘lơ̆ng ƀiơ̆? Kiơ̆ Phŏ Kơdră Anih tơm jang Nô̆i vŭ Nguyễn Thị Hà, tơ̆ xăh đơ̆ng rŏng kơ tơmât hơdai gô đei pơjing Anih pơm hla ar tơpôl vă iŏk pơm păng sek tơlang dôm tơdrong ƀơm truh hla ar ăn kon pơlei păng anih tĕch mơdro. Dôm hla ar adrol sơ̆ yoa apŭng pơm gô đei pơjao ăn xăh iŏk pơm hloi. Trong pơm hla ar gô đei kăt tơjur ƀônh ƀiơ̆, hŭt lê̆ dôm tơdrong ưh kăl, pơm pơmat tat mưh pơm:
“Khul kơdră pơgơ̆r tơ̆ xăh gô đei pơjao ăn lơ tơdrong jang tih ƀiơ̆, Khul bơngai jang păng tơdrong tơgŭm ăn bơngai jang kơ teh đak kŭm đei tơplih ‘nao, gơ̆h pơm lăp hăm tơdrong jang. Găh pơm hla ar vei lăng adrol sơ̆ pơm tơ̆ apŭng ‘nŏh dang ei gô pơjao ăn xăh iŏk pơm. Yoa thoi noh, kơna athei hơtŏk tơdrong iŏk yoa kơmăy kơmŏk, tơplih hăm kơmăy sô̆, pơm hiôk hian ăn tơdrong pơm hla ar, tơjur ƀiơ̆ năr pơm, pơvih ăn kon pơlei păng anih tĕch mơdro roi 'lơ̆ng ƀiơ̆.”

Tiến sĩ Nguyễn Văn Đáng, tơ̆ Hnam hŏk Chính trị Quốc gia Hồ Chí Minh akhan: Ưh pă đei khul kơdră pơgơ̆r apŭng, dang 2/3 tơdrong jang tơ̆ apŭng gô đei pơjao ăn xăh. Atŭm hăm ‘nŏh, xăh, phường kŭm đei pơjao lơ tơdrong jang tih ƀiơ̆, jing dôm anih vei lăng teh đak jê̆ kon pơlei tơpă: “Bơ̆n athei pơjing ming, hơmet ming dơ̆ng hơnăp jang, tơdrong jang đơ̆ng khul kơdră pơgơ̆r tơ̆ xăh thoi yơ? Găh tơdrong hơgăt 'nŏh đĭ đăng dôm tơdrong pơvih kăl hlŏh ăn kon pơlei, ăn anih tĕch mơdro 'nŏh athei tơjur đĭ tơ̆ xăh, vă khul kơdră tơring gơ̆h jang 'lơ̆ng kiơ̆ tơdrong 'mĕh vă đơ̆ng kon pơlei păng anih tĕch mơdro păng đơ̆ng noh năm truh hơnăp jang jê̆ kon pơlei, pơvih ăn kon pơlei 'lơ̆ng hlŏh pơting hăm adrol ki."
Ƀât mă rim anih jang kơ khul kơdră pơgơ̆r tơring oei hơmet ming khul bơngai jang kiơ̆ trong tŏ sĕt, bơngai, jang rơgei, đei yoa, khul bơngai jang ăn teh đak tơ̆ xăh gô iŏk jang dơ̆ng lơ tơdrong jang ‘nao, tơdrong jang roi đunh roi trăp păng athei đei đon rơgei roi kơjung. Tơdrong ‘nâu tơlĕch nơ̆r athei tôch gĭt kăl ‘nŏh athei pơm hơtŏk đon rơgei ăn khul kăn ƀô̆, bơngai jang tơ̆ xăh vă pơm lăp hăm tơdrong 'mĕh vă hăm 1 anih pơm hla ar vei lăng gơ̆h hơgei, 'lơ̆ng hơiă, jê̆ kon pơlei păng pơvih ăn kon pơlei 'lơ̆ng ƀiơ̆.
Tiến sĩ Nguyễn Đức Hà, sơ̆ jĭ Kăn ƀô̆ jang tơ̆ Anih Pơgơ̆r Trung ương, pơma tơlĕch đon tơchĕng: “Athei kăn ƀô̆ tơ̆ xăh oei xa tơtil kon pơlei, iŏk sek tơlang rim tơdrong ƀơm truh tơ̆ kon pơlei. Mă 2 'nŏh rim trong jang, tơdrong tơgŭm đơ̆ng Đảng, Teh đak tơjur đĭ tơ̆ xăh, yoa thoi noh kăn ƀô̆ tơ̆ xăh athei gơ̆h jang lơ tơdrong, vă akhan ih jang 1 tơdrong đĕch mă lei athei băt lơ tơdrong nai hai, đei thoi noh gơ̆h bơ̆ jang đei.”
Tơ̆ xăh ‘nao athei rơgei ‘mơ̆i na gơ̆h bơ̆ jang dôm tơdrong jang đei pơjao, mă lei athei oei hơdai kơjăp ‘lơ̆ng hăm tơring hai. Yoa thoi noh, ƀok Hoàng Văn Cường, Bơngai tang măt Quốc hội jăl 15 athei klăih song, pơjao hơdăh hơnăp jang ăn xăh kiơ̆ trong “Tơring tơchơ̆t, tơring bơ̆ jang, tơring chĭu pŭ hơnăp jang kơdih”: “Bơ̆n athei đei trong jang klăih song, pơjao hơdăh hơnăp jang mă lei athei chih hơdăh hơnăp athei pŭ ‘năi. Jang yă kiơ athei chĭu pŭ tơdrong ‘nŏh. Bơ̆n athei đei 1 trong dăr hơlen, vei lăng vă pơm ‘lơ̆ng rim kăn ƀô̆ huei kơ bơ̆ jang tơdrong jang kơdih kư̆ kă. Klăih song tơdrong jang athei pơm kiơ̆ mă 'lơ̆ng dôm tơdrong hơgăt đơ̆ng teh đak, atŭm hăm 'nŏh jĭ pơm lăp hăm tơdrong 'mĕh vă đơng kon pơlei."
Găh 1 tơdrong nai, PGS.TS Đinh Xuân Thảo, sơ̆ng pơm Kơdră Anih tơchĕng hơlen, chih pơjing khôi luơ̆t kơ Quốc hội akhan, hơtŏk hơnăp jang tơ̆ xăh mă lei athei đei trong jang hơdoi hơdai mă ‘lơ̆ng đơ̆ng dêh char păng xăh hai vă pơm 'lơ̆ng rim tơdrong gơ̆h bơ̆ jang hiôk hian, đei yoa: “Mă hơdăh tơ̆ âu ‘nŏh jĭ dêh char athei jur truh tơ̆ xăh păng athei đei trong jang hơdoi mă kơjăp, hiôk hian, pơm 'lơ̆ng vă anih jang tơ̆ xăh gơ̆h sek tơlang, jang đei rim tơdrong 'lơ̆ng hơiă, đei yoa hăm tơdrong vei lăng, năng tông păng pơtho tơƀôh tơtom đơ̆ng dêh char. 'Nâu jĭ tơdrong tôch gĭt kăl vă pơm 'lơ̆ng ăn tơdrong bơ̆ jang kơdih, chĭu pŭ kơdih păng jang 'lơ̆ng tơdrong vei lăng đơ̆ng khul kơdră pơgơ̆r tơ̆ tơring đei hơnăp jang roi tih đơ̆ng rŏng kơ tơmât hơdai.”
Pơma pơtôch Hop akŏm Trung ương ‘măng mă 11, jăl XIII, Tổng Bí thư Tô Lâm pơma hơdăh, hăm trong chĕp kơ̆l pơgơ̆r ‘nao, dêh char gô iŏk jang 2 hơnăp jang tih, jĭ anih iŏk jang tơpăt dôm trong jang, tơdrong tơgŭm đơ̆ng Trung ương hai, jĭ anih kơchăng tơlĕch lơ trong jang mă lăp hăm tơdrong jang tŏk tơ̆ yăn âu kơ tơring hai, atŭm hăm ‘nŏh chĕp kơ̆l pơgơ̆r, vei lăng rim tơdrong jang tơ̆ xăh. Kơplăh ‘nŏh, tơ̆ xăh đei năng jĭ anih pơgơ̆r jang tơm mưh bơ̆ jang dôm tơdrong tơgŭm, trong jang đơ̆ng Trung ương păng tơ̆ dêh char mă lei gô đei klăih song hơdăh hơnăp jang, tơdrong jang. Khul kơdră pơgơ̆r tơ̆ xăh gô đei hơnăp jang chih tơlĕch hla ar hơgăt kiơ̆ luơ̆t vă tơchơ̆t dôm tơdrong jang kiơ̆ luơ̆t chih tơ̆ tơring păng sek tơlang dôm tơdrong găh hơnăp jang đơ̆ng kơdih.
Tổng Bí thư oei pơma hơdăh, Khul kơdră pơgơ̆r tơring đơ̆ng rŏng kơ hơmet ming athei tŏ sĕt bơngai, jang rơgei, đei yoa, arih xa, bơ̆ jang jê̆ kon pơlei păng kĕ vei lăng tơpôl kiơ̆ chăl ‘nao, năm truh tơdrong pơhnŏng jang tŏk hrĕnh, jang tŏk pran kơjăp, pơvih ‘lơ̆ng hlŏh ăn tơdrong arih xa kơ kon pơlei.
Viết bình luận