Kơdră Quốc hội Trần Thanh Mẫn lui ngeh hăm tơdrong chĕp kơ̆l gơh hơgei, tơtom đơ̆ng Đảng, tơdrong dăr lăng đei iŏk yua đơ̆ng Quốc hội păng tơdrong pơgơ̆r, vei lăng kơtang đơ̆ng Khŭl kơdră teh đak, teh đak păng kon pơlei Lào gô yak hloh rim tơdrong mơmat tat, bơ̆jang kiơ̆ jơnei Tơdrong tơchơ̆t Hop akŏm ‘măng mă XI păng pơgơ̆r jơnei Hop akŏm Đảng rim tơring, yak truh Hop akŏm Đảng lơ̆m teh đak ‘măng mă XII lơ̆m sơnăm 2026.

Kơdră Quốc hội Trần Thanh Mẫn athei Quốc hội 2 teh đak hơnơ̆ng jang hơdai kơjăp, vang dăr hơlen đei yua tơdrong tơlĕch jang dôm Hla ar drơ̆ng nơ̆r kơdră kơpal; hơtŏk loi dơ̆ng pơma dơnuh khŭl, roi tơbăt tơdrong hlôh vao lơ̆m tơdrong jang proh hơmet, pơm tŏ sĕt bơngai jang lơ̆m dôm anih jang Quốc hội, bơ̆jang pơjing khôi luơ̆t, pơgơ̆r dôm khŭl dăr hơlen păng hơlen lăng hơdai, athei Khŭl kơdră teh đak, rim anih tơm, anih jang, tơring păng anih mơdro sa tơlĕch jang kiơ̆ ‘lơ̆ng tơdrong tơchơ̆t atŭm Việt Nam – Lào.