Tơ̆ jơ sơng, Kơdră teh đak Lương Cường pơma hơdăh, Việt Nam năng kăl păng ‘mĕh pơm pơ ‘lơ̆ng hlŏh dơ̆ng tơdrong pơvei păng jang hơdoi găh lơ tơdrong hăm Kenya. Kiơ̆ đơ̆ng đon lui băl găh chinh trĭ đơ̆ng Việt Nam păng Kenya, Kơdră teh đak bơ̆n ƀok Lương Cường athei 2 păh adrin bơ̆ jang mă ‘lơ̆ng, iŏk yoa pơđĭ dôm tơdrong ‘lơ̆ng găh rim tơdrong đơ̆ng 2 păh, mă loi ‘nŏh găh tơmât jên jang, tĕch mơdro, choh jang xa păng chă tơmang lăng.

Găh jang hơdoi khul linh, Kơdră teh đak athei 2 Anih tơm vei lăng khul linh ƀar teh đak tơchĕng hơlen, tưk tơiung tơdrong jang hơdai găh kơmăy kơmŏk khul linh, pơvih pơvăn, khul linh jang pơgang, roi tơbăt dôm tơdrong kăl mưh vang bơ̆ jang vei lăng tơdrong rơngei đơ̆ng Liên hợp quốc.