Pơma tơ̆ jơ tơƀâp, Kơdră teh đak bơ̆n, ƀok Lương Cường tơchĕng ‘lơ̆ng dôm nơ̆r tơgop tôch hơiă, đei đon ‘mĕh pơjing pơ ‘lơ̆ng, tơƀôh đon tơnăp hăm tơdrong jang tŏk hơnŭk hơnoa păng kơjăp đunh đơ̆ng teh đak. Lơ nơ̆r tơƀôh tơdrong hơiă tơ̆ hơnăp dôm trong jang ‘nao tôch gĭt kăl đơ̆ng Trung ương; tơdrong vang jang tôch pran, hrơ̆ch ‘lơ̆ng đơ̆ng rim anih jang chinh trĭ, tơpôl bơngai tĕch mơdro păng đĭ đăng kon pơlei, vang tơgop jang đei lơ tơdrong gĭt kăl lơ̆m rim tơdrong jang mŭk drăm, tơpôl, khul linh, vei sơđơ̆ng teh đak tơ̆ tơring. Atŭm hăm ‘nŏh, lơ bơngai tăh hla oei pơma tơlĕch lơ tơdrong oei ưh hơiă tơ̆ yăn âu ƀơm truh tơdrong arih xa kơ kon pơlei kăl đei hơmet pơ ‘lơ̆ng.

Pơgê hơdai lơ̆m năr, tơ̆ Anih gru groa kơ teh đak Ngã Ba Giồng (xăh Xuân Thới Thượng, apŭng Hóc Môn), Kơdră teh đak Lương Cường truh soh nhang, plang pơyơ̆r pơkao păng ‘măn pơnĭt kŭp kơ̆l tơƀôh jơhngâm đon ‘mêm bơnê tôch ai, ƀlŏk hơdơ̆r kŏng tih tên đơ̆ng Ƀok Hô păng bơnê kơ dôm ƀok Kơdră chĕp kơ̆l Trung ương Đảng adrol sơ̆, păng đe kră jang kăch mang, đe linh lôch tang ăn teh đak, kon pơlei hlôi lôch tang yoa tơdrong rơngei, hiôk hian kơ hơdrĕch hơdrung, yoa tơdrong hiôk chơt kơ Kon pơlei.