Tơ̆ hop akŏm, dôm bơngai tang măt akŏm pơma nuh, tơgop nơ̆r kiơ̆ tơdrong đei tơ̆ yăn âu vă atŏk tơiung chă tơmang lăng tơ̆ rim tơring păng tơdrong hơtŏk jơhngâm ăn rim tơring vă pơjing đei tơmam chă tơmang lăng ‘lơ̆ng hơiă. Lơ̆m noh, Phú Yên đei jih đak dơsĭ kơjung 189km, lơ anih hum, ving đak, anih gru groa gĭt kăl nhen tơmo Đá Đĩa păng lơ anih gru groa gĭt kăl đơ̆ng chăl kră sơ̆.

Đắk Lắk đei tơdrong ‘lơ̆ng đơ̆ng bri kông, joh ayŏ kơ dŏ xoang, lơ pơgar cheh phe, chơkơi đak păng tơdrong juăt tôn chĭng chêng Tây Nguyên. Mưh tơmât hơdai Phú Yên păng Đắk Lắk jing mĭnh, tơdrong tơguăt “đak dơsĭ – bri kông” roi gĭt kăl hlŏh dơ̆ng. Ƀok Hồ Văn Tiến, Kơdră vei lăng Khul chă tơmang lăng Phú Yên ăn tơbăt, ƀât mă Phú Yên păng Đắk Lắk oei vă mât hơdai, anih chă tơmang lăng kơ 2 dêh char athei adrin hlŏh dơ̆ng vă hơnhăk tơdrong chă tơmang lăng jing anih jang mŭk drăm tơm.