Đei pơjing đơ̆ng tơdrong hơgrop rim phương Tân An, Tân Thiện, Bình Tân păng tơring Tân Bình kơ thĭ xah La Gi (dêh char Bình Thuận so), phương La Gi jĭ hơnih kơdrơ̆m tơm tơring tơter đak dơsĭ kơ dêh char Lâm Đồng, hăm măt bơngai kon pơlei hloh 60.000 ‘nu. Kon pơlei kơdrơ̆m, bơngai năm pơm hla bơar lơ, mă lei dôm tơdrong jang tơ̆ Hơnih bơ̆ jang teh đak phương La Gi jei iung jang ‘lơ̆ng hơ iă, pơm lăp đon kon pơlei. Ƀok Tôn Thất Nhật, oei lơ̆m phương La Gi lăp kơ đon tơbăt:“Kon pơlei ling lang ‘meh vă mă đơ̆ng tơdrong yă kiơ jei keh đang tĕnh koăng. Vă iung jang sơđơ̆ng ăn kon pơlei ‘noh ba ƀôh phương hlôi jang tôch kơ ‘lơ̆ng. Đơ̆ng rŏng ou kơnh, phương hơnơ̆ng bơ̆ jang pơm hla bơar keh đang tĕnh koăng hơnơ̆ng lơ lou ‘noh pă pơma yă kiơ bơih, ‘lơ̆ng dêh”.

Adoi nhen tơring kơdrơ̆m, bơ̆ jang pơm hla bơar tơ̆ rim tơring atăih yăih, tơring kon kông kơ dêh char Lâm Đồng jei iung jang tôch rơvơn, bơ̆ jang kloh klĕch dih băl lơ̆m hơnih jang hăm kmăi kmŏk lơ̆m teh đak tôch kơ ‘lơ̆ng. Ƀok Bùi Quốc Huân, Kơdră chĕp pơgơ̆r Hơnih vei lăng kon pơlei tơring Lạc Dương, dêh char Lâm Đồng, tơring đei 86% măt bơngai kon pơlei ‘noh bơngai kon kông tơbăt, truh dang ei, tơring hlôi dăr lăng, hơlen kơjăp, pơklep păng tơbăt hơdăh 378 tơdrong bơ̆ jang pơm hla bơar lơ̆m hơnih jang kmăi kmŏk teh đak. Đĭ đăng dôm tơdrong jang pơm hla bơar ou jei đei Khul bơ̆ jang pơm hla bơar tơring iung jang pơm keh đang ăn kon pơlei năm pơm hla bơar.“Giĕng mă blŭng nhôn sơng iŏk đei 51 hô sơ, lơ̆m ou 17 hô sơ sơng iŏk ‘moi trong bơ̆ jang trư̆k tuyên, găh lơ pơm hla bơar ou găh tơdrong teh, hô̆ tĭch păng chư̆ng thư̆k. Lơ̆m jơ ‘năr pơm hla bơar, kon pơlei truh chă apĭnh athei pơm hla bơar tơdrong tĕch mơdro ou to ‘noh nhôn jei iung jang keh đang ngăl. ‘Nhŏng oh hlôi bơ̆ jang tơnăp ‘lơ̆ng tơdrong jang kơdih. Kmăi kmŏk, trong tơlĕi internet sơđơ̆ng ‘lơ̆ng”.

Atŭm hăm 16 hơnih bơ̆ jang, hơnih jang dêh char, pơđĭ 124 tơring, phương, tơring kăl kơ dêh char Lâm Đồng jei iung jang hrơ̆p mĭnh ‘măng xek tơlang dôm tơdrong năm pơm hla bơar, bơ̆ jang kiơ̆ kmăi kmŏk phân mêm vei lăng dôm hla bơar hle, trŏ lăp hăm tơdrong ‘meh vă pơm hla bơar ăn kon pơlei. Kiơ̆ đơ̆ng Hơnih bơ̆ jang Nô̆i vŭ dêh char Lâm Đồng, jô̆ đơ̆ng năr 1/7, lơ̆m mĭnh năr jei đei 1.000 hô sơ ba ăn kơtă păng trư̆k tuyên tơ̆ rim hơnih bơ̆ jang vă gô chang pơm keh đang. Lâm Đồng đei lăng jĭ mĭnh lơ̆m 5 dêh char dơ̆ng hơlou lơ̆m teh đak găh tơdrong sơng iŏk xek tơlang pơm keh đang hla bơar lơ̆m dôm năr blŭng bơ̆ jang kơ khul kơdră chĕp pơgơ̆r tơring 2 kâp.