Năr hơtuch giĕng, dơnou đak 'măn glơi kơ Hnam hơkŭm hơ-ioh dêh char Đăk Lăk rơ-ông rơ-ang hloh kơ da hia. Nơ̆r pơma hơhiĕk atŭm hăm nơ̆r đak re plŭk plăk đơ̆ng jê̆ 100 'nu hơ-ioh hăt hot akŏm pơhrăm hăm hơnăn  “Tang găn păng tơjră glơ̆k tơ̆ đak păng sar bar hơbur ăn đe hơ-ioh”. Oh Nguyễn Phan Phương Linh, 12 sơnăm tơ̆ xah Ea Knuêc hăt hot tơroi: “Akŏm hŏk lăm pơhrăm glơi păng đei pơhrăm dôm tơdrong glơi tơ̆ dơnou inh ƀôh sơđơ̆ng jơhngơ̆m hloh ah jur tơ̆ đak păng băt dôm tơdrong vă vei vêr dơh hơkou po păng bôl buăl mưh chă jur tơ̆ đak”.

Ưh hơdrô̆ tơ̆ hơnih pơhrăm, dôm tơdrong pơtho pơhrăm glơi, tang găn păng tơjră glơ̆k tơ̆ đak oei đei pơih să truh dôm tơring hơtaih yaih kơ dêh char Đăk Lăk. Tơ̆ xah Ea Mdroh, lơ̆m pơyan pơdơh hŏk sơnăm ou, Kâu lak ƀô̆ Kơyuơ đe hơ-ioh 'mêm kơ-eng (lơ̆m khul năm jang kơ teh đak tơ̆ tơring Tây Nguyên) hlôi pơih đei 2 'măng pơtho pơhrăm glơi ưh kơ iŏk jên hăm dôm lăm hŏk đei pơgơ̆r kơtă tơ̆ dôm thôn, pơlei. 'Nhŏng Mai Văn Chuyền, Kơdră Kâu lak ƀô̆ ăn tơbăt, hăm pơkăp 'nhăk dơnou glơi vih truh tơring kon pơlei, lơ̆m 5 sơnăm kơ ou, kâu lak ƀô̆ hlôi jang atŭm hăm jơnŭm pơgơ̆r tơring păng khul đoan hơdruh tơdăm dôm xah, atŭm hăm tơdrong tơgŭm đơ̆ng dôm anih jang 'mêm bơnat pơgơ̆r pơtho glơi ưh kơ iŏk jên ăn đe hơ-ioh: “Lăm hŏk ưh hơdrô̆ hơvơn đe hơ-ioh vang akŏm mă đei hloi đe mĕ ƀă, năm akŏm pơhrăm lăm hŏk dôm tơdrong kăl gah tơgŭm dŏng mưh ƀơm sar bar glơ̆k tơ̆ đak. Dôm tơdrong hlôh vao ou adoi kăl păng tơtom tơgŭm ăn đe mĕ ƀă păng kon pơlei tơ̆ tơring. Nhôn hơpơi 'meh gô đei lơ mĕ ƀă đe hơ-ioh, đe hơ-ioh păng tơpôl pơlei pơla tơrĕk truh tơdrong atŭm jơhngơ̆m tang găn păng tơjră glơ̆k tơ̆ đak”.

Ưh hơdrô̆ pơtho gah tơdrong hlôh vao, dôm lăm pơhrăm ou oei jing hơnih vă pơhrăm gah jơhngơ̆m jăn, sơđơ̆ng jơhngơ̆m, tơguăt bôl buăl, hơtŏk hơkou jăn păng tang găn yua lơ kơmăi điê̆n tưh lơ̆m khei tŏ hlơ hlĕng. Mă kăl, hăm tơdrong tơguăt tơjê̆, iŏk đe hơ-ioh pơm tơm, bơngai pơtho gah tơdrong hlôh vao lơ̆m tơdrong hơrih hlôi pơm ăn jơ hŏk jing 'lơ̆ng păng pơyua hloh. 'Nhŏng Phạm Ngọc Anh, bơngai pơtho gah tơdrong kloh klĕch lơ̆m tơdrong hơrih tơ̆ xah Krông Ana, dêh char Đăk Lăk tơroi gah tơdrong hlôh vao lơ̆m pơtho pơhrăm kơ po: “Hăm jơhnơr sơnăm ou, đe buăl lăp pơsuh pơchơt păng ah chơt bơih noh đe buăl hŏk tôch tenh. Hơdrol kơ pơtho ƀai hŏk, inh akŏm ăn đe sư pơtơ̆p pơchơt vă đe sư pơm juăt dih băl păng đe sư gô mơ̆ng ƀai pơtho tơnăp hloh. Đơ̆ng rŏng kơ tơroi gah tơdrong kăl đang noh inh pơtơm pơtho pơma dơnuh hăm đe sư hăm trong chă hơvơn đe sư vih tơroi dơ̆ng tơdrong kăl lơ̆m ƀai pơtho vă lăng đe sư hăm băt vao dah mă ưh păng pơgơ̆r dôm tơdrong pơchơt pơhrăm nai kăp gĭt”.

Kiơ̆ hơlen chih akŏm, lơ̆m 5 sơnăm kơ ou, dêh char Đăk Lăk ƀôh đei jê̆ 300 'nu hơ-ioh lôch glơ̆k tơ̆ đak. Đơ̆ng blŭng sơnăm 2025 truh dang ei, tơring ou adoi ƀôh đei dôm jĭt 'măng sar bar thoi ou, mă lơ noh đe hơ-ioh tơ̆ tơring hơtaih yaih. Đơ̆ng dôm lăm hŏk chơt hơ-iă tơ̆ dơnou glơi truh dôm tơdrong pơtho pơhrăm gah tơdrong hlôh vao lơ̆m hơrih xa tơ̆ pơlei pơla, rim tơdrong akŏm, rim ƀai hŏk, rim 'nu hơ-ioh đei hơmet tôm gô tơgop ăn dôm pơyan pơdơh hŏk sơđơ̆ng 'lơ̆ng hloh, tơ̆ tơring hơtaih yaih kơ dêh char Đăk Lăk.