Vă vei sơđơ̆ng ăn rim bơngai adoi đei Têt, ƀơ̆t Têt Nguyên đan Giáp Thìn sơnăm âu, dêh char Kon Tum hlôi tơchơ̆t asong jên mong hloh 8 tih hlj tơgŭm ăn jê̆ 16.800 unh hnam kon pơlei hin dơnuh păng tơjê̆ hin dơnuh. Kiơ̆ kơ noh sơkơ̆t tơdrong tơgŭm ăn rim unh hnam hin dơnuh noh 600 rơbâu hlj păng unh hnam tơjê̆ hin dơnuh noh 300 rơbâu hlj.

‘Nguaih kơ noh, Anih Asong jang dêh char Kon Tum adoi pơjao 2.700 tơpu tơmam, rim tơpu đei kơjă 500 rơbâu hlj ăn đoan viên, bơngai jang đei tơdrong hơrih tơnap tap. Atŭm hăm noh lơ̆m dôm năr âu tơ̆ dêh char Kon Tum, lơ tơdrong jang tơgŭm Têt ăn kon pơlei, mă kăl noh tơ̆ tơring hơtaih yaih, tơring sơlam teh adoi đei dôm jăl pơgơ̆r tơring, jơnŭm jang tơpôl, anih jang tơlĕch jang tơnăp.