Đơ̆ng rŏng 3 sơnăm, rim kơdră, rim anih jang kơ dêh char Kon Tum pơjing, hơtŏk tơiung 866 tơdrong jang tơgŭm băl jang mŭk drăm, choh hơmet ming pơgar ‘long sơng đei vă jê̆ 10.600 ŭnh hnam dơnuh hin, vă jê̆ dơnuh hin bơngai kon kông vang jang.

Dôm tơdrong jang hlôi hơvơn đei hloh 96 ti hlak jên tơgŭm hơdrĕch, ki thuơ̆t tơgŭm hloh 5.500 ŭnh hnam dơnuh hon bơngai kon kông yak tŏk klăih đơ̆ng dơnuh hin kơjăp. Jô̆ truh hơtuch sơnăm 2023 lơ̆m dêh char Kon Tum oei hloh 10.200 ŭnh hnam dơnuh hin, lơ̆m noh hloh 9.700 ŭnh hnam dơnuh hin ‘noh bơngai kon kông đei kơsô̆ 95%. Vă pơtrŭt kon pơlei pơ̆n jang, hơdrin klăih đơ̆ng dơnuh hin tơpă, Anih jang Đảng dêh char Kon Tum gô hơnơ̆ng tơlĕch jang lơ trong jang. Lơ̆m noh, dêh char gô akŏm lơ̆m tơdrong jang pơm tơlĕch tĕch mơdro.