Tơjur 10% ŭnh hnam dơnuh hrei au uơ oei-dôm sơnăm hơdrol, ‘nau jĭ kơsô̆ hơpơi ‘meh đei, đei ‘măng ưh kơ pơ̆n tơchĕng truh lơ̆m jang kiơ̆ Tơdrong jang tơjur dơnuh tơ̆ rim tơring Tây Bắc rim sơnăm, kơ yuơ yan au, kơsô̆ iŏk đei lăp đơ̆ng 3 – 4%. Mă lei tơ̆ apŭng sơlam teh đak Sông Mã, dêh char Sơn La, lơ̆m 3 sơnăm kơ au, tơjur dơnuh iŏk đei lơ̆m sơnăm truh kơsô̆ 10%. Mĭnh ƀar tơring nhen Chiềng Khoong, Mường Hung… kơsô̆ iŏk đei lơ hloh kơ ‘noh dơ̆ng. Ƀok Đặng Văn Cương, Kơ iĕng Kơdră chĕp pơgơ̆r Hơnih vei lăng kon pơlei tơring Chiềng Khoong, apŭng Sông Mã, dêh char Sơn La tơbăt:“Lơ̆m dôm sơnăm au ki, tơring Chiềng Khoong hlôi tơjur đơ̆ng 10 truh 14% ŭnh hnam dơnuh, nhen sơnăm 2023 ‘noh 14%; trong tơlĕch jang lơ̆m sơnăm 2024 ‘noh 12%”.

Kiơ̆ đơ̆ng ƀok Cương, iŏk đei jơnei au ‘noh gơnơm khul kơdră chĕp pơgơ̆r Đảng, kơdră chĕp pơgơ̆r kơpal đơ̆ng dêh char truh apŭng, tơring hlôi iung jang đĭ ai lơ̆m tơplih ‘long pơtăm, kon tơrong kiơ̆ trong atŏk tơ iung rim ‘long pơtăm, kon tơrong măt, trŏ lăp hăm tơdrong đei, rơvơn kơ tơring. Nhen tơring Chiềng Khoong, pơgĕnh mir pơgar să, jang kiơ̆ trong tơlĕch jang kơ dêh char, apŭng găh tơplih hơgăt teh pơtăm hơƀo, ƀum ưh kơ jing ‘lơ̆ng pơtăm ‘long sa plei, truh dang ei, hơgăt teh pơtăm ‘long sa plei kơ tơring hlôi truh 1.400 ha; lơ̆m au hơdrô̆ nhãn hloh 1.100 ha.  

Tơ̆ dêh char Yên Bái, sơkơ̆t hơdăh Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông jăl jang 2021-2030 ‘noh jĭ tơdrong kăl hloh lơ̆m jang kiơ̆ atŏk tơ iung kơjăp ‘lơ̆ng tơring kon kông păng groi kông, kơ yuơ lơ loh tơring hlôi hơtŏk kơtang tơlĕch jang kiơ̆ tơdrong jang au. Lơ̆m au ‘ngoăih pơgơ̆r hop akŏm pơtho tơbăt, Yên Bái jei lăng kơjăp ăn rim khul năm hŏk pơhrăm dôm trong jang sa hơ iă tơ̆ mĭnh ƀar dêh char lơ̆m teh đak găh rim tơdrong jang mŭk drăm iŏk đei jơnei kơjăp, vă pơm tơplih jơhngơ̆m đon tơchĕng, hơtŏk jơhngơ̆m đon hlôh vao ăn kon kông lơ̆m atŏk tơ iung mŭk drăm păng atŏk kơtang tơjur dơnuh. Ƀok Giàng A Tuấn oei tơ̆ tơring La Pán Tẩn, apŭng Mù Cang Chải, Yên Bái tơbăt:“Lăp đơ̆ng rŏng hŏk pơhrăm ‘noh ba tơchă đei tơdrong jang, jang mĭnh năr iŏk đei đơ̆ng 400- 500.000 hlak jên”.

 ‘Ngoăih kon jên jang đơ̆ng Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông jăl jang 2021-2030, đơ̆ng blŭng jăl jang truh dang ei, dêh char Yên Bái jei chă hơvơn đơ̆ng lơ hơnih vă đei dơ̆ng 12.000 ti hlak jên atŏk tơ iung mŭk drăm -tơpôl tơring kon kông păng groi kông, akŏm lơ̆m tơgŭm ăn choh jang sa, tơmơ̆t jên jang pơm trong nơnăm, pơtho pơhrăm, jang pơgang, tơjur dơnuh, tơ iung pơjing tơring tơrang ‘nao ... Gơnơm đơ̆ng noh, ŭnh hnam dơnuh lơ̆m dêh char sơnăm 2023 hlôi tơjur 3,76%, jơnei lơ hloh trong tơlĕch jang ‘noh 3,5%.

70 sơnăm đơ̆ng rŏng kơ đei iŏk jơnei, Điện Biên hrei âu hlôi jing minh lơ̆m dôm dêh char hơtŏk tơ-iung tenh lơ̆m kơsô̆ 14 dêh char tơring Tơmăn păng tơring groi kông gah Tu. Sơnăm 2023, tơdrong hơtŏk GRDP kơ dêh char đei 7,1%, kơjung hloh pơtêng hăm Tơchơ̆t Hop akŏm Anih jang Đảng dêh char, đei jơnei kơjung hloh pơtêng hăm pơkăp hơtŭm kơ teh đak, oei lơ̆m khŭl hơgơ̆l kơ 14 dêh char lơ̆m tơring tơmăn păng groi kông gah Tu. Tơdrong đei yoa đơ̆ng jang tơmang pơhiơ̆ jô̆ đei 1.750 ti hlj păng adoi jĭ sơnăm mă blŭng tơmang pơhiơ̆ kơ dêh char sơng đei 1 triu ‘nu tơmoi. Kơsô̆ unh hnam hin dơnuh oei pă pơhlom 26%. 

Ƀok  Lê Thành Đô, Kơdră Anih jang vei lăng kon pơlei dêh char Điện Biên ăn tơbăt: Kĕ đei jơnei âu ‘noh gơnơm tơring hlôi iŏk jang kơjăp mŭk drăm, tơdrong pran hlôi đei, mă kăl ‘noh kơjă gru gra kăp gĭt kơdrăn tơblah Điện Biên Phủ; hơtŏk jang tơnăp dôm kơsô̆ jên asong jang. Atŭm hăm ‘noh athei jang drơ̆ng minh, tơnăp dôm sơnong jang, hơtŏk bơngai jang, mă kăl noh bơngai jang hơgei ăn dôm tơdrong jang dơnơm, tơdrong jang pran nhen jang kơmăi kơmŏk ‘nao, choh jang xa kiơ̆ trong ‘nao hơgei, jang tơmang pơhiơ̆...

Ƀok Lê Thành Đô, Kơdră Anih jang vei lăng kon pơlei dêh char Điện Biên ră hơdah: “Lơ̆m khei năr truh, đe kơdră dêh char tơchơ̆t gô hơdrin, hơbĕch lơ̆m tơdrong tơplih pơm jang lơ̆m chă pơgơ̆r jang kiơ̆ tơchơ̆t yak hloh rim tơdrong tơnap tap, khŏm mă tơ-iung pơjing păng hơtŏk dêh char Điện Biên jing dêh char hơtŏk tơ-iung pran hloh lơ̆m tơring”.

Tơdrong pơm kiơ̆ tơchơ̆t tơjur hin dơnuh tenh, kơjăp sơđơ̆ng tơ̆ dôm dêh char Tây Bắc hlôi đei iŏk jơnei kăp gĭt đơ̆ng dôm jăl pơgơ̆r tơring pơgơ̆r jang hadoi kiơ̆ tơdrong kĕ jang tơ̆ tơring; hơvơn tôm anih jang chĭnh trĭ atŭm pơm jang păng chă hơlen iŏk yoa dôm tơdrong pran kĕ đei kơ rim tơring... Mă kăl, Tơchơ̆t kơsô̆ 11 năr 10/2/2022  đơ̆ng Anih tơm Chĭnh trĭ gah trong jang hơtŏk mŭk drăm – tơpôl, vei sơđơ̆ng tơpôl tơring Tơmăng păng groi kông gah Tu truh sơnăm 2030, sơkơ̆t lăng truh sơnăm 2045 hlôi, tŏk bŏk đei tơlĕch jang gô jĭ tơdrong pơtơm jang tơgŭm ăn tơring âu hơtŏk tơ-iung pran kơjăp hloh.