Pơma dơnuh hăm kơdră chĕp kơ̆l dêh char Kon Tum, khŭl kơdră păng kon pơlei apŭng Kon Rẫy tơ̆ jơ pơjao asong tơmam, yă Võ Thị Ánh Xuân pơma hơdăh hơnăp jang, anih dơ̆ng gĭt kăl đơ̆ng tơring Kon Tum lơ̆m 2 ‘măng tơblăh hŭt ayăt Phalăng, Mi păng jơhngơ̆m đon tơgoăt tơgoăl, iung tơblăh kơtang đơ̆ng kon pơlei dôm hơdrĕch hơdrŭng lơ̆m dêh char.

Bơngơ̆t truh tơdrong arih sa kon pơlei dôm hơdrĕch kon kông, yă Võ Thị Ánh Xuân ‘meh vă kơdră đảng, khŭl kơdră dêh char Kon Tum hơnơ̆ng bơ̆jang kiơ̆ đei yua trong jang tơgŭm hơdrĕch kon kông vă pơm kơđeh hloh dơ̆ng hơtăih hơtŏk tơiung đơ̆ng dôm hơdrĕch hơdrŭng, tơring vă đĭ đăng kon pơlei đei sa yua tôm tơdrong jơnei kach mang; hơdai hăm ‘noh jĭ tơgĕch iŏk tơdrong chĕp kơ̆l đơ̆ng Đảng, Teh đak kŭm nhen hơvơn, tơgep lơ kon jên, mă loi ‘noh jĭ tơmơ̆t jên jang đơ̆ng dôm tơdrong jang tơm teh đak vă hơtŏk tơiung jang pơgang, pơtho pơhrăm, vei lăng tơdrong joăt so păng jang kiơ̆ ‘lơ̆ng trong jang tơgŭm vei sơđơ̆ng tơdrong arih sa - tơpôl.