Khei ‘Mêm bơnat sơnăm âu đei pơgơ̆r đơ̆ng năr 1 truh năr 31/5, mă tơm noh đơ̆ng năr 8 truh năr 19/5 păng đei tơlĕch jang lơ̆m jơ̆p dêh char, hơdrin tơgŭm đei tŏ sĕt jat noh 1.000 anih kăl tơgŭm ‘mêm bơnat.

Yă Ayun H’Hương, Kơdră Anih jang ‘Long pơglang brê dêh char Đăk Lăk ăn tơbăt, hăm hơnăn  “Hơyak jang ‘mêm bơnat  - Pơjao sơng ‘mêm kơ-eng”, Khei ‘Mêm bơnat sơnăm âu tơrĕk truh đon bơnôh ‘mêm bơnat mă tơ̆ noh rim bơngai adoi gơh vang jang, tơgop, tơguăt, vang glơng păng tơgŭm hăm tơdrong ‘mêm kơ-eng, kơchăng chă tơgŭm ăn dôm bơngai đei tơdrong hơrih tơnap tap, hơtŏk dôm tơdrong jang ‘lơ̆ng, tơgop pơjing minh jơnŭm tơpôl tơguăt tơguăl, ‘mêm kơ-eng dih băl.