
Amai Rơ Lan Thuen, Mnuih djuê ana Jarai ti ƀuôn Doch Krot, khua êpul hgŭm ƀĭng ngă lŏ hma ti să Ia Krăi, kdriêk Ia Grai, čar Gia Lai jing gru hmô tlaih ƀun. Mơ̆ng gŏ sang ƀun ƀin, ung mô̆ ñu čô̆ kơ bruă mơ̆ng 2 3 sao lăn. Thŭn 2005, gŏ sang ñu lĭng čan 30 êklăk prăk mơ̆ng Agribank – anôk bruă ti Gia Lai čiăng pla kphê. Kyua mă bruă kreh kriăng, hriăm mơ̆ng pô mkăn, 4 thŭn êdei, đang kphê sang ñu hrui wĭt giăm 5 tôn. Leh mâo prăk, gŏ sang ñu pŏk mlar klei mkra mjing, pla ksu, kphê, durian. Đang pla mjing 7ha, truh kơ ară anei 5ha mâo hnư hrui wĭt. Ung mô̆ amai Rơ Lan Thuen dưi rŭ mdơ̆ng sang mrâo. Amai Thuen brei thâo, kyua mâo prăk čan mơ̆ng knơ̆ng prăk, ung mô̆ ñu dưi duh bi liê mă bruă, tlaih mơ̆ng klei ƀun ƀin:
“Thŭn 2020, gŏ sang lŏ blei thiăm 2ha hma kphê kyua ƀuh đang kphê mrâo blei ñu khualeh, amâo mâo boh lu ôh, hmei rŭ leh năn lŏ pla mrâo. Ciăng mâo thiăm prăk hrui wĭt hlăm sa ênhă lăn, hmei lŏ pla pluă mbĭt durian. Sơnăn srăng mâo boh tŭ dưn hĭn hŏng pla sa mta.”

Rơ Lan Huăn, mnuih Jarai ti ƀuon Cuc, să Ia O, kdriêk Ia Grai, čar Gia Lai jing gru hmô tlaih ƀun mơ̆ng dua bĕ kngan. Êlâo dih, gŏ sang ñu hdĭp hŏng bruă buh mdiê, lua mnah leh anăn mă kyâo, jêñ jêñ ư̆ êpa, čang guôn braih arăng đru. Klei hdĭp ñu mâo klei mlih mơ̆ng hlăk ñu duh bi liê kơ kñŭl, mâo arăng brei mjeh, ƀiă mmông kriê dlăng. Hŏng 3ha kñŭl, grăp thŭn gŏ sang ñu hrui wĭt êbeh 150 êklăk prăk. Mâo ênoh prăk čan mơ̆ng Agribank, ñi lŏ dơ̆ng duh bi liê pla thiăm ksu, kphê, durian, ƀrư̆ ƀrư̆ mđĭ hnư hrui wĭt. Ară anei gŏ sang ñu lŏ rông 9 drei êmô. Rơ Lan Huăn, brei thâo, jih jang đang pla mjing leh anăn êmô ară anei mâo mơ̆ng klei lĭng čan prăk mơ̆ng knơ̆ng prăk:
“Êlâo dih gŏ sang kâo lĭng čan 200 êklăk prăk čiăng blei ana mjeh kphê, durian. Leh sa wưng dlăng kriê, gŏ sang ăt mâo hnư hrui wĭt hơĭt. Mơ̆ng dŭm mta ana pla mjing anei, êjai mâo prăk, kâo dưi mdơ̆ng sang. Lač jăk kơ Knŭk Kna mkŏ mjing klei găl kơ mnuih ƀuôn sang hmei mđĭ kyar bruă duh mkra, bi hơĭt klei hdĭp mda.”

Ară anei, êbeh 4.270 gŏ sang ti kdriêk Ia Grai, čar Gia Lai lĭng čan mơ̆ng Agribank hŏng ênoh prăk čan êbeh 1.000 êklai prăk, hlăm anăn êbeh 1.200 gŏ sang jing mnuih djuê ƀiă. Ngăn prăk anei lu jing dưi duh bi liê kơ klei pla mjing leh anăn rông mnơ̆ng. Nguyễn Thị Lành, khua dlăng bruă Đảng kdriêk, khua Êpul gơ̆ng bruă ƀuôn sang kdriêk Ia Grai brei thâo, kyua dưi dưn mơ̆ng hdră brei čan prăk mnga hdjul mơ̆ng Knŭk Kna, lu gŏ sang dưi tlaih ƀun leh anăn bi hơĭt klei hdĭp.
“Knơ̆ng prăk Agribank kdriêk Ia Grai đru leh kơ mnuih ƀuôn sang ti alŭ wăl đĭ kyar bruă mnia mblei, mkŏ wĭt ana pla mjig, mnơ̆ng rông, mơ̆ng anwn đru mkŏ wĭt bruă duh mkra hlăm bruă lŏ hma leh anăn mđĭ kyar bruă duh mkra ala ƀuôn mơ̆ng kdriêk. Boh nik, ênoh prăk čan anei đru hlăm bruă bi hrŏ ƀun leh anăn mkŏ mkra krĭng ƀuôn sang mrâo.”

Ti čar Gia Lai, ênoh prăk čan bi lar boh tŭ dưn hlăm bruă mkŏ wĭt bruă lŏ hma. Knơ̆ng prăk nao jĕ hŏng mnuih ƀuôn sang hĭn hŏng bruă pŏk anôk hiu ngă bruă, đru truh ti dŭm să, brei kơ mnuih ƀuôn sang lĭng čan mâo klei găl mkiêt mkriêm leh anăn luč ƀiă hruê mmông. Hră mơar lĭng čan ăt găl ênưih hĭn hŏng mnuih ƀuôn sang jing mnuih djuê ƀiă. Dŭm klei mlih anei đru kơ mnuih ƀuôn sang ƀuôn sang dưi lĭng čan ênưih, djŏ guôp hŏng boh sĭt ti alŭ wăl.
Đào Thanh Tịnh, k’iăng khua knơ̆ng prăk Agribank Gia Lai brei thâo, lu gŏ sang mnuih djuê ƀiă ăt adôk hŭi kyua hră mơar mơ̆ng knơ̆ng prăk. Mơ̆ng boh sĭt anăn, Agribank Gia Lai ngă klei bi hmô sa ƀăng ti dŭm anôk ngă bruă nah gŭ, bi êdah klă leh anăn đru kơ mnuih ƀuôn sang ngă hră mơar mơ̆ng mphŭn truh kơ brei čan. Kmơ̆ng prăt ăt bi mguôp hŏng Bruă sang čư̆ êa alŭ wăl, dŭm êpul dhar bruă msĕ si Êpul hgŭm ƀĭng ngă lŏ hma, Êpul bruă phung mniê leh anăn phung khua êpul mâo kơhưm čiăng hâo hưn hdră êlan, jing kdrông mkŏ plah wah knơ̆ng prăk hŏng mnuih ƀuôn sang. Đào Thanh Tịnh lŏ brei thâo:
“Hmei mđing kơ boh tŭ dưn hluê ngă hdră lĭng čan mơ̆ng Knŭk Kna, brei čan prăk mnga hdjul msĕ si hdră mtrŭn 55/2015, hdră mtrŭn 116/2018, đru lŏ wĭt pla kphê, brei čan mkŏ mkra krĭng ƀuôn sang mrâo…čiăng đrư kơ mnuih ƀuôn sang pŏk mlar bruă mnia mblei, bi hơĭt klei hdĭp. Hmei mtrŭt mđĭ klei bi hmô brei čan hŏng êpul lĭng čan. Anei jing mbah ba prăk tŭ dưn, jing anôk mnuih ƀuôn sang bi đru, kah mbha klei hriăm, ngă ngă bruă hlăm klei mkra mjing.”
Yap truh hruê 30/4, čar Gia Lai mkŏ mjing mrâo 461 êpul lĭng čan hŏng 18.800 čô hgŭm, prăk brei čan 713 êklai prăk. Dŭm êpul lĭng čan mâo bruă klam yuôm bhăn hlăm bruă ba ngăn prăk kơ kngan mnuih ƀuôn sang. Kyua mâo dŭm klei mlih hlăm hdră lĭng čan, mnuih ƀuôn sang Gia Lai ară anei dưi čan ênưih hĭn leh anăn pral. Anei jing boh kdrŭt yuôm bhăn đru kơ diñu găn klei dleh dlan, tlaih ƀun hơĭt kjăp leh anăn mđĭ kyar klei hdĭp mda gŏ sang. Mbĭt anăn, bruă lĭng čan ăt đru hlăm bruă mkŏ wĭt bruă lŏ hma ti alŭ wăl, mđing truh kơ bruă lŏ hma tŭ dưn leh anăn hơ̆ĭt kjăp hĭn, pŏk klei găl bi mdrŏng kơ mnuih ƀuôn sang krĭng čư̆ čhiăng.
Viết bình luận