Ƀĭng lŏ hma ča Gia Lai dôk mŭt hlăm yan hrui êmiêt durian 2025. Wăt tơdah mâo lu klei hâo hưn dleh dlan hlăm bruă ba čhĭ kơ ala tač êngao, ƀiădah kyua rơ̆ng hnơ̆ng jăk, phung pla mjing ti čar Gia Lai ăt čhĭ hŏng ênoh mơ̆ng 55 êbâo truh 70 êbâo prăk/kg tui hlue si mta, jing klei bi knăl jăk kơ yan durian tŭ dưn. Ară anei, kluôm čar Gia Lai mâo hlăm brô 8.200ha durian, kƀĭn ti dŭm kdriêk Ia Grai, Čư̆ Sê, Čư̆ Pưh, Đak Đoa, Mang Yang, Čư̆ Prông, Đức Cơ…

Hnơ̆ng kah knar mâo 14,8 ton/ha, leh anăn dŭm đang dưi kriê dlăng jăk, ênoh mrô anei srăng mâo mơ̆ng 20 truh 30 ton/ha. Hlăm anăn, hlăm brô 5000ha dôk hlăm wưng pĕ boh, mĭn tĭng hnơ̆ng kluôm čar mâo 75 êbâo ton. Boh nik, Gia Lai mâo mkăp leh 54 mrô krĭng pla mjing hŏng ênhă 1.281ha, đru kơ durian alŭ wăl ba čhĭ ti lu ala tač êngao msĕ si China, Mi, New Zealand leh anăn Australia. Truh thŭn 2030, čar tă hdră pŏk mlar ênhă durian truh 10.000ha, hŏng hdră kñăm mkŏ mjing mrô krĭng pla mjing kơ grăp 10 ha leh anăn ba yua hnơ̆ng čuăn GlobalGAP kñăm ngă djăp klei kčah blei yua.