Hlăm wưng anei dôk mâo lu mta klei ruă tưp kơ ŭn êmô, mnŭ ada ênưih anăp lĕ hlăm klei ruă tưp prŏng. Êjai boh klei msĕ snăn,Daklak hlăk dôk mđĭ hĭn bruă gang mkhư̆ klei ruă tưp, kñăm răng mgang kjăp mnơ̆ng rông lehanăn kơ mnuih rông mnơ̆ng. Hâo mdah hŏng anôk bruă rông mnơ̆ng, lehanăn bruă mdrao mgŭn mnơ̆ng rông čar Daklak brei thâo, ară anei klei ruă tưp hlăm čar dleh dưi ksiêm dlăng.

Anôk mâo lu êdi jing nah ngŏ čar, (hlăm čar Phú Yên hđăp) lŏ dơ̆ng čih yap dŭm anôk mâo klei ruă tưp klei ruă tian ô̆ eh kơ ŭn, mgô̆ anôk bruă djŏ tuôm lehanăn mnuih rông mnơ̆ng ba bi rai jih ŭn mâo klei ruă, gang mkhư̆ klei tưp lar. Hlăm 6 mlan akŏ thŭn anei, hlăm čar mâo leh 6 čô mnuih djiê kyua asâo khŏ kĕ, snăn brei ƀuh klei ruă asâo khŏ lŏ bluh đĭ hlăm čar. Đặng Thị Thủy, K’iăng khua knơ̆ng bruă lŏ hma, wăl hdĭp mda čar Daklak brei thâo, mbĭt hŏng klei tlŏ mgang, mdjiê kman anôk bruă djŏ tuôm čar srăng ksiêm kjăp klei dŭ mdiăng, klei tă čuh, čhĭ mnia kđeh čĭm ŭn mnŭ; lehanăn ktrâo atăt kơ phung rông mnơ̆ng ngă bruă mkŏ mjing klei rông doh, bi mdoh war êning, hmao thâo ƀuh bi pral klei ruă tưp, mkhư̆ bi jih./.