Čar Daklak ară anei mâo hlăm brô 41.000 ha đang boh durian, hŏng ênoh đăo tĭng srăng mâo hlăm brô 400.000 tôn, đĭ pral mkă hŏng thŭn êlâo. Hnơ̆ng prŏng hĭn mâo ba wĭt ăt jing klei ktrŏ  kơ hnơ̆ng jăk, boh nik leh alŭ wăl bi kluh pla mjing boh durian sơăi, amâo mâo pô kriê dlăng hnơ̆ng jăk. Amâo mâo djăp ôh ênoh čuăn, hmăi amâo mâo jăk kơ bruă boh durian. Nguyễn Thị Thành Thực, Khua êpul gơ̆ng bruă kiă kriê knơ̆ng bruă AutoAgri lač, bruă pla mjing boh durian ti Daklak adôk mâo lu klei găl snăk, bruă sang čư̆ êa lehanăn bruă sang čư̆ êa mđing kơ bruă mrô knăl krĭng pla mjing:

 “Mrô knăl krĭng pla mjing phŭn jing phŭn agha mơ̆ng pô pla mjing, ƀiădah mâo leh lu phung duh mkra mčhua hŏng mrô knăl ngă bi jhat, truh kơ ala čar China arăng mdei mrô knăl kơ hmei, snăn hmei lĕ hlăm klei luič liê. Kâo čang hmăng kơ bruă sang čư̆ êa , dŭm knơ̆ng dhar bruă mkŏ mjing bruă čuăn sa thŭn bi mghaih msir, mkŏ mjing lu mrô knăl anôk pla mjing”.

 Knơ̆ng bruă lŏ hma lehanăn wăl hdĭp mda čar daklak bi hgŭm hŏng êpul hgŭm bruă durian čar lehanăn phung duh mkra, êpul hgŭm bruă, mđĭư bruă ksiêm kơ hnơ̆ng jăk, mă mkă dlăng hnơ̆ng jăk boh kroh, ƀuăn amâo mâo ba yua mta kăm, boh nik ksiêm ktang klei ba yua mta kñĭ lehanăn cadimi. Lê Anh Trung – Khua kiă kriê êpul hgŭm boh durian Daklak, brei thâo:

“Êpul hgŭm mâo leh klei bi mguôp hŏng anôk bruă ksiêm duah, mbĭt hŏng phung duh mkra, êpul hgŭm bruă mă mta pioh ksiêm hlăm krĭng čar Daklak lehanăn krĭng êđăp ênang mjing klei đăo knang kơ bruă bi mnia mblei plah wah coh durian čhĭ kơ ala tač êngao, lehanăn klei bi čhĭ mnia. Hlăm jih hdră êlan doh hmei hlăk ktrâo atăt phung duh mkra mâo klei bi mguôp hŏng anôk bruă răng mgang mnơ̆ng pla mjing mkŏ mjing ênoh čuăn kơ bruă tui duah klă phŭn agha anôk pla mjing hŏng hdră klă mngač. Mơ̆ng ană srăng bi hrŏ klei djŏ tuôm hlăm klei ksiêm dlăng. Hrue mmông bi mnia mblei pral”.

          Êpul hgŭm bruă mâo klei mtă kơ mnuih ƀuôn sang amâo mâo dưi čhĭ mda ôh tơdah ka truh ôh hrue ksă, kñăm čiăng đăm lĕ hlăm klei kpĭ ênoh, amâodah ngă luič kơhưm pô. Phung duh mkra, êpul hgŭm bruă brei ngă klei ƀuăn rơ̆ng bi mâo djăp ênoh čuăn, wăt hlăm klei đŭng hruh, lehanăn dưi mâo djăp ngăn prăk huĭdah lĕ hlăm klei arăng hngah, ênưih ba klei amâo mâo jăk kơ mnuih pla mjing.

Čiăng kơ boh durian Daklak klă cĭt dưi truh hŏng tar rŏng lăn, snăn brei mâo mtam hdră mă bruă doh mơ̆ng klei dlăng kriê wiê ênăk, djăp ênoh čuăn hlăm hdră mă bruă, mă bruă hlăm klei klă mngač truh kơ klei kăp ksiêm jih jang hdră êlan mă bruă. Bruă sang čư̆ êa, phung duh mkra, lehanăn mnuih pla mjing bi mđrăm mbĭt mkŏ mjign bruă boh durian klă sĭt jing jăk lehanăn mâo klei kjăp nanao djăp ai ktang hlăm klei bi mnia mblei hŏng ala tač êngao. Hlăm klei mđrăm mbĭt hŏng bruă sang čư̆ êa, lehanăn dŭm dhar bruă djŏ tuôm, klei gĭr mơ̆ng phung pla mjing lehanăn phung duh mkra, Daklak gĭt păn kjăp anăn knăl boh durian doh siam, ƀrư̆ ƀrư̆ pŏk anôk mnia mblei boh durian Việt Nam đĭ nanao hlăm hla kak klei mnia mblei boh mnga hŏng ala tač êngao./.