Amâo mâo lu boh blŭ, klei rang mdah Chum show - Klei kčŭm mơ̆ng klei kdŏ mmuñ, ba phung nao dlăng truh kơ anôk mkăn, anôk klei hdĭp aguah tlam dưi yăl dliê hŏng boh blŭ anôk kdŏ mmuñ mrâo mrang. Ênai kdrăp pĕ tông dŭm djuê ana kwang, mmông đĭ, mmông trŭn hluê si pui mngač, phung kdŏ mmuñ bi yuôt klei, dar, phưi leh anăn lŏ kgŭ hlăm ênhiang mmuñ, leh anăn dŭm boh chum, êjai jing kdrăp mnơ̆ng yua, êjai jing sa kdrêč hlăm klei yăl dliê.

Ktuê dlăng amâo mâo đuê̆ ti anôk mdah, Bachtijar, sa čô tuê mnuih Russia, bi êdah klei khăp pô:

“Kâo lač hŏng jih ai tiê, jăk êdi yơh. Mmông rang mdah anei jing jăk êdi. Hmei, phung tuê mơ̆ng Russia, khăp êdi kơ phung kdŏ mmuñ hlăm hdră”.

Hlăm anôk pui mngač anôk kdŏ mmuñ, klei yuôt klei, phiơr nah dlông amâodah klei duah ƀhir chum ngă truh klei dlăng jăk êdi. Mơ̆ng klei mgei asei mlei, djă yua kdrăp mnơ̆ng, truh kơ ngă pô wăl anôk nah dlông mơ̆ng phung kdŏ mmuñ, jih jang đru mguôp bi yăl dliê bŏ hŏng mgei ai tiê.

Hluê si ayŏng Nguyễn Minh Hậu, pô kdŏ hŏng asei mlei, čiăng dưi rang mdah ti anôk kdŏ mmuñ jing sa hdră hriăm mjuăt hŏng lu klei kpĭ.

“Hŏng kâo ñu dleh sơnăk amâo mâo ênưih ôh. Hmei hriăm luh êa hŏ hang, luh êa ală, đa đa kbiă wăt êrah, čiăng dưi bi leh sa hdră. Ai tiê grăp blư̆ mdah jing mdê mdê, amâo mâo blư̆ msĕ ôh”.

Amâo djŏ knŏng bi êdah klei jăk hŏng klei ƀuh, Chum Show mkŏ mjing wăl anôk ênai mdê hĭn. Tinăn, klei mmuñ amâo lŏ jing mnơ̆ng đru, ƀiădah jing sa kdrêč mơ̆ng klei yăl dliê.

Hŏng klei nao hgŭm mơ̆ng phung thâo mbruă mơ̆ng lu êpul êya mdê mdê, dŭm ênai mưng aguah tlam mơ̆ng dŭm djuê ana msĕ si Ê Đê, Chăm, Raglai amâodah Kinh, êjai dôk mdê dưi dlăng jăk êdi, ƀiădah dưm hlăm wăl anôk kdŏ mmuñ, dlăng msĕ jĕ ƀiădah ăt kbưi. Dŭm mta dhar kreh amâodưi bi ktlah, ƀiădah nao mbĭt hŏng klei kpư̆ mgei phung kdŏ mmuñ, hŏng ênhiang anôk kdŏ mmuñ.

Amai Trương Thu Hương, pô kiă kriê hdră brei thâo: kyua klei bi mguôp anei mkŏ mjing klei êlam kơ klei rang mdah.

“Lu djuê ana tinei leh anăn mơ̆ng dhar kreh diñu, diñu ba truh dŭm mta jing kdrăp pĕ tông nao mbĭt hŏng klei hdĭp dhar kreh amâodah kdrăp pĕ tông đru kơ anôk kdŏ mmuñ. Hmei duah hdră bi kƀĭn jih jang mta anăn hŏng bruă grăp čô mĭn ti mmông anăn mtam, kah mbah klei yăl dliê kơ dhar kreh”.

Chum, mta mnơ̆ng yua hlăm klei hdĭp mnuih djuê ana Chăm ti Dhŭng kwar krah - Lăn Dap Kngư jing leh mnơ̆ng bi hmô phŭn. Êjai dưi djă ĭn, êjai dưi ƀhir, êjai dưi mdưm hlăm klei blŭ hrăm hŏng anak mnuih leh anăn wăl anôk, chum amâo lŏ djŏ mnơ̆ng dôk sa anôk ƀiădah jing sa kdrêč hlăm klei yăl dliê, dưi yăl dliê hŏng klei kpư̆ mgei, ênai leh anăn pui mngač.

Hluê si Nguyễn Thị Thảo Nguyên, pô bi ala sang mmuñ Đó, ƀuôn hgŭm Bắc Nha Trang, čar Khánh Hoà, hdră dưi mkŏ mjing hŏng klei hmăng hmưi djă pioh dŭm boh tŭ dưn dhar kreh, ƀiădah hŏng klei bi êdah mrâo.

“Chum show jing show rang mdah dhar kreh bi kƀĭn plah wah 2 dhar kreh Chăm, Lăn Dap Kngư leh anăn Yuăn, mâo jih jang 6 kdrêč dŭt, hlăm grăp kdrêč jing sa wăl anôk, bi êdah klei đĭ kyar mơ̆ng klei hdĭp. Mta kñăm mơ̆ng show jing djă pioh, mđĭ kyar leh anăn bi mni kơ dhar kreh mnuih djuê ƀiă Việt Nam”.

Hlăm wăl anôk kdŏ mmuñ mrâo mrang, dŭm boh tŭ dhar kreh knhuah gru dưi ba yua găl guôp, amâodjŏ knŏng bi êdah ƀiădah dưi bi mrâo čiăng găl guôp hŏng klei hdĭp hruê anei. Mơ̆ng anăn, lŏ dơ̆ng mâo ƀô̆ mta leh anăn bi lar hlăm ai tiê êpul êya, boh nik anôk phung tuê êjai nao ti ƀuôn prŏng êa ksĭ Nha Trang./.