Amai Đỗ Thị Mỹ Duyên, 24 thŭn, ti ƀuôn hgŭm Ƀuôn Ama Thuô̆t, čar Dak Lak brei thâo, hla pŏk yang ƀuôn ară anei jing anôk mjĕ mjuk, hlăp lêñ leh anăn jing anôk ktuê dlăng klei mrâo. Boh nik, hlăm gưl angĭn êbŭ, êa lêč, klei đru dŏng mjêč mâo nanao klei hưn. Klei amâo jăk jing dŭm klei hưn hđăp hŏng mrâo mtŭk mtŭl, đa đa klei hưn amâo mâo djŏ. Mơ̆ng gưl  angĭn êbŭ êa lêč ka tuôm mâo bi rai Lăn Dap Kngư - Dhŭng kwar krah, amai Duyên thâo yua lu hla pŏk yang ƀuôn leh anăn ƀuh dŭm fanpage mơ̆ng êpul kahan ksiêm, dưi pral rơ̆ng kjăp, lu jơr leh anăn đăo knang. Mơ̆ng anăn Amai Đỗ Thị Mỹ Duyên kreh ktuê dlăng dŭm fanpage anei:

 “Kâo kreh mŭt hlăm facebook, hlăm anăn mâo hla pŏk mơ̆ng kahan ksiêm čar Dak Lak. Tinăn kreh mđung rup. klei hưn, klei ngă soh hlăm êlan klông. Amâodah mrâo anei jing lu pŏk rup kơ klei đru dŏng, tui duah mnuih ƀuôn sang krĭng êa lip lêč ti dŭm să nah Ngŏ (čar Phú Yên hđăp). Kâo ăt kreh lŏ kah mbah, leh anăn mâo klei hơĭt amâo hŭi kơ klei hưn soh.”

Hluê ngă klei gĭt gai mơ̆ng Phŭn bruă kahan ksiêm kơ klei mlih mrô, dưn yua klei kreh knhâo mrâo mrang hlăm bruă knuă, dŭm anôk bruă kahan ksiêm čar Dak Lak mkŏ mjing fanpage sơăi. Hluê anăn, êpul kahan ksiêm mtrŭt mđĭ klei hâo hưn, hlăk mblang hdră bhiăn lăn čar, tŭ mă klei hưn mơ̆ng mnuih ƀuôn sang, đru răng mgang klei êđăp ênang leh anăn bi kdơ̆ng hŏng dŭm klei mĭn soh čhuai. Trung tá Trần Viết Nghĩa, khua êpul bruă hâo hưn, mtô mjuăt adŭ bruă kđĭ čar kahan ksiêm čar Dak Lak brei thâo fanpage “Công an tỉnh Đắk Lắk”  mơ̆ng anôk bruă klam ngă ară anei mâo êbeh 121.000 čô ktuê dlăng, giăm 9 êklăk čô ksiêm. Amâo dj knŏng mđung klei hưn kơ hdră bhiăn lăn čar, klei êđăp ênang, tŭ mă klei hưn, kčŭt hưn phung ngă soh mơ̆ng mnuih ƀuôn sang, ƀiădah lŏ mđung klei hưn iêo mthưr klei bi mguôp, bi kah mbha, đru kơ mnuih ƀuôn sang anôk yan adiê ngă.

 “Hlăm gưl êa lip lêč mrâo êgao, ti să Hoà Thịnh mâo sa čô mniê truh tian kkiêng ƀiădah ktlah hjăn kyua êa lêč. Kleui hưn mâo hmei hmao mđung hlăm fanpage leh anăn anăn mtam êpul tui duah đru dŏng kahan ksiêm să Hoà Thinh tŭ mă, pral tiŏ nao êpul ba mniê anei truh ti anôk bruă mdrao mgŭn kkiêng anak. Hmei lač anei jing klei hmao đru, klă klơ̆ng mơ̆ng fanpage truh hŏng mnuih ƀuôn sang.”

Sa fanpage tŭ dưn mkăn mơ̆ng kahan ksiêm Dak Lak jing “Phòng Cảnh sát giao thông Đắk Lắk”. Fanpage ară anei mâo êbeh 33.000 čô ktuê dlăng, hŏng êbeh 500.000 čô mŭt hlăm grăp mlan. Anei jing mbah hâo hưn hdră bhiăn êlan klông, hmao hưn kơ dŭm boh klei djŏ tuôm hŏng klei êđăp ênang hlăm êlan klông leh anăn klei êđăp ênang yang ƀuôn. Hŏng fanpage, adŭ bruă kahan ksiêm êlan klông tŭ mă rup, clih hưn mdah mơ̆ng mnuih ƀuôn sang kơ klei ngă soh hlăm êlan klông, čih mnia mnơ̆ng kăm…Trung tá Nguyễn Khiếu Nam Vũ, ngă bruă hâo hưn “Adŭ bruă kahan ksiêm êlan klông Dak Lak” brei thâo:

 “Anôk bruă mâo thiăm mbah hâo hưn tŭ mă klei hưn mơ̆ng mnuih ƀuôn sang. Hluê anăn adŭ bruă đu leh giăm 100 klei ngă soh, hŏng ênoh prăk êbeh 300 êklăk prăk. Sitôhmô, krah mlan 12, mơ̆ng klei hưn mơ̆ng mnuih ƀuôn sang ti fanpage hŏng clip 2 êdeh mdiăng tuê blah plă plia, hmei ksiêm dlăng, bi klă leh anăn ƀuah mkra 2 êdeh mdiăng tuê ngă soh. Klă klơ̆ng, klei anei mơ̆ng Đ. V. P, dôk ti să Tuy Đức, čar Lâm Đồng mngăt êdeh ôtô mrô 48B-000.XX, mâo đŭ 5 êklăk prăk leh anăn lui 2 puăng hră mgăt êdeh”.

Jih jang dŭm adŭ bruă thơ̆ng kơ bruă leh anăn kahan ksiêm 102 să, ƀuôn hgŭm hlăm kahan ksiêm čar Dak Lak mâo leh sơăi fanpage, lu pŏk iêo jak lu phung ktuê dlăng, mâo fanpage mâo dŭm êbâo čô ktuê dlăng. Mta phŭn mđung dưi ngă klă nik, lu jơr, mơ̆ng hâo hưn hdră bhiăn, răng mgang klei êđăp ênang truh kơ bruă tui duah, đru dŏng, mnuih jăk bruă jăk leh anăn bi kdơ̆ng hŏng dŭm klei hưn soh. Nguyễn Quốc Hiệp, k’iăng khua knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak bi klă, anei jing gru hmô hâo hưn găl guôp hŏng klei mlih mrô ară anei.

 “Hlăm wưng kơ anăp, knơ̆ng bruă lŏ dơ̆ng bi mguôp hŏng dŭm anôk bruă kahan ksiêm čar Dak Lak čiăng mđĭ klei hâo hưn kluôm dhuôm hĭn, đru kơ mnuih ƀuôn sang thâo pral hĭn, hmao ƀuh dŭm klei hưn hlăm dŭm fanpage dŭm dŭm êpul kahan ksiêm truh kơ mnuih ƀuôn sang. Lŏ dơ̆ng hưn mdah dŭm hla pŏk anei truh kơ mnuih ƀuôn sang, boh nik jing mnuih ƀuôn sang krĭng tlaih kbưi, krĭng mnuih djuê ƀiă, thâo dŭm fanpage anei lu hĭn.”

Klă sĭt brei ƀuh, dŭm fanpage mơ̆ng kahan ksiêm Dak Lak amâo djŏ knŏng jing mbah hâo hưn phŭn hlăm internet, ƀiădah jing leh kdrông mkŏ, đăo knang plah wah kahan ksiêm hŏng mnuih ƀuôn sang. Tinăn, klei hưn dưi hưn prak, djŏ, klei hưn mơ̆ng mnuih ƀuôn sang dưi mđing hmư̆, hmao mgaih msir, đru rơ̆ng kjăp klei êđăp ênang, bi lar ai tiê kyua mnuih ƀuôn sang ngă bruă hlăm ênuk bi mlih mrô./.