Ti msat ayang khua gĭt gai Đảng Trần Phú, khua gĭt gai Đảng tal êlâo mơ̆ng Đảng cộng sản Việt Nam, Khua gĭt gai Đảng Tô Lâm mbĭt hŏng êpul ngă bruă mơ̆ng gưl dlông myơr mnga, brui mgưi bi êdah ai tiê mpŭ leh anăn klei hdơr kyua dŭm klei duh myơr đru mguôp prŏng prĭn mơ̆ng ñu hlăm bruă cách mạng mơ̆ng Đảng leh anăn djuê ana Việt Nam. Gru hmô knhuah hdĭp, knuih kniêng cách mạng, kơhưm pô lĭng kahan cộng sản, siă suôr, amâo mâo kdŭn mơ̆ng Trần Phú mngač nanao, čiăng kơ dŭm gưl knuă druh, đảng viên leh anăn dŭm gưl mnuih ƀuôn sang hluê hriăm.

Leh kơnăn, ti wăl kriê pioh hƀuê ênuk ala čar klah 3 Đồng Lộc, Khua gĭt gai Đảng Tô Lâm leh anăn êpul ngă bruă mơ̆ng gưl dlông myơr brui mgưi, dưm kwang mnga ti Sang knưng bi hdơr phung djiê êngiă, êdam êra ba anăo kluôm ala leh anăn wăl msat 10 čô mniê jhŏng ktang djiê êngiă êdam êra ba anăp djiê leh ti Klah 3 Đồng Lộc. Klei asăn asei mlei mơ̆ng diñu jing leh gru hmô kơ klei duh myơr prŏng prĭn mơ̆ng dŭm êklăk čô êdam êra kyua lăn čar wơr asei mlei, amâo mâo hơưi ênuk thŭn mda kyua bruă mtlaih êngiê djuê ana, hluh hlir lăn čar.