Mdê hŏng ai êwa mtluk mtlak grăp thŭn, krĭng thơ̆ng pla mjing mnga Bình Kiến, nah Ngŏ čar Dak Lak dŭm hruê anei kriêp êyăng hĭn leh hmăi mơ̆ng gưl angĭn êbŭ mrô 13 leh anăn adiê hjan êa lip hlăk krah mlan 11/2025. Khădah snăn, hlăm kluôm kdrăn lŏ, mnuih ƀuôn sang ăt dôk bi tiŏ êran hŏng hruê mmông. Dŭm đang mnga cúč joh êbuh dưi lŏ rŭ hŏng gơ̆ng kram, dŭm anôk lăn huâng kyua djiê dưi êmiêt čiăng kƀĭn klei găl kơ dŭm hbŭ mnga dôk. Anei jing wưng bi mklă čiăng ba mnơ̆ng dhơ̆ng kơ anôk ba čhĭ hlăm gưl Tết Nguyên đán Bính Ngọ 2026.

Dlan dlan hĭn mơ̆ng mnuih ƀuôn sang hlăk anei jing klei ksiêm dlăng prăk bi liê mkra mjing. Leh gưl êa lip, ênoh bi liê kơ hƀâo pruê, êa drao krih kơ ana pla mjing leh anăn mnuih mă bruă kơrŭ wĭt đang pla mjing đĭ sơăi, mjing thiăm klei ktrŏ kơ mnuih ƀuôn sang tơdah ênoh prăk bi liê jih hlăm wưng akŏ yan. Nguyễn Thị Liên, ƀuôn hgŭm Bình Kiến brei thâo:

“Pô lŏ mkra mơ̆ng mphŭn, msir mgaih leh anăn lŏ mjut mjing, lŏ krih êa drao, pruê hbâo, hruê ai mă bruă luč liê prăk lu hĭn. Čang hmăng djŏ yan boh mnga čiăng mâo prăk hrui wĭt kyuadah ară anei bi liê leh lu snăk.”

 Ti dŭm đang mkra mjing, bruă kriê dlăng dôk mŭt hlăm wưng yuôm bhăn hĭn: ktĭ knuh leh anăn khăt dhan mkra mlih wưng blang. Kyua hnơ̆ng bruă lu leh anăn čiăng kơ hdră mnêč lu, dŭm gŏ êsei mnuih ƀuôn sang mưn thiăm mnuih mă bruă, ngă kơ ênoh bi liê lu hĭn. Huỳnh Thị Nho brei thâo:

“Wưng anei jing wưng mkra mlih wưng mnga b lang, krih  hbâo pruê bi jăk. Leh gưl êa lip snăn kriê dlăng dleh dlan hĭn, angĭn êbŭ ngă jhat rai lu, ai tiê ăt bi liê lu mơh. Pla mnga knŏng čiăng mâo čhĭ, dưi ƀiă ênoh bi liê leh.”

Hlue si klei ksiêm dlăng tal êlâo, ƀuôn hgŭm Bình Kiến mâo êbeh 50 ha lăn pla mjing mnga cúc dŭm mta. Ară anei, hlăm brô 50% hnơ̆ng mnga ti dŭm đang pla mjing hmăi djŏ ƀiă mâo leh phung mnia blei akâo blei. Hŏng dŭm ênhă adôk, mnuih ƀuôn sang dôk mđĭ lar kriê dlăng leh anăn ksiêm dlăng bi jăk klei đăo knăl mơ̆ng anôk ba čhĭ. Nguyễn Thị Hiển, brei thâo:

“Phung mnia blei ăt hiu akâo blei, êmuh ênoh nanao. Ară anei mnga giăm bi leh mơh, dôk guôn blang snăn arăng bi mklă srăng blei.”

Čiăng hrăm mbĭt hŏng mnuih ƀuôn sang, bruă sang čư̆ êa alŭ wăl pral mkŏ mjing dŭm hdră msir mkŏ anôk ba čhĭ, đru ba čhĭ čiăng bi hrŏ klei amâo myun kơ mnuih ƀuôn sang leh sa thŭn yan adiê ngă. Lương Thảo Nguyên, K’iăng Khua Knơ̆ng bruă sang čư̆ êa ƀuôn hgŭm Bình Kiến, čar Dak Lak, brei thâo alŭ wăl dôk gĭr bi hgŭm čiăng duah anôk ba čhĭ kjăp, đru kơ mnuih ƀuôn sang hơĭt ai tiê hlăm wưng mjêč ruăt yan mnga Tết.

“Knơ̆ng bruă sang čư̆ êa ƀuôn hgŭm mâo hdră kčah mkŏ mjing êlan mnga yan mnga hlăm ktuê êlan 1/4, dăp dŭm anôk čhĭ mnga, bi mguôp hŏng klei bi msiam čiăng mjing wăl čhĭ mnia, đru kơ mnuih ƀuôn sang ba čhĭ mnga găl jăk hlăm gưl Tết.”

 Wăt tơdah tuôm hŏng lu klei bi mlih kơ yan adiê leh anăn ênoh bi liê, ƀiădah hŏng ai tiê msir mgaih, phung pla mjing mnga Bình Kiến dôk gĭr jih ai tiê čiăng kơ yan mnga Tết thŭn anei mâo klei tŭ dưn jăk hĭn.