Hlăm sang mrâo mdơ̆ng hŏng ênoh êbeh kơ 1 êklai prăk. Dă Čăt Tư pioh ti adŭ čhưn anôk yuôl rup awa Hô, lehanăn dŭm hră bi mni čih pioh leh dŭm klei tŭ jing mơ̆ng mnuih hlăm gŏ sang tuôm mâo leh. Hlăm hip mdơ̆ng mâo dưm lu mta mnơ̆ng lehanăn hră mơar, boh nik hdruôm hră lač kơ klei bhiăn , lehanăn dhar kreh djuê ana M’Nông. Dă Čăt Tư khăp êdi kơ hdruôm hră “Dhar kreh djuê ana M’Nông” mơ̆ng ñu pô čih pioh mkra leh mơ̆ng hlăk thŭn 2013, bi klin mâo lu mta, msĕ si: klei muin bi êdah klei khăp; klei muiñ bi kmlah, klei duê, klei bhiăn… ñu lač;

 “Mơ̆ng điêt leh kâo tui nao hriăm hlăm lu anôk. Leh truh prŏng mâo klei myun mâo mŭt hriăm gưl prŏng ti ƀuôn prŏng  Hồ Chí Minh. Mơ̆ng anăn kâo thâo săng hĭn kơ klei yuôm bhăn knhuah bhiăn djuê ana M’Nông msĕ si tòng, pơ̆t, ntòng sơh lehanăn dŭm klei duê mơ̆ng djuê ana pô. Leh ruĕ hriăm, kâo wĭt hŏng ƀuôn sang, kčưm dơ̆ng tui duah, čih pioh dŭm klei duê, klei yăl dliê mjign sa hdruôm hră. Sa klei bi mlih prŏng hŏng kâo jing mâo klei myun dưi nao kơ Hà Nội lehanăn bi tuôm hŏng khua gĭt gai Nguyễn Phú Trọng. Ñu mtă mtăn kơ mnuih mâo k’hưm hlăm ƀuôn sang, lŏ bi lar ai tiê klei thâo kriê pioh knhuah gru dhar kreh djuê ana. Mơ̆ng anăn, knư̆ hĭn mơh kâo pioh hrue mmông tui duah, čih pioh dŭm klei duê, klei bi hriêng, klei yăl dliê đưm mơ̆ng djuê ana M’Nông, hŏng klei čang hmăng dưi kriê pioh kơ anak čô êdei.”

Mâo ai tiê hur har hŏng bruă kriê pioh, lehanăn bi lar knhuah gru dhar kreh djuê ana, Dà Cắt Tư mâo mkŏ mjing leh êpul tông čing ti ƀuôn Liêng Trang 1, ƀuôn Dă Nhinh 1 và Dă Nhinh 2 . Ară anei dŭm êpul tông čing anăn mâo bi lar nanao, lehanăn knư̆ hrue knư̆ lŏ đĭ hĭn, lu blư̆ mâo nao bi hgŭm lehanăn tông hŏng dŭm alŭ wăl mkăn hlăm čar Lâm Đồng. Dà Cắt Ha Tiên, hlăm êpul tông čing ti ƀuôn hgŭm  Dam Rông 4, lač:

        “Aê aduôn pô lui leh kơ pô ngăn dưn yuôm bhăn. Mơ̆ng anăn brei drei thâo tui hriăm djă pioh kjăp knhuah gru dhar kreh, đăm bi luič ôh, knhuah siam mơ̆ng djuê ana pô. Êpul tông čing hmei kreh nao hlăm dŭm klei bi lông, lehanăn mâo mă lu klei pah mni. Mơ̆ng anăn knư̆ hĭn mơh hmei thâo săng kơ klei yuôm bhăn mơ̆ng bruă kriê pioh dhar kreh dŭm djuê ana ti lăn dap kngư msĕ hŏng djuê ana M’Nông, K’Ho”.

          Čiăng đru mguôp hlăm bruă kriê pioh, lehanăn bi lar klei tŭ dưn knhuah gru dhar kreh yuôm bhăn mơ̆ng djăp djuê ana. Mrâo anei, bruă sang čư̆ êa alŭ wăl lŏ mprăp brei leh 2 rĭng čing kơ dŭm êpul. Liêng Hót Ngát, pô thơ̆ng kơ bruă mơ̆ng adŭ bruă dhar kreh ƀuôn hgŭm Dam Rông 4, čar Lâm Đồng brei thâo, hlăm wưng tinăp, alŭ wăl srăng lŏ dơ̆gn bi lar êpul tông čing hlăm dŭm boh ƀuôn. Hŏng mnuih mâo klei hur har  msĕ hŏng Dă Čăt Tư,  dhar bruă djŏ tuôm mâo ngă leh hră mơar akâo kơ knŭk kna tŭ yap jing mnuih mbruă hĭn. Liêng Hót Ngát brei thâo:

      “Hlăm ƀuôn hgŭm ƀiă snăk mâo mnuih hur har msĕ hŏgn ñu. Kyua ñu thâo hlăm klei mđĭ ai mtrŭt mjhar snăn dhar kreh čing čhar djuê ana  M’Nông, K’Ho tinei lŏ kơrŭ wĭt lehanăn đĭ lar msĕ si ară anei”.

Thŭn anei êgao kơ 75 thŭn leh, Dă Čăt Tư ti ƀuôn hgŭm Dam Rông 4, čar   Lâm Đồng ăt jih ai tiê lŏ tui duah klei kưt muiñ, ênhiang čing, klei yăl dliê đưm, jing msĕ si kriê pioh mnguh mngăt mơ̆ng djuê ana pô. Mơ̆ng dŭm hdruôm hră hŏng kỉê kngan ñu pô čih, hlŏng truh kơ dŭm êpul tông čing čhar ñu mâo mkŏ mjing, mtô bi hriăm, jing leh klei lŏ dơ̆ng čuê kjăp êdi hŏng dhar kreh djuê ana. Mơ̆ng klei hur har, lehanăn klei mbruă mơ̆ng Dà Cắt Tư, dhar kreh djuê ana  M’Nông amâo mâo djŏ knŏng dưi kriê pioh, ƀiădah lŏ mâo ai hdĭp mrâo, bi lar knhuah hdĭp hlăm eneuk ară anei./.