Dŭm hrue anei, dŭm boh alŭ anôk dôk hlăm alŭ wăl knơ̆ng Lý Sơn, čar  Quảng Ngãi, bruă hâo hưn kơ klei ruah khua bruă kƀĭn ala lehanăn Êpul gơ̆ng bruă ƀuôn sang djăp gưl mâo ngă leh hŏng klei jăk, kñăm bi mngač jih jang klei dưi, lehanăn bruă čuăn mơ̆ng mnuih ƀuôn sang. Lu mnuih ƀuôn sang mâo klei mđing lehanăn thâo săng kơ bruă klam mơ̆ng phung bi ala êpul gơ̆ng bruă ƀuôn sang jing pô bi ala brei kơ klei mĭn, kơ klei pô čang hmăng. Nguyễn Văn Huy, Khua kiă kriê alŭ wăl knơ̆ng Lý Sơn, čar Quảng Ngãi brei thâo, alŭ wăl mprăp leh djăp mta kơ klei hâo hưn pioh phung knuă druh, đảng viên lehanăn mnuih ƀuôn sang ƀuh klei yuôm bhăn mơ̆ng klei ruah khua, lehanăn rơ̆ng kjăp kơ klei êđăp ênang, lehanăn djăp mta klei găl kơ mnuih ƀuôn sang nao bi sĭt klei dưi kơ pô.

 “Ară anei, alŭ wăl mkŏ mjing leh klei bi kƀĭn tal êlâo, bi mklă jih jang anăn phung knuă druh, mnuih mă bruă, lehanăn dŭm êpul êya hlăm êpul kiă kriê bruă Đảng alŭ wăl knơ̆ng gĭt gai dŭm hdră êlan nao mgơ̆ng ruah. Lehanăn hâo hưn lar ƀar čiăng kơ phung bi ala ngă hră mơar nao mgơ̆ng ruah. Boh nik truh ară anei mâo ngă leh djŏ hŏng hdră kčah mơ̆ng dhar bruă klei ruah khua.”

Ti ƀuôn hgŭm Nghĩa Hành, čar Quảng Ngãi, klei bi kƀĭn kơ bruă ruah khua, mă klei blŭ mơ̆ng phung knuă druh, mnuih mă bruă, lehanăn phung bi ala mơ̆ng dŭm boh alŭ ƀuôn mâo mkŏ mjing leh hŏng klei hnŭk êngiê, klă mngač, djŏ klei bhiăn. Bruă mgơ̆ng mnuih ti dŭm boh alŭ ƀuôn mâo mprăp leh jăk djŏ hŏng ênoh čuăn, mnuih mâo klei thâo, mâo knhuah dôk dơ̆ng ƀơ̆ng huă jăk. Anôk bruă Mặt trận dŭm boh ƀuôn alŭ, lehanăn dhar bruă ruah khua ƀuôn hgŭm Nghĩa Hành mkŏ mjing leh mă klei blŭ mơ̆ng mnuih ƀuôn sang ti anôk phung mgơ̆ng ruah dôk.

 “Ngă hŏng klei klă mngač bruă mgơ̆ng mnuih ruah kơ êpul gơ̆ng bruă ƀuôn sang, anôk bruă djŏ tuôm mtă kơ dŭm êpul êya mă bruă hŏng klei klă mngač hŏng jih jang knuă druh, mnuih mă bruă. Hŏng phung mgơ̆ng ruah ti dŭm boh alŭ ƀuôn, anôk bruă Mặt trận mkŏ mjing klei iêo jak mnuih ƀuôn sang phung bi ala, dŭm êpul êya čiăng hưn mdah kơ mnuih mgơ̆ng ruah.”

Kluôm čar Quảng Ngãi mâo 4 êpul êya ruah khua phung bi ala bruă kƀĭn ala, ruah 11 čô phung bi ala, 21 anôk ruah Êpul gơ̆ng bruă ƀuôn sang čar, pioh ruah  66 čô phung bi ala. Ti gưl ƀuôn hgŭm, mâo leh hdră mtrŭn kơ êpul êya anôk ruah khua, lehanăn dŭm ênoh phung bi ala hŏng ênoh jih jang truh 683 êpul êya anôk ruah khua. Bruă bi kƀĭn gưl tal sa kơ klei ruah khua mâo ngă leh djŏ klei bhiăn, lehanăn hâo mdah djăp ênŭm hŏng dŭm anôk bruă mâo klei dưi.

Aduôn Y Bích Thọ, K’iăng khua knơ̆ng bruă Mặt trận čar Quảng Ngãi brei thâo, bruă Mặt trận kiă kriê leh kjăp jih jang klei bi kƀĭn, ngă hlăm 3 gưl bi kƀĭn djŏ hŏng klei bhiăn ruah khua, rơ̆ng bi mâo klei hnŭk êngiê, klă mngač dơ̆ng mơ̆ng bruă mgơ̆ng ruah;

“Hlăm klei bi kƀĭn trông čhai, anôk bruă Mặt trận čar Quảng Ngãi dlăng yuôm kơ klei bhiăn čoh čuăn klei găl klei dưi mơ̆ng pô mgơ̆ng ruah, lehanăn rơ̆ng bi djăp ênoh êkei lehanăn mniê, hnơ̆ng thŭn, djuê ana, klei đăo, mnuih hlăm ƀuôn sang, bi djŏ hŏng klei dăp, mđing kơ hnơ̆ng kjăp jing tal êlâo. Bruă mă klei blŭ, klei đăo knang mơ̆ng mnuih ƀuôn sang anôk pô mgơ̆ng ruah dôk, bi êdah klei sa ai, klei čang hmăng mơ̆ng mnuih ƀuôn sang.”