Gĭt gai kơ klei mplĕ hră ruah khua, Khua bruă kƀĭn ala Trần Thanh Mẫn mñă brei mprăp jăk kơ klei kƀĭn tal 5 mơ̆ng Êpul gơ̆ng ruah khua gưl dlông, mĭn tĭng mkŏ mjing êlâo kơ wưng Tết Nguyên đán. Êpul gơ̆ng ruah khua ala čar hnưm mâo hră mơar gĭt gai dŭm alŭ wăl ngă klei ruah khua hlăm wưng Tết Nguyên đán, bi klă bruă klam čiăng ngă mơ̆ng gưl alŭ ƀuôn truh kơ să, ƀuôn hgŭm, čar, ƀuôn prŏng, rơ̆ng kơ klei gĭt gai kluôm mơ̆ng nah gŭ truh kơ gưl čar, amâo brei mâo klei ngă ngơi mang, kpăk hlăm bruă mprăp kơ klei mplĕ hră kyua mdei tết.

Ngă klei gĭt gai mơ̆ng khua Bruă kƀĭn ala, mrâo anei Êpul ngă bruă mrô 2 mơ̆ng êpul răng mgang klei êđăp ênang yang ƀuôn mơ̆ng êpul gơ̆ng ruah khua ala čar mơ̆ng Thượng tướng Lê Tấn Tới, khua kiă kriê dhar bruă lĭng kahan – klei êđăp ênang leh anăn bruă hŏng tač êngao mơ̆ng Bruă kƀĭn ala mă leh bruă hŏng dhar bruă ruah khua čar Khánh Hoà kơ bruă răng mgang klei êđăp ênang yang ƀuôn đru kơ klei mplĕ hră. Thượng tướng Lê Tấn Tới mñă klă.

“Bi lar bruă klam mơ̆ng êpul răng mgang klei êđăp ênang nah gŭ, kahan ƀuôn, anei jing êpul jĕ giăm hŏng mnuih ƀuôn sang hĭn. Kâo mñă ti alŭ wăl dleh, tiŏ nao mtam êpul ngă bruă mơ̆ng ară anei, mơ̆ng êlâo kơ tết. Čiăng giăm hŏng mnuih ƀuôn sang, hmư̆ mnuih ƀuôn sang blŭ, lač mnuih ƀuôn sang săng, ngă mnuih ƀuôn sang tŭ. Amâo djŏ ôh truh giăm hruê mplĕ hră kơh tiŏ nao mnuih. Boh nik uêñ ĭn kơ krĭng čư̆ čiăng, plao ksĭ”.

          Ti čar Dak Lak, dhar bruă djŏ tuôm mbĭt hŏng mnuih ƀuôn sang dôk ngă bruă gang mkhư̆, bi kdơ̆ng hŏng dŭm klei hưn soh, đru răng mgang klei mplĕ hră klă sĭt jing hruê knăm phŭn mplĕ hră ti alŭ wăl. Jing k’iăng khua êpul hâo hưn bi mlih mrô êpul êya, Y-Sắc Kbuôr, khua ƀuôn Čuôr, să Ea Mdroh, čar Dak Lak brei thâo:

Kâo mŭt hlăm Zalo, Facebook ƀuh dŭm klei hưn soh kơ mnuih mă bruă, pô bi ala Bruă kƀĭn ala amâodah phung bi ala Êpul gơ̆ng bruă ƀuôn sang mâo nanao kâo hlŏng lăm mtam. Klei Yuăn mâo, klei Êđê mâo. Anei jing dŭm klei hưn soh, bi kdơ̆ng, êjai ƀuh kâo lăm mtam leh anăn mtă kơ grăp čô ngă msĕ mơh, amâo mâo brei arăng mjhua, hmăi truh kơ pô leh anăn gŏ sang.”

Gưl mplĕ hră ruah phung bi ala Bruă kƀĭn ala gưl 16 leh anăn bi ala Êpul gơ̆ng bruă ƀuôn sang dŭm gưl, wưng thŭn 2026 – 2031, car Dak Lak mâo hlăm brô 2,42 êklăk čô nao mplĕ hră. Čiăng kơ hruê ruah khua êđăp ênang, djŏ hdră bhiăn, Bruă sang čư̆ êa čar Dak Lak mkŏ mjing leh dhar bruă ruah khua gưl čar, 102 dhar bruă mplĕ hră gưl să leh anăn dŭm êpul thơ̆ng kơ bruă, hlăm anăn mâo êpul kahan ksiêm, lĭng kahan jing kmeh gơ̆ng, hluê ngă hrăm mbĭt dŭm bruă klam răng mgang klei êđăp ênang, čŏng gang mkhư̆ mơ̆ng hnưm, mơ̆ng kbưi. Trương Công Thái, k’iăng khua Bruă sang čư̆ êa čar Dak Lak mñă klă:

Lŏ dơ̆ng mđĭ hĭn bruă thâo klă boh sĭt, wăt hlă internet, boh nik jing hdră mnêč mơ̆ng phung roh, phung bi kdơ̆ng djŏ tuôm ti čar Dak Lak. Hluê anăn hmao ƀuh, msir dŭm klei hưn doh čhuai kơ klei mplĕ hră ruah khua, mbĭt anăn ngă jăk bruă đru kčĕ Êpul gĭt gai čar mgaih msir, đru răng mgang klei êđăp ênang ti alŭ wăl, amâo mâo brei mâo anôk dleh ksiêm dlăng hmăi kơ klei ruah khua”.

Hŏng klei gĭt gai ktang phĭt, hrăm mbĭt mơ̆ng gưl dlông, klei nao hgŭm mơ̆ng dŭm alŭ wăl mbĭt hŏng ai tiê bruă klam mơ̆ng dŭm êpul kmeh gơ̆ng leh anăn mnuih ƀuôn sang, bruă mprăp kơ klei mplĕ hră ruah phung bi ala Bruă kƀĭn ala  gưl 16 leh anăn bi ala Êpul gơ̆ng bruă ƀuôn sang dŭm gưl wưng thŭn 2026 - 2031 dôk dưi ngă kjăp, tŭ dưn./.