Ti sang bi kƀĭn ƀuôn alŭ Đoàn, să knông lăn Ia Lôp, čar Dak Lak dưi mkra mđĭ bi siam. Anăn knăl “Tŭ drông klei mplĕ hră ruah phung bi ala Bruă Kbĭn ala gưl 16 leh anăn Êpul gơ̆ng bruă ƀuôn sang dŭm gưl, wưng thŭn 2026 - 2031” dưi yuôl khuăt ti anăp ƀăng jang. Huỳnh Quang Phấn, khua alŭ Đoàn brei thâo:

“Alŭ Đoàn gưl anei srăng drông giăm 300 čô hriê mplĕ hră ruah phung bi ala Bruă Kbĭn ala leh anăn Êpul gơ̆ng bruă ƀuôn sang dŭm gưl hlăm hruê 15/3 kơ anăp. Čiăng đru jăk hĭn kơ klei mplĕ hră, alŭ dưi klă ênoh đru mkra mđĭ anôk bi kƀĭn. Êpul kriê dlăng alŭ mtrŭt mjhar mnuih ƀuôn sang bi mguôp hŏng kahan ksiêm, lĭng kahan đru mguôp hruê ai, mkra mđĭ sang bi kƀĭn, jhưng mdhô̆, rơ̆ng kơ wăl doh siam, djăp klei čuăn hruê mplĕ hră”.

 Bùi Sỹ Đông ti alŭ Đoàn brei thâo, mơ̆ng hlăk đuê̆ mơ̆ng čar Bến Tre hriê ti knông lăn Dak Lak mă bruă knuă, hdĭp mda mơ̆ng 30 thŭn êlâo, anei jing gưl mplĕ hră tal 5 ñu nao hgŭm, ruah phung bi ala Bruă Kbĭn ala leh anăn Êpul gơ̆ng bruă ƀuôn sang dŭm gưl. Hŏng ñu, bruă dưi đru mguôp ai tiê kơ hruê knăm prŏng jing ktưn hưn êdi:

“Gưl mplĕ hră ruah phung bi ala Bruă Kbĭn ala, Êpul gơ̆ng bruă ƀuôn sang anăp anei, kâo hmăng hmưi srăng ruah phung bi ala djăp klei thâo, klei hriăm, klei mĭn čiăng ktrâo atăt, gĭt gai mnuih ƀuôn sang hmei, bi ala kơ klei mĭn, ba klei blŭ mơ̆ng phung bi ala truh hŏng Đảng, Knŭk kna, čiăng kơ dŭm boh klei hlăm alŭ wăl dưi msir găl guôp. Mbĭt anăn, uêñ mĭn mđĭ kyar êlan klông ăt msĕ mơh bruă mdrao mgŭn  ti alŭ wăl knông lăn leh bi mŭt mbĭt”.

Gưl mplĕ hră ruah phung bi ala Bruă Kbĭn ala leh anăn Êpul gơ̆ng bruă ƀuôn sang 2 gưl, wưng thŭn 2026 - 2031. ti să knông lăn Ia Lôp, čar Dak Lak mâo 4.600 čô nao mplĕ hră. Nguyễn Duy Trung, k’iăng khua bruă Đảng să Ia Lôp brei thâo, alŭ wăl mkŏ mjing leh 4 anôk mplĕ hră hŏng 10 êpul mplĕ hră ti dŭm alŭ, dăp ngăn prăk kơ bruă mkŏ mkra, mđĭ hĭn êpul kahan ksiêm, lĭng kahan knông lăn, kahan ƀuôn răng mgang klei êđăp ênang alŭ wăl knông lăn êlâo, hlăm leh anăn êdei kơ klei mplĕ hră, mđing truh klei mplĕ hră êđăp ênang, tŭ dưn.

Să mkŏ mjing leh dŭm hdră, mta phŭn hâo hưn kơ bruă ruah khua čiăng mđung asăp, hŏng klei mrâo dưi mđung 2 blư̆ hlăm hruê jing aguah leh anăn tlam. Mkŏ mjing dŭm êpul mplĕ hră, mprăp dŭm klei găl kơ klei mplĕ hră ruah phung bi ala Bruă Kbĭn ala leh anăn Êpul gơ̆ng bruă ƀuôn sang dua gưl wưng thŭn 2026 - 2031 hlăm hruê 15/3 anăp anei”.

Ia Lôp jing 1 hlăm 4 să knông lăn Yŭ Dak Lak, bi knông hŏng čar Mondulkiri (Campuchia). Ti alŭ wăl mâo kđông kahan knông lăn 735 (Ea Hleo) hlăm êpul gĭt gai lĭng kahan knông lăn čar Dak Lak jưh jơ̆ng. Trung tá Trần Ngọc Kiên,  k’iăng khua kđông kahan knông lăn 735 brei thâo, êngao kơ bruă răng mgang klei dưi kiă kriê, klei êđăp ênang knông lăn, knuă druh, lĭng kahan dŭm anôk bruă lŏ nao hgŭm răng mgang klei êđăp ênang êlâo, hlăm leh anăn êdei klei kƀĭn kluôm tal 14 mơ̆ng Đảng, ăt msĕ mơh klei ruah phung bi ala Bruă Kbĭn ala leh anăn Êpul gơ̆ng bruă ƀuôn sang dŭm gưl.

Kđông kahan knông lăn Ea Hleo hưn mdah kơ gưl bruă Đảng nah gŭ, Bruă sang čư̆ êa alŭ wăl ksiêm dlăng, ruah leh anăn mprăp djăp mnơ̆ng yua kơ dŭm anôk mplĕ hră, tiŏ nao êpul bi mguôp bi doh, bi msiam, mprăp kdrăp yua, yuôl ƀăng rôn, anăn knăl, mbĭt anăn tiŏ nao êpul răng mgang, rơ̆ng klei êđăp ênang ti dŭm anôk mplĕ hră. Êngao kơnăn, anôk bruă mtrŭt mđĭ bruă hâo hưn čiăng kơ mnuih ƀuôn sang thâo klă mnêč bi rai, klei ngă bruă mơ̆ng phung bi rai klei mplĕ hră, mơ̆ng anăn mnuih ƀuôn sang mâo klei răng, čŏng bi kdơ̆ng tŭ dưn.”

          Klei nao hgŭm mơ̆ng bruă kđi čar mbĭt hŏng klei sa ai mơ̆ng mnuih ƀuôn sang, bruă mprăp kơ klei mplĕ hră ti să knông lăn Ia Lôp dưi ngă mjêč, djŏ hdră bhiăn. Mơ̆ng klei bi msiam dŭm anôk mplĕ hră, mtrŭt mđĭ klei hâo hưn răng mgang klei êđăp ênang, jih jang mđing truh kơ hruê 15/3 anăp anei jing hruê knăm mơ̆ng phung mplĕ hră krĭng knông lăn, ruah phung bi ala mâo klei thâo, klei mĭn, mâo kơhưm bi ala kơ klei mĭn, klei hmăng hmưi mơ̆ng mbms ti krĭng knông lăn čar Dak Lak./.